ب / هەكە حەج ل سەر ژنێ فەرز بيت، و ڤيا بچيتە حەجێ، و ژ زەلامێ خۆ يان مەحرەمێ خۆ خواست دگەل بچيتە حەجێ كا واجبە دگەل بچيت يان نە؛ زانا د ڤێ پرسێدا دوو بۆچۆنن: ل دەف زاهريان واجبە ئەو زەلام و مەحرەم دگەل وێ ژنێ بچن، و هەكە نەچۆن د گونەهكارن، نەخاسمە هەكە شيان هەبن، و نابيت ئەو خۆ ڤەگرن و قەبويل نەكەن، چونكى زەلامەك هاتە دەف پێغەمبەرێ خودێ (سلاڤێت خودێ لێ بن) گۆتێ: يا پێغەمبەرێ خودێ.. من دڤێت دگەل ڤى لەشكەرى هۆسا و هۆسا دەركەڤم ـ ئانكو بچمە جيهادێ ـ و ژنا من دڤێت بچيتە حەجێ، پێغەمبەرى (سلاڤێت خودێ لێ بن) گۆتێ: ((دگەل وێ هەرە))، و حەنەفى و حەنبەلى و شافعى دبێژن: ل سەر زەلامى و مەحرەمى واجب نينە، دگەل ژنێ دەركەڤن، بەلێ ئەز بۆچۆنا ئێكێ باشتر دبينم، نەخاسمە هەكە وى شيان هەبن، يان ژنێ مەسرەفێ وى ب ستۆيێ خۆڤە گرت، بەلێ هەكە شيان نەبن و پێ چێنەبيت ل سەر وى واجب نينە دگەل دەركەڤيت، و خودێ چێتر دزانيت.
