ب : ئه‌ڤه مافه‌كێ هه‌ڤپشكه، به‌لێ مخابن گه‌له‌ك زه‌لام بۆ خۆ مافه‌كێ تایبه‌ت دزانن و هه‌رگاڤا وی بڤێت ژ ژنێ وه‌ردگریت به‌لێ پویته‌ی ناده‌ته حه‌ز و ره‌غبه‌تا ژنێ و دبیت ب رۆژان یان حه‌فتیان و دبیت پتر خۆ ژێ ب ده‌ته پاش هه‌روه‌كی نڤین مافێ وی یێ تایبه‌ته و وێ هیچ ئه‌و ماف نینه، و یا دورست ئه‌وه زه‌لام بزانیت ژن بۆ خودامینیێ و كارێ مالێ و خزمه‌تكرنا خۆ نه ئینایه، و وێ مافه‌ك یێ ل سه‌ر هه‌ی ماڤێ نڤینێیه، و دڤێت ڤی مافی بده‌ته هه‌ڤژینا خۆ، و زانایێت مه تایبه‌ت مالكی و حه‌نبه‌لی دبێژن ئه‌ڤ مافه ئه‌ركه ل سه‌ر زه‌لامی، و هه‌كه ب ڤی ئه‌ركی نه رابوو و مافێ نڤینێ نه دا هه‌ڤژینا خۆ یێ گونه‌هكاره، و هه‌كه زه‌لامی چو هجه‌تێت شه‌رعی نه‌بن وه‌كی یێ نه‌ساخ بیت یان شولێ وی دێ ژ ده‌ست چیت و ده‌رگه‌هێ رزقێ وییه وی ماف نینه ئه‌و به‌رسڤا هه‌ڤژینا خۆ نه‌ده‌ت و نه‌چیته نڤینا وێ هه‌كه داخوازكر، چاوا دڤێت ژن بێ عوزرا شه‌رعی خۆ ژ نڤێنا زه‌لامی نه ڤه‌گریت هوسا دڤێت زه‌لام ژی بێ عوزرا شه‌رعی خۆ ژنڤینا ژنێ نه‌ڤه‌گریت، خودایێ مه‌زن ب ره‌نگه‌كێ گشتی دبێژیت: (ولهن مثل الذي عليهن بالمعروف) و هه‌ڤژینان ژی هه‌قێ عه‌ده‌تی ل سه‌ر زه‌لامان هه‌یه هه‌روه‌كی زه‌لامان هه‌ق ل سه‌ر وان هه‌ی، ڤێجا چاوا زه‌لام مافی دده‌ته خۆ هه‌رده‌مێ دڤێت بچیته نڤینا خۆ، دڤێت هوسا وی مافی ب ده‌ته هه‌ڤژینا خۆ ژی، به‌لگه ل سه‌ر هندێ نڤین مافه‌كێ ژنێیه، ئه‌بو جوحه‌یفه وه‌ھبێ کورێ عه‌بدوللای، خودێ ژێ رازی بیت، دبێژیت: پێغه‌مبه‌رێ خودێ سلاڤێت خودێ ل سه‌ربن، سه‌لمان و ئه‌بو ده‌رداء کربوونه برایێت ئێک، سه‌لمانی سه‌ره‌دانا ئه‌بو ده‌ردائی کر، ده‌یکا ده‌ردائیبێ سه‌روبه‌ر دیت، گۆتێ ته خێره؟ گۆت: برایێ ته ئه‌بو ده‌رداء ھه‌وجه‌ی دنیایێ نینه، ئه‌بو ده‌رداء ھاته‌ڤه، زاده‌ک بۆ چێکر، گۆتێ: بخۆ، ئه‌ز یێ ب رۆژیمه، گۆت: ئه‌ز ناخۆم ھه‌تا تو دگه‌ل من نه‌خۆی، خوار، وه‌ختێ بوویه شه‌ڤ، ئه‌بو ده‌رداء کارێ خۆ کر رابیت، گۆتێ: بنڤه نڤست، پاشی کارێ خۆ کر رابیت، گۆتێ: بنڤه، و وه‌ختێ بوویه دویماھییا شه‌ڤێ، سه‌لمانی گۆتێ: ڤێگاڤێ رابه، ھه‌میان پێکڤه نڤێژ کر، سه‌لمانی گۆتێ: ب راستی خودایێ ته حه‌ق یێ ل سه‌ر ته، و نه‌فسا ته حه‌ق یێ ل سه‌ر ته، و مالا ته حه‌ق یێ ل سه‌ر ته، ھه‌ر خودان حه‌قه‌کێ حه‌قێ وی بدێ، ئینا ھاته ده‌ف پێغه‌مبه‌ری سلاڤێت خودێ ل سه‌ربن ئه‌و سوحبه‌ت بۆ کر، پێغه‌مبه‌ری سلاڤێت خودێ ل سه‌ربن گۆت: سه‌لمان راست دبێژیت، و د حه‌دیسه‌كا دیدا یا دورستدا پێغه‌مبه‌ری سلاڤێت خودێ ل سه‌ربن گۆته عه‌بدوللاهێ كورێ عه‌مرێ كورێ عاصی بۆ من ھاتییه گۆتن تو ب رۆژێ ب رۆژی دبی و ب شه‌ڤێ رادبی؟ من گۆت: به‌لێ یا پێغه‌مبه‌رێ خودێ. گۆت: وه‌نه‌که، ب رۆژی به و بخۆ، و بنڤه و رابه، ب راستی له‌شێ ته حه‌ق یێ ل سه‌ر ته، و چاڤێ ته حه‌ق یێ ل سه‌ر ته، و ژنا ته حه‌ق یێ ل سه‌ر ته، و یێت سه‌را ته دده‌ن حه‌ق یێ ل سه‌ر ته، ئه‌ڤ هه‌ردوو حه‌دیسه ب ئاشكه‌رایی دیاردكه‌ن نابیت زه‌لام پشتا خۆ ب ده‌ته نڤینا ژنا خۆ، خۆ ئه‌گه‌ر هجه‌ت عیباده‌ت و په‌رستن بیت، پا تۆ چ دبێژی بۆ وان یێ نه بۆ ڤێ ئه‌گه‌رێ، خۆ ژ نڤینا ژنا خۆ ڤه‌دگریت و دده‌ته پاش، و حه‌دیسا دی ژنه‌ك هاته ده‌ف عومه‌رێ كورێ خه‌تابی خودێ ژێ رازی بیت، گۆتێ: زه‌لامێ من ب رۆژ یێ ب رۆژیه، و ب شه‌ڤ یێ ل سه‌ر نڤێژێ، و من نه‌ڤێت ئه‌ز گازندێ ل سه‌ر گوهداریا خودێ لێ بكه‌م، و كه‌عبێ ئه‌سه‌دی ل ده‌ف بوو، ئینا عومه‌ری خودێ ژێ رازی بیت، گۆتێ: خوش زه‌لامه زه‌لامێ ته، جاره‌كا دی ئاخفتنا خۆ گۆته‌ڤه، جاره‌كا دی عومه‌رێ كورێ خه‌تابی هه‌ر وه‌گۆتێ، ئینا كه‌عبێ ئه‌سه‌دی، گۆت: یا ئه‌میره‌لموئمنین ژن یێ گازندێ ل زلامێ خۆ دكه‌ت، یێ خۆ ژ نڤینا وێ دایه پاش، ئینا عومه‌ری خودێ ژێ رازی بیت گۆتێ، ماده‌م تو ئاخفتنا وێ تێگه‌هشتی، حوكمی ژی دناڤبه‌را وێ و زه‌لامێ وێدا بكه، ئینا گۆت كا زه‌لامێ وێ بینن، گۆتێ خودایێ مه‌زن بو زه‌لامی یێ حه‌لالكری چوار ژنا بینیت ئانكو هه‌ر ئێك دڤێت سێ شه‌ڤ ب سه‌رڤه نه‌چن یا چارێ زه‌لام ب چیته نڤینا وێ، ئینا عومه‌ر گۆتی: ئه‌ز نزانم ب چ گوهشم، ب تێگه‌هشتنا ته، یان ب حوكێ ته، هه‌ره من تو ل به‌صرا كریه حاكم دادوه‌ر، خودانێ موغنییێ ئبن قودامه‌یێ حه‌نبه‌لی خودێ ژێ رازی بیت، دبێژیت: ئه‌ڤ سه‌رهاتیه د ناڤ صه‌حاباندا به‌لاڤ بوو، و ده‌نگ ڤه‌دا، و كه‌سێ نه زڤراند، و ئه‌ڤه هندێ دگه‌هینیت، هه‌كه زه‌لامی چ هجه‌تێت بنه‌جھـ نه‌بن، نا بیت ئه‌و پتر ژ چار رۆژان خۆ ژ نڤیناژنا خۆ بده‌ته پاش.
