ب / ئەو تشتێت هەردوويان دڤێت لێ د هشياربن و خۆ ژێ بپارێزن ئەڤێت خوارێنە، و دگەل هەر خالەكێ ديار دبيت كا ژن و زەلام د چدا ژێك جودانە:
ئێك: پرچا سەرى يان مويێت لەشێ خۆ د بنيرا، نە كێم نە زێدە ژێڤەنەكەن، بەلێ هەكە پرچا سەرى، ئەو ب خۆ وەريا، چو تێدا نينە.
دوو: نوينۆكێت خۆ دڤێت ژێڤە نەكەن.
سێ: هەلبەت ژن هەر عەينى جلكێت خۆ، دێ كەتە بەر خۆ، يان دشداشەكێ سپى.
چار: نابيت گولاڤێ و بێنخۆشيێ، پشتى ئيحرامان ب كار بينن.
پێنج: دڤێت د هشيار بن د رێكێدا نێچيرێ نەكەن، خۆ هەكە نێچير ل بەر وان يا ب ساناهى ژى بيت، و ناچێبيت هاريكاريا كەسەكێ ژى ل سەر نێچيرێ بكەن.
شەش: دڤێت د هشيار بن هندى ئەو د ئيحراماندا، و هەتا حەجا خۆ يان عومرا خۆ ب دويماهى دئينن. دەمێ ئەو د مەكەهێدا چو داران نەشكێنن و چو گياى ژى نەهلقينن، نەخاسمە دەمێ دچنە موزدەليفێ يان مينايێ يان عەرەفێ، و نەبێژن كا دا ڤێ دارێ بشكێنين و رويننە خوارێ.
حەفت: هەلبەت هندى ئەو د ئيحراماندا بن، ناچێبيت زەلام سەرێ خۆ گرێدەت يان تشتەكى بكەتە سەرێ خۆ، هەلبەت ئەڤە بۆ زەلامى ب تنێ، بەلێ دشێت شەمسيێ دانتە هنداڤ سەرێ خۆ، دا تاڤ ل وى نەدەت.
هەشت: ناچێبيت زەلام جلكێت دورى بكەتە بەر خۆ، جلكێت وى دڤێت دوو پارچە بن، نەيێت دورى، دورستە ئەو قاييشێ ل سەر گرێدەت، دا نەكەڤن بەلێ جلكێت ژنێ هەر دێ د ئاسايى بن.
نەه: ناچێبيت حەجى پێلاڤێ بكەتە پێت خۆ، و پێدڤيە ئەو نەعالێ بكەتێ و ب مەرجەكى سەرێ نەعالا وى يا ڤەكرى بيت.
دەه: دڤێت پێت وى د رويس بن و گۆرێ نەكەتێ، و تبلێت وى و پانيا وى ژ نەعالێ دەركەڤن، و هەلبەت بۆ زەلامى و ژنێ ل ڤێرێ ئێك تشتە.
يازدە: ناچێبيت كەس دەزگۆركان بكەتێ، نە ژن و نە زەلام، و ناچێبيت كەس سەر و چاڤێت خۆ بگريت.
دوازدە: هندى هەردوو د ئيحراماندا بن چ يێت حەجێ چ يێت عومرێ دڤێت نەچنە نڤينا ئێك و دوو و ماچ و دەستكرن ژى د ناڤبەرا واندا چێنەبيت.
سێزدە: دڤێت هەردوو خۆ ژ جرەبرێ و قايش كێشانآ و ئاخفتنێت كرێت بدەنە پاش، و خودێ چێتر دزانيت.
