ب / هەمى زانا ئێكن و جوداهى د ناڤبەرا واندا نينە.. چەكێ ژنێ ـ يێ نە ژ زێر و زيڤى وەكى ئەلماس و دور و مەرجانان ـ زەكات ل سەر نينە، ژبلى هەكە بازرگاني پێ بێتەكرن، هنگى زەكات ل سەر دكەڤيت، بەلێ د ژێك جودانە ل سەر چەكێ ژنێ يێ ژ زێر و زيڤان، كا زەكات ل سەر هەيە يان نە؟ ئەبو حەنيفە و زاهرى و زەيدى و كۆمەكا دى ژ زانايان وەكى: سەعيد بن موسەيەب و عەتاْ و موجاهد و زوهري و سوفيانێ سەورى و عەبدوللايێ كورێ موبارەكى و هندەكێت دى دگەل هندێنە هەكە ئەو چەك گەهشتە (85) غرامان ـ كو نيسابا زێريە ـ زەكات لێ دكەڤيت، و دڤێت ژن هنگى زەكاتا چەكێ خۆ بدەت، و هەكە نەدا يا گونەهكارە، ب كار بينيت يان ب كار نەئينيت، مادەم گەهشتە نيسابا شەرعى دڤێت زەكات ژێ دەركەڤيت. و پالپشتى كريە سەر كۆمەكا بەلگەيان، بەلێ هەميان بەرسڤا ل سەر هەي، يان د لاوازن، يان ب بەلگ دانان نەدورستن.
و مەزهەبێ مالكيان و حەنبەليان و بۆچۆنا ب هێزتر ژ مەزهەبێ شافعيان و كۆمەكا زانايان وەكى شەعبى و قەتادە و ئيسحاقى و ئەبو سەورى و هندەكێت دى دگەل هندێنە، هەكە ئەو چەك يێ ب كارئينانێ بيت زەكات ل سەر نينە، بگەهيتە نيسابێ يان نە، و بەلگەيێ ڤان پالپشتى بۆ كرى ب هێزترن و پتر جهێ باوەرپێكرنێنە؛ چونكى زێر وەكى نافماليێنە، مەخسەد پێ خەملاندن و جوانكرنە، نە مەخسد ژێ زێدەكرنە. و دورست هاتيە زانين ئێكا وەكى عائيشايێ دايكا مە موسلمانان (خودێ ژێ رازی بیت) زەكات ژ زێرێ ئێتيمێت دەف خۆ نەدەردئێخست، ئەڤە هەكە زێر و چەك يێ دورست بيت و بێتە ب كارئينان، بەلێ هەكە هاتە دانان و نەهاتە ب كارئينان ژ لايێ خودانا خۆڤە.. هنگى زەكات لێ دكەڤيت، ديسا هەكە يێ شكەستى بيت و كێر كارئينانێ نەهێت، هنگى ژى زەكات لێ دكەڤيت، و ئەو زێرێ هاتيە كرين نە ب ئنيەتا خۆ خەملاندنێ، بەلكى بۆ پاشەرۆژێ.. هنگى ژى زەكات لێ دكەڤيت، و هەكە هند هاتە كرين ژ تخويبێت بەرئاقل و عورفى دەركەفت، هنگى ژى زەكات لێ دكەڤيت، و زێر هاتە كارئينان نە بۆ چەكێ حەلال وەكى بكەتە ئامان و كەفچك و گۆزك و گولدانك هنگى ژى زەكات لێ دكەڤيت.
ل ڤێرێ فەرە بزانين نابيت ئەم ژ زەكاتێ برەڤين، گەلەك ژنان زێرێ وان يێ دانايە د بنيرا ب كار نائينن، و دا زەكاتێ نەدەن ددەنەف زێرينگرى يان ددەنەف هندە ژنێت دى دا ب كاربينن بۆ هندە هەلكەفتان، وەكى: دەوات و ئاهەنگ و سەيرانان ب كار بينن، دا زەكاتێ لێ نەدەن، ب هێجەتا هندێ ئەڤ زێر و چەكە هاتە ب كارئينان، ئەڤە يا خەلەتە و نەدورستە، دڤێت خودانا ڤى زێرى ب كار بينيت نەئێكا دى، و دانەدەستا وێ بۆ ڤى چەكى دا ل ڤان هەلكەفتان بێتە ب كارئينان دبيت يا گونەهكاربيت نە يا خودان خێر، چونكى ئەوا ئەو زێر دايە ڤێ دبيت دێ گونەهان پێ كەت و ئەڤە هاريكاريە ل سەر گونەهێ، و خودايێ مەزن دبێژيت: ((وَتَعَاوَنُوا عَلَى الْبِرِّ وَالتَّقْوَىٰ وَلَا تَعَاوَنُوا عَلَى الْإِثْمِ وَالْعُدْوَانِ)) ئانكو: ل سەر باشى و پارێزكاريا خودێ هاريكارێت ئێك بن، و ل سەر گونەه و دەست درێژيێ هاريكارێت ئێك نەبن، و خودێ چێتر دزانيت.
