ڤێ خوينێ چەند رەنگێت هەين، ژ وان:
ئێك: رەنگێ رەش، رەنگەك ب تنێ يێ تايبەتە ب خوينا عادێڤە، ئەو ژى ئەڤەيە: يێ رەشە، نيشان ل سەر ڤێ چەندێ پێغەمبەر (سلاڤێت خودێ لێ بن) دبێژيتە (فاتيما) كچا حوبەيشى: (هنديكە خوينا عادێيە يا رەشە و يا ئاشكرايە.. ڤێجا هەر گاڤا تە ئەڤ رەنگە ديت، دڤێت تو خۆ بگرى، و نڤێژان نەكەى و رۆژيان نەگرى، و هەرگاڤا هاتە گوهۆرين و بوو رەنگەكێ دى بزانە تو ژ عادێ دەركەفتى و نڤێژێت خۆ بكە). نەسائى و ئەبى داوودى ڤەگێرايە.
بەلێ نەكو ئەڤ رەنگە ب تنێ هەيە، بەلكى هندەك جارا هندەك رەنگێت دى ژى يێت هەين، بەلێ رەنگێ بنەتار و سەرەكى يێ رەشە.
دوو: رەنگێ سۆر، بەلێ دڤێت وەكى ژن ڤى رەنگێ خوينێ دبينيت، ڤان خالان بەرچاڤ وەرگريت:
1ـ ئەگەر د رۆژێت بێ نڤێژيا خۆدا رەنگێ خوينێ يێ سۆر ديت، ئەڤە رامانا وێ ئەوە كو خوينا عادێيە، و ئەحكامێت عادێ دێ كار پێ كەت.
2ـ ئەگەر پێشيێ خوينا رەش ديت هەتا رۆژێت وێ يێت ئاشكرا (كا چارن يان پێنجن... هتد، هەر ئێكێ ل دويف عادا وێ) بۆرين پاشى ئەڤ خوينە سۆر بوو، وى وەختى ئەو خوين نەيا عادێيە و بەس ئەو رۆژێت خوينا رەش ب تنێ دئێنە هەژمارتن عادە، و رۆژێت دى ئەوێت خوين تێدا سۆر بووى نەعادەنە و حوكم و بريارێت خۆ يێت هەين، ئەڤە ژى هەروەكى ئيمامێ شافعى دبێژيت.. و بەلگە ژى ئەو فەرموودەيا بۆريە يا فاتيما كچا حوبەيشى.
سێ و چار و پێنج: رەنگێ دى يێ ڤێ خوينێ رەنگێ شێليە يان رەنگێ تام سپى و رەشە وەكى ئاڤا پيس و شێلى، يان رەنگێ زەر وەكى ئەداڤێ يان كێمێ.
ديسا پێدڤيە ئەگەر ژنێ ئەڤ رەنگێت خوينێ ديتن دڤێت تێبينيا ڤان خالێت خوارێ بكەت:
1ـ كچا ژى و عەمرێ وێ ژ (9) ساليێ كێمتر يان ژى كچا نەشويكرى ئەگەر ڤى رەنگێ خوينێ بەرى خوينا رەش يا عادێ ببينيت، ئەو خوين نەيا عادێيە و ئەحكامێت عادێ بۆ نينن، كچ دێ هەر مينيت پاقژ و پێدڤى ناكەت سەرێ خۆ بشۆت، بەس د ڤى كراسيدا دەستنڤێژێ دشكێنيت و جهێ ڤێ دكەڤيت ژ جلكان پيس دكەت.
2ـ ئەگەر ژن پاقژ بوو ژ عادێ و پشتى سەرێ خۆ شويشتى و پاقژ بووى، ژن ڤى رەنگى ببينيت، ديسا نەعادەيە و بلا پەريشان نەبيت، ئەڤ خوينا ڤى رەنگى بەس دەستنڤێژێ دئێخيت.
بەلگە و نيشان ژى سەرهاتيا دەيكا عەتيەيە د ڤەگێرا بوخارى و ئەبى داووديدا دبێژيت: (مە رەنگێ شێلى و زەر، پشتى پاقژبوونێ نەحسێب دكر عادە و بێ نڤێژى).
ژ ڤێ فەرموودەيێ ئاشكەرا دبيت كو پشتى پاقژبوونا ژنێ ژ عادێ، ئەگەر خوينا شێلى يان زەراتيەكێ ببينيت ئەو نەعادەيە، و ژن يا پاقژە، و دڤێت رۆژى و نڤێژێت خۆ ژ خۆ نەبەت.
3ـ بەلێ ئەگەر ئەڤ رەنگێ خوينێ، وەكى هندەك زانا دبێژن تێكەل دگەل خوينا خۆ و د رۆژێت خۆدا ديت، ڤى دەمى دێ ئێتە هەژمارتن عادە، چونكى:
ئێك: تێكەليا خوينا وێ يا سەرەكى بوو.
دوو: هەر د رۆژێت خۆ يێت ئاشكەرادا ديت، و خودێ چێتر دزانيت.
