ب / ئەڤێ دلێ وى ب مزگەفتێڤە گرێداى بلا كەيفا وى ب سيبەرا عەرشێ خودێ خۆش ببيت، دێ ژ وان بيت يێت رۆژا قيامەتێ دكەڤنە بن سيبەرا عەرشێ وى، و ديسا يێ ئنيەتا خێرێ ئينا و دلێ خۆ ئێخستە سەر خێرێ، بلا دلێ وى خۆش ببيت خۆ هەكە نەشيابيت وێ خێرێ بكەت ژى، چونكى پێغەمبەرێ خۆشتڤى (سلاڤێت خودێ لێ بن) دبێژيت: ((ب راستى هەمى كار و كريار ب ئنيەتانە)). ديسا دبێژيت: ((ب راستى خودايێ مەزن خێر و گونەه يێت داين (يان ئەمرێ ملياكەتان يێ كرى بنڤێسن، يان بۆ ملياكەتان يێت ئاشكراكرين كا خێر و گونەهان چاوا بنڤێسن) ڤێجا هەركەسێ بكەتە دلێ خۆ خێرەكێ بكەت و نەكەت، خودێ خێرەكا تمام بۆ وى ل دەف خۆ دێ نڤێسيت، و هەكە كرە دلێ خۆ و كر ژى، خودێ دێ بۆ دەه خێران نڤێسيت، هەتا حەفت سەد قاتان و حەتا گەلەك قـــــاتـــان)).
ڤێجا مادەم دلێ ڤێ خويشكێ ل سەر خێرێيە.. خێر دێ بۆ هێتە نڤێسين ـ بكەت يان نەكەت ـ، هەكە كرە دلێ خۆ و نەكر خێرەك دێ بۆ هێتە نڤێسين، و هەكە كر.. دەه خێر دێ بۆ هێنە نڤێسين هەتا حەفسەد قاتان و پتر، و نەيا دورستە ژن ژ مزگەفتێ بێتە ڤەگرتن و بۆ كەسێ نينە نە دايك، نە باب و نە زەلامێ ژنێ ژ مزگەفتێ ڤەگريت هەكە ژنێ ڤيا بچيتە مزگەفتێ، نەخاسمە هەكە رێكا ئێمن بيت، ب راستى جهێ نەخۆشيێيە ئەڤرۆ رێكا ژنێ يا ڤەكرى بيت بۆ هەمى جهان ـ سويكێ و دائيرێ و سەيرانێ و دەواتا تێكەل و جڤينێت تێكەل و ئاهەنگێت تێكەل ـ بەلێ رێكا وێ يا گرتى بيت بۆ مالا خودێ و مزگەفتێ، ئەڤە كارەكێ نەيێ جوانە و نەيێ شەرعيە، و خودێ چێتر دزانيت.
