ب / دورستكرنا رێزان و گەهاندنا پێ و ملان د نڤێژا ب جماعەتدا نەيا تايبەتە ب زەلامانڤە، و هەركەسێ چۆ د نڤێژا جماعەتدا دڤێت ڤان ئارەستەيان بەرچاڤ وەرگريت، چونكى ئەڤە ئاراستەيێت پێغەمبەراتيێنە، و دەمێ پێغەمبەرى (سلاڤێت خودێ لێ بن) ئەمرێ موسلمانان دكر رێزێت خۆ راستكەن و بگەهيننە ئێك، ئەڤ ئەمرە نە ژ زەلامان تنێ دگرت، بەلكى ئاراستەى ژن و زەلامان بوو، و ب راستى پێغەمبەرێ خودێ (سلاڤێت خودێ لێ بن) گرنگيەكا مەزن يا دايە راستكرنا رێزان د نڤێژێدا و گەلەك جاران ب دەستێ خۆ رێز راستكرن و دەست ب نڤێژێ نەدكر هەتا زانيبا موسلمانان رێزا خۆ راستكر پاشى دەست ب نڤێژێ دكر، و رێز راستكرن ژ تماميا نڤێژێ دانايە.
جابرێ كورێ سەمورەى، خودێ ژ هەردوويان رازى بيت، دبێژيت: پێغەمبەرێ خودێ (سلاڤێت خودێ لێ بن) هاتە دەف مە و گۆت: ((ئەرێ هوين رێزێت خۆ راست ناكەن هەروەكى ملياكەت رێزێت خۆ ل دەف خودايێ خۆ راست دكەن؟)) مە گۆت: يا پێغەمبەرێ خودێ و ملياكەت چاوا رێزێت خۆ ل دەف خودايێ خۆ راست دكەن؟ گۆت: ((رێزا ئێكێ تمام دكەن و رێزێ دگەهيننە ئێك)).
د يسسا پێغەمبەرێ خودێ (سلاڤێت خودێ لێ بن) د نڤێژەكێدا ديت هندەك ڤەمان، ئينا گۆتە وان: ((پێشڤە وەرن، و پشت من راوەستن و يێت پشت هەوە بلا پشت هەوە راوەستن، و بەردەوام هندەك خۆ ڤەدهێلن هەتا خودێ وان ڤەدهێليت)). و ئبن مەسعوود (خودێ ژێ رازی بیت) دبێژيت: پێغەمبەرێ خودێ (سلاڤێت خودێ لێ بن) ملێت مە د نڤێژێدا راست دكرن و دگۆت: ((رێزێت خۆ راستكەن و پێش ئێك و دوو نەكەڤن، دێ دلێت هەوە بەرێك چن، بلا يێت خودان عەقل و بالغ (يان يێت خودان قەدر) ژ هەوە نێزيكى من بن، پاشى يێت نێزيكى وان (د سالۆخێ بۆريدا) پاشى يێت نێزيكى وان)).
و ئەنەس (خودێ ژێ رازی بیت) دبێژيت: پێغەمبەرى (سلاڤێت خودێ لێ بن) دگۆت: ((رێزێت خۆ راستكەن، ب راستى راستكرنا رێزان ژ تماميا نڤێژێيە)). و د ريوايەتا بوخاريدا: ((ب راستى راستكرنا رێزان ژ كرن و پاراستنا نڤێژێيە)). و دەمێ قامەت بۆ نڤێژێ هاتە گرتن، پێغەمبەرێ خودێ (سلاڤێت خودێ لێ بن) بەرێ خۆ دا مە و گۆت: ((رێزێت خۆ دورستكەن و خۆ بگەهيننە ئێك، ب راستى ئەز هەوە پشت خۆرا دبينم)). و د بوخاريێدا هاتيە، ئەنەسى دگۆت: و ئێكى ژ مە ملێ خۆ ب ملێ هەڤالێ خۆ ڤەنا و پێ خۆ ب پێ وى ڤەنا. و نەعمانێ كورێ بەشيرى (خودێ ژێ رازی بیت) دبێژيت: پێغەمبەرێ خودێ (سلاڤێت خودێ لێ بن) دگۆتە مە: ((يان هوين دێ رێزێت خۆ راستكەن يان ب سويند خودێ دێ دلێت هەوە ژ بەرێك بەت)). و ديسا دبێژيت: پێغەمبەرێ خودێ (سلاڤێت خودێ لێ بن) بەردەوام رێزێت مە راست دكرن هەتا دا بێژى تيران پێ راست دكەت، هەتا ديتى ئەم تێگەهشتين، پاشى رۆژەكێ پێشكەفت، رابوو هەتا نێزيك بووى دەست ب نڤێژێ بكەت زەلامەك ديت سينگێ وى ديار ببوو، ئينا گۆت: ((بەندەيێت خودێ.. ب سويند هوين دێ رێزێت خۆ راستكەن، يان ب سويند خودێ دێ دلێت هەوە ژ بەرێك بەت)).
و بەرائێ كورێ عازبى خودێ ژ هەردوويان رازى بيت، دبێژيت: پێغەمبەرێ خودێ (سلاڤێت خودێ لێ بن) سينگێت مە و ملێت مە د نڤێژێدا راست دكرن و دگۆت: ((رێزێت خۆ راستكەن و پێش ئێك و دوو نەكەڤن دێ دلێت هەوە ژ بەرێك چن))، و دگۆت: ب راستى خودێ و ملياكەتێت وى سەلەواتان ددەنە سەر رێزێت ئێكێ)). (و سەلەوات ژ خودێ، دلۆڤانيە؛ و ژ ملياكەتان، دوعانە). و ئبن عومەرى خودێ ژ هەردوويان رازى بيت، دبێژيت: پێغەمبەرێ خودێ (سلاڤێت خودێ لێ بن) گۆت: ((رێزان دورستكەن، و ملان بگەهيننە ئێك و كێماتيان بگرن، و خۆ د دەستێت برايێت خۆدا نەرم بكەن (هەكە ڤيان هەوە بكێشن يان پاشڤە ببەن بۆ دورستكرنا رێزێ) و كێماسيان بۆ شەيتانى نەهێلن، يێ كێماتيا رێزەكێ بگريت خودێ دێ گەهينيتە دلۆڤانيا خۆ و يێ كێماتيەكێ چێكەت و رێزێ ببريت خودێ دێ وى ژ دلۆڤانيا خۆ بريت)).
و ئەنەس (خودێ ژێ رازی بیت) دبێژيت: پێغەمبەرێ خودێ (سلاڤێت خودێ لێ بن) دبێژيت: ((رێزان بگەهيننە ئێك و نێزيكى ئێك بكەن، و ستۆيان بكەن ئێك سەمت، ئەز ب وى كەمە يێ جانێ من د دەستيدا ئەز يێ شەيتانان دبينم ژ دەرفەت و كێماتيا دەردكەڤن هەروەكى حەزەفن)). و حەزەف: رەنگەكێ پەزێ رەشە و يێ بچويكە ل يەمەنێ يێت هەين، و خودێ چێتر دزانيت.
