ب / ئەگەر ئەو د رابوون و روينشتنەكێدا خەلەت بوون، يان تشتەك ژ نڤێژێ ژبيركر، بۆ تە هەيە تو وان ئاگەهداركەى ب ڤى رەنگى: بەرێ دەستێ خۆ يێ راستێ دێ ل پشتا دەستێ خۆ يێ چەپێ دەى، و ب گۆتنا (سبحان الله) وان ئاگەهدار ناكەى، چونكى ئاگەهداركرنا ئيمامى ب گۆتنا (سبحان الله) يا زەلامايە، و ژن ب دەست قوتانێ و ب رەنگێ مە گۆتى بەرێ دەستێ راستێ دێ ل پشتا دەستێ چەپێ دەت دێ ئيمامى ئاگەهداركەت، چ ئيمام زەلام بيت يان ژن، ئەڤە هەكە خەلەتى نە د خواندنێدا بيت، و هەكە د خواندنا فاتحێ يان يا ئەو سۆرەتا پشتى فاتحێ دخوينيت د ركاعەتا ئێكێ و دووێدا بۆ ژنێ هەيە بۆ ئيمامى دورستكەت، ب تايبەتى هەكە كەس ژ وێ شارەزاتر نەبيت. دويماهيك نڤێژ پێغەمبەرێ خودێ (سلاڤێت خودێ لێ بن) د ژيانا خۆدا كرى پشتى ساخلەميا وى خۆش بووي ئەڤ ئاراستە كر، پشتى پێغەمبەرێ خودێ (سلاڤێت خودێ لێ بن) ب سەر خۆڤە هاتى، قەستا مزگەفتێ كر، ديت موسلمان هەمى يێ ل پشت ئەبو بەكرى (خودێ ژێ رازی بیت) نڤێژێ دكەن، دەمێ سەحابيان پێغەمبەرێ خودێ (سلاڤێت خودێ لێ بن) ديتى كەيفا وان گەلەك هات دەستێت خۆ قوتان، و ئەبو بەكر (خودێ ژێ رازی بیت) د نڤێژا خۆدا نەدزڤرى، وەختێ خەلكى زێدە دەست قوتاين، زڤرى پێغەمبەرێ خودێ (سلاڤێت خودێ لێ بن) ديت، ئەبو بەكر (خودێ ژێ رازی بیت) زڤرى ديت پێغەمبەرێ خودێ (سلاڤێت خودێ لێ بن) يێ دهێت و سحەتا وى يا خۆشە، كەيفا وى گەلەك هات و خۆ ڤەكێشا پشت و پشت هات، دا پێغەمبەرێ خودێ (سلاڤێت خودێ لێ بن) بچيتە پێش و ببيتە ئيمام، پێغەمبەرێ خودێ (سلاڤێت خودێ لێ بن) ئيشارەت دا ئەبو بەكرى (خودێ ژێ رازی بیت) دا بمينيت، بەلێ ئەبو بكر (خودێ ژێ رازی بیت) هەر هات و دەستێت خۆ بلندكرن و حەمدا خودايێ خۆ كر ژ كەيفادا ژبەر كو پێغەمبەرێ خودێ (سلاڤێت خودێ لێ بن) يێ ژێ رازيە، پێغەمبەرێ خودێ (سلاڤێت خودێ لێ بن) پێش كەفت و بوو ئيمام، و ئەبو بكر (خودێ ژێ رازی بیت) بوو مەئموم، و موسلمانان نڤێژا خۆ دويف نڤێژا ئەبو بەكرى (خودێ ژێ رازی بیت) دكر و وى نڤێژا خۆ دويف نڤێژا پێغەمبەرێ خودێ (سلاڤێت خودێ لێ بن) دكر، ڤێجا دەمێ خلاس بووى بەرێ خۆ دا خەلكى و گۆت: گەلى خەلكى هەوە خێرە دەمێ تشتەك بۆ هەوە د نڤێژێدا چێ بوو هەوە دەست ب دەست قوتانێ كر؟ دەستقوتان يا ژنان ب تنێيە، هەركەسێ تشتەك بۆ د نڤێژا ويدا چێ بوو بلا بێژيت: (سبحان الله) نينە ئێكى گولێ بيت بێژيت: سبحان الله، و نەزڤريت، و خودێ چێتر دزانيت.
