ب / ئەو مارا ل پێشيێ دهێتە دان ـ موقەددەم ـ زەكات لێ دكەڤيت هەكە گەهشتە نيسابێ، ئانكو هەشتێ و پێنج غرامێت زێرى يان بهايێ هندێ، و سال سەرڤە چۆ، بەلێ هەكە مارا موئەججەل بيت ئانكو يا ڤەماى.. زانا تێدا د ژێك جودانە:
ئەبو حەنيفە و زاهري دبێژن: ئەو مار وەكى دەينى حسێبە، زەكات لێ ناكەڤيت، هەتا وەردگريت، هەكە وەرگرت، دڤێت سالەك سەرا بچيت و بگەهيتە نيسابێ هەتا زەكات لێ بكەڤيت، ئەڤە هەكە وێ چو مالێ دى نەبيت، هەكە هندە مالێ دى هەبيت.. پشتى وەردگريت، دێ دانيتە دگەل مالێ خۆ يێ دى، و دێ زەكاتێ لێ دەت دويف مەرجێت زەكاتێ.
و ل دەف ئيمامێ شافعى (خودێ ژێ رازی بیت): هەكە ئەو مار بگەهيتە نيسابێ، زەكات لێ دكەڤيت، و هەر سال دڤێت زەكات لێ بێتە دان، دەف ئيمام ئەحمەد (خودێ ژێ رازی بیت): حوكمێ وێ مەهرێ حوكمێ دەينيە دەف وان، هەكە ئەو مار ل سەر ئێكێ زەنگين بيت، هەرگاڤا ژێ بێتە خواستن يێ ئامادەيە بدەت، هنگى هەرگاڤا وەرگرت دڤێت زەكاتا سالێت بۆرى بدەت، و هەكە ئەو مار ل سەر زەلامەكێ دەست كورت بيت، و نەشێت بدەت خۆ ژێ بێتە خواستن ژى، د ڤى كراسيدا وان دوو رەئى يێت هەين: زەكات لێ دكەڤيت و لێ ناكەڤيت، و زانايێ ئوسولى يێ حەنبەلى خەرقى رەئيا واجب ژێ گرتيە و بۆچۆنا ب هێزتر و يا پتر دل ل سەر رەحەت و قايم دبيت بۆچۆنا حەنەفى و زاهريانە: زەكات ل مارا ژنێ ناكەڤيت هەتا نەوەرگريت و نەگەهيتە نيسابێ و سال سەرڤە نەچيت، و خودێ چێتر دزانيت.
