ب : هه‌كه هشكاتیه‌ك دناڤبه‌را ژن و مێراندا رویدا، و زه‌لامی سویند خوار نێزیكی نڤینا ژنا خۆ نه‌بیت، بۆ وی هه‌یه ئه‌و پێگریێ ب سوندا خۆ بۆ چار هه‌یڤان بكه‌ت و هه‌ر هند، پشتی چار هه‌یڤان، یان دڤێت سویندا خۆ بشكێنیت و بزڤریته‌ڤه نڤینا ژنا خۆ، یان به‌رده‌ت، یان ژنێ ماف یی هه‌ی بچیته دادگه‌هی و خۆ بده‌ته به‌ردان خودایێ مه‌زن دبیژیت: (لِّلَّذِينَ يُؤْلُونَ مِن نِّسَآئِهِمْ تَرَبُّصُ أَرْبَعَةِ أَشْهُرٍ فَإِن فَآءُوا فَإِنَّ اللَّهَ غَفُورٌ رَّحِيمٌ وَإِنْ عَزَمُواْ الطَّلَاقَ فَإِنَّ اللَّهَ سَمِيعٌ عَلِيمٌ) ئه‌و زه‌لامێت سویند دخۆن کو نه‌چنه نڤینا ژنێت خۆ، بۆ وان ھه‌یه چار ھه‌یڤان خۆ بگرن، و ئه‌گه‌ر لێڤه‌بوون و سویندا خۆ شکاندن دڤێت بزانن خودێ لێنه‌گر و دلۆڤانه، و ئه‌گه‌ر لێڤه نه‌بوون و به‌ردان کرنه دلێ خۆ، دڤێت بزانن ب ڕاستی خودێ یێ گوھدار و زانایه.
ژ بلی سویندێ هه‌كه چ عوزر نه‌بن نابیت ئه‌و پتر ژ چار رۆژان پشتا خۆ بده‌ته نڤینا هه‌ڤژینا خۆ، ئه‌ڤه ئه‌گه‌ر ل مال بیت، پا ئه‌گه‌ر ل مال نه‌بیت ل ده‌رڤه بیت، یان ل وه‌غه‌ره‌كێ بیت، زانا دبێژن: دڤێت ئه‌و پتر ژ شه‌ش هه‌یڤا دویری نڤینا ژنا خۆ نه‌بیت، و به‌لگه ل سه‌ر ڤێ چه‌ندێ سه‌رهاتیا ل سه‌ر ده‌مێ عه‌مه‌رێ كورێ خه‌طاب رویدایی، شه‌ڤه‌كێ ده‌ركه‌فت گولێ بوو ژنه‌ك خه‌ریبێیت زه‌لامێ خۆدا دبێژیت: ئه‌ڤ شه‌ڤه دریژ بوو و دورماندورێت وێ تاری بوون، و خه‌و ژ من ره‌ڤی من چ یار نینن ترانا ل گه‌ل بكه‌م، ئه‌ز ب خودێ كه‌م هه‌كه ترسا خودێ نه‌با؛ دا ره‌خ و رویێت ڤی ته‌ختی لڤلڤن. ب رۆژ ئیمام عومه‌ری پسیاركر، دیار بوو زه‌لامێ وێ یێ چویه جیهادێ، و ئه‌ڤه ده‌مه‌كه یێ گیروبوی، ئینا عومه‌ری خودێ ژێ رازی بیت، فرێكره ده‌ف حه‌فصایی دایكا مه موسلمانان خودێ ژێ رازی بیت كچا وی، گۆتێ: ژن چه‌ند دشێت بێهنا خۆ ل سه‌ر زه‌لامێ خۆ فره‌هكه‌ت؟ گۆت شه‌ش هه‌یڤان، پشتی ڤێ عومه‌ری خودێ ژێ رازی بیت فه‌رماندا نابیت زه‌لام شه‌ش هه‌یڤان پتر ژ هه‌ڤژینا خۆ دویر كه‌ڤیت، به‌رێ خۆ بدێ نه هێلا زه‌لامێ بۆ جیهادێ ده‌ركه‌فتی شه‌ش هه‌یڤان پتر هه‌ڤژینا خۆ پێلیته ب تنێ، پا تۆ چ دبێژی بۆ وان ئه‌وێت هه‌ڤژینێت خۆ وه‌كی ئێخسیران دهێلنه ب تنێ، و دچنه ئه‌ورپا، و نه بۆ شه‌ش هه‌یڤان، به‌لكی هنده‌ك ب سالان دمینن، و هه‌ڤژینێت خۆ دهێلنه ب تنێ، ب استی ئه‌ڤه كاره‌كێ زێده یێ خه‌له‌ته، و گه‌له‌ك ژ وان بۆ دلێ خۆ یێت چوین، نه بۆ خواندنی، یان بازرگانیێ، یان فێربونا كاره‌كێ، و ده‌مێ عومه‌ری خودێ ژێ رازی بیت ئه‌ڤ فه‌رمانه دایی، نابیت زه‌لام شه‌ش هه‌یڤان پتر دویری هه‌ڤژینا خۆ بیت، چ صه‌حابان ئه‌ڤ فه‌رمانه نه زڤراند و وه‌رگرت، و ئه‌ڤه ژی دبیته ئێك ده‌نگیا صه‌حابان، كو نابیت زه‌لام بێ عوزر پتر ژ شه‌ش هه‌یڤان ژنا خۆ دویر كه‌ڤیت، یان دڤێت بهێت، یان گرێبه‌ستا هه‌ڤژینیی چاره‌سه‌ر بكه‌ت.
تێبینیێت گرێدایی ب نڤینێڤه:
ئێك: زانا نه ئێك بوچونن كا دڤێت هه‌ر چه‌ندێ زه‌لام بچیته نڤینا ژنا خۆ، هنده‌ك دوو رۆژان ددانن، و هنده‌ك چاران، و هنده‌ك حه‌فتیه‌كێ، به‌لێ هه‌روكی ئبن ته‌یمیه خودێ ژێ رازی بیت دبێژیت: ده‌م نا هێته سنورداركرن، دێ مینیته دویف هه‌وجه‌ییا ژنێ، هه‌كه ژن بخوازیت حه‌فتیێ جاره‌كێ كێمتر یان زێده‌تر ل دویف هه‌وجه‌ییا وێ دڤێت زه‌لام یێ وه‌سا بیت، و ئه‌ڤ بوچونه یا ب هێزه و دڤێت هه‌ردوو دویف هه‌وجه‌ییت هه‌ڤدو ئێكدوو پاك بكه‌ن.
دوو: نڤین مافه‌كێ هه‌ڤپشكه دناڤبه‌را واندا، و دڤێت ژن دورستی خوشیا خۆ دنڤینێدا ببیه‌ت، و نابیت بیێ ده‌ستوریا ژنێ زه‌لام ئاڤا خۆ پاڤێژته ده‌رڤه، و دڤێت ئه‌ڤه ل سه‌ر بنیاتێ پێكهاتنێ بیت، و هه‌ردوو درازی بن، و هه‌كه زه‌لامی ب خۆ كر و بێی ده‌ستوریا ژنێ وه‌كر، یێ گونه‌هكاره؛ چونكی دحه‌دیسێدا هاتیه هه‌روه‌كی ئبن ماجه ژ عومه‌رێ كورێ خه‌ططابی خودێ ژێ رازی بیت ڤه‌دگێریت، دبێژیت پێغه‌مبه‌ری سلاڤێت خودێ ل سه‌ربن نه‌هیا كری ئاڤ ژ نا ئازاد بێته جوداكرن ب ده‌ستوریا وێ نه‌بیت : (نهی رسول اللَّهِ سلاڤێت خودێ ل سه‌ربن أَنْ يُعْزَلَ عن الْحُرَّةِ إلا بِإِذْنِهَا).
سێ: نابیت زه‌لام د جھێ ده‌ستنڤێژا ستویڕرا بچیته ده‌ف ژنێ، و ئه‌ڤه حه‌رامه و گونه‌ھه، پێغه‌مبه‌ر سلاڤێت خودێ ل سه‌ربن دبێژیت: (لا يَنْظُرُ اللَّهُ إِلَى رَجُلٍ أَتَى امْرَأَةً فِي دُبُرِهَا) ئبن حه‌بانی ڤه‌گێرایه. خودێ ب دلۆڤانی به‌رێ خۆ ناده‌ته زه‌لامێ د جھێ ده‌ستنڤێژا ستویڕرا دھێته ده‌ف ژنا خۆ. و د ڤه‌گێرا نه‌سائیدا دبێژیت: (ملعون من أتى امرأته في دبرها) یێ دویرئێخستیه ژ دلۆڤانیا خودێ یێ ژ پشتێڤه بچیته ده‌ف ژنا خۆ، ڤێجا دڤێت ئه‌و رێکێ نه‌ده‌تێ، به‌لێ زه‌لام خۆشیێ ب ناف رانێت وێ ببه‌ت و ھه‌ر ھند چو نینه و نه‌گونه‌ھه، به‌لێ فه‌ره زه‌لام بزانیت نابیت د جھێ ده‌ستنڤێژا ستویڕرا بچیته نڤینا ژنا خۆ.
چار: نابیت ده‌مێ ژن د بێنڤێژیاندا یان د چلکاندا بچیته نڤینا خۆ چونکی پێغه‌مبه‌ری سلاڤێت خودێ ل سه‌ربن دبێژیت: ، (من أتى حَائِضًا أو امْرَأَةً في دُبُرِهَا أو كَاهِنًا فَصَدَّقَهُ بِمَا يقول فَقَدْ كَفَرَ بِمَا أُنْزِلَ على مُحَمَّدٍ) و د ڤی کراسیدا ژی به‌س جھێ نامویسێ دڤێت یێ پاراستی بیت، وه‌کی دی له‌شێ ژنێ ھه‌می یێ دورسته.
