ب/ ئەو دەستويريێت دورست مرۆڤ رۆژيێ دگەل بخۆت چەندەكن، ئەو ژى وەكى بەرى نوكە مە گۆتى: ئيسلام دينەكێ واقعيە و نەڤێت خەلكى تەنگاڤ بكەت و بارێ وان گران بكەت، كو نەشێن ب فەرزێت ئيسلامێ رابن، و دگەل هندێ ژى هەمى فەرمانێت ئيسلامێ دويف شيانێت مرۆڤينە، و ئيسلام دزانيت مرۆڤ دێ ئێتە ڤەگوهاستن بۆ هندەك كراسان، و هندەك كاودان دێ ب سەردا ئێن، نەشێت رۆژيێ تێدا بگريت، لەوا ئەڤ چەندە بەرچاڤ گرتيە و چەند دەستويريەك يێت داينێ رۆژيێ تێدا بخۆت، ژ وان:
ئێك: ژانا دانعومر و ژبەر پيراتيێ نەشێت رۆژيێ بگريت بۆ يێت هۆسا دورستە رۆژيێ بخۆن، و بەرامبەر خوارنا هەر رۆژيەكێ دێ زادێ بەلەنگازەكي دەن.
دوو: دەستويرى يا بۆ ژنا ب دووگيان و يا بچويكێ ب شير هەى، بۆ وان ژى هەيە رۆژيێ نەگرن و بخۆن. ژنا ب دووگيان، دبيت يا بێ چارەبيت و ژ خۆ بترسيت، يان ژ بچويكێ خۆ، چونكى بچويكێ د زكيدا ل سەر وێ دژيت، و يا بچويكێ ب شير هەى، د يسا بچويكێ وێ ژى يێ ب هيڤيا خوارنا وێڤە، ڤێجا دبيت هند شير نەبيت بچويكێ وێ تێر ببيت، يان ژ خۆ بترسيت گەلەك لاواز ببيت، بۆ وان هەيە رۆژيێ بخۆن، بەلێ كا پشتى هنگي چ ل سەر وانە ئەو بكەن.
ئەبو حەنيفە و ئەبو عوبەيد و ئەبو سەور و عەتاْ ء زوهرى و نەخەعى و سەعيدێ كورێ جوبەيرى خودێ ژ وان رازى بيت، دبێژن: ئەو رۆژيێت خوارين ژبەر حەملى و بچويكێ ب شير دێ بۆ خۆ قەزاكەت و گريتەڤە و چو دى ل سەر نينە، و چو بەدەلان ژ خوارنا بەلەنگازان نادەن. ئيمام ئەحمەد و ئيمامێ شافعى خودێ ژ هەردوويان رازى بيت، دبێژن: ئەگەر ئەو ژ خۆ ترسيان يان ژ خۆ و بچويكێ خۆ پێكڤە ترسيان و رۆژى خوارن، چو ل سەر وان نينە، بەس قەزاكرن ـ گرتنا رۆژێى جارەكا دى ـ. بەلێ ئەگەر وان رۆژى خوار، نەژبەر خۆ بەلێ ژبەر بچويكێ خۆ ب تنێ، وى وەختى دێ قەزاكەن، و بەدەلێ ژى دەن، خوارنا بەلەنگازەكي بەرانبەر هەر رۆژيەكێ.
سێ و چار: ژنا د سەفەرێدا و يا نەساخ، خودێ دبێژيت: ((فَمَن كَانَ مِنكُم مَّرِيضًا أَوْ عَلَىٰ سَفَرٍ فَعِدَّةٌ مِّنْ أَيَّامٍ أُخَرَ )) ئانكو: هەچيێ ژ هەوە د سەفەرێدا بيت يان يێ نەساخ بيت ـ چ ژن بيت يان زەلام ـ بۆ وى هەيە رۆژيا خۆ بخۆت، و پاشى تەمەت رۆژيێت خوارين بۆ خۆ قەزا بكەت، بەلێ ئەو كيژ سەفەرە.. سەفەرا فرۆكێيە، يا پاپۆرێيە، يا ترومبێلێيە، يا پيانە، يان يا دەواران؟ ئەڤە هەمينە، فەر ئەوە سەفەر بيت، و ئارمانج ژ وێ سەفەرێ گونەه نەبيت، و خودێ چێتر دزانيت.
