ب / ب ڤان رێكێت خوارێ ژن دشێت هەردووكان ژێك ببەتە دەرێ و ژێك جوداكەت:
1ـ ئەگەر ژنێ عادا خۆ زانى، و عادا وێ يا ئاشكەرا بيت، هند رۆژان دێ خۆ گريت و پاشى دێ خۆ شۆت و نڤێژان كەت، بەلگە و نيشان بەحسێ ژنەكێ بۆ پێغەمبەرى (سلاڤێت خودێ لێ بن) هاتەكرن كو ژنەكا هۆسا يا هەى گەلەك خوينا وێ دئێت، پێغەمبەرى (سلاڤێت خودێ لێ بن) گۆت: (بەرى هينگێ چەند رۆژان دما، بلا هند ژ هەيڤێ خۆ بگريت، پاشى بلا سەرێ خۆ بشۆت و نڤێژێت خۆ تێدا بكەت). نەسائى ڤەگێرايە.
2ـ ب زانينا رەنگێ خوينێ ئەگەر رۆژێت خۆ نەزانيت كا چەندن دبيت ب رەنگێ خوينێ بزانيت، خوينا عادێ يا رەشە، هندى خوين يا رەش بيت دێ خۆ گريت و ئەگەر ژ رەشى دەركەفت بۆ رەنگەكێ دى، وى وەختى ژ عادێ دەركەفت و بێ نڤێژى ب دويماهى هات، و كەفتە د ئستيحازێدا و دڤێت سەرێ خۆ بشۆت و نڤێژێت خۆ بكەت.. بەلگە و نيشان ل سەر ڤێ چەندێ، پێغەمبەرى (سلاڤێت خودێ لێ بن) گۆتە فاتيمايا كچا ئەبى حوبەيشى دەمێ هاتيە دەف پێغەمبەرى (سلاڤێت خودێ لێ بن)، و گۆتيێ: (ئەز پاقژ نابم؛ خوين هەر يا دئێت ئەز چ بكەم) ئينا پێغەمبەرى (سلاڤێت خودێ لێ بن) گۆتێ: (خوينا عادێ يا ئاشكەرايە يا رەشە، ئەگەر ژ وى رەنگى دەركەفت رامانا وێ ئەوە تو ژ عادێ دەركەفتى، دڤێت سەرێ خۆ بشۆى و نڤێژێت خۆ بكەى). نەسائى ڤەگێرايە.
3ـ ئەگەر رۆژێت خۆ نەزانيت و چو ژ رەنگى ژى نەزانيت، وەكى كچا ژ نوى بالغ بووى، و ئەڤ خوينە ديت و نەراوەستيا. و ژ نوى دبينيت نە رۆژان دزانيت نە چو ژ رەنگى دزانيت كو ژێك ببەتە دەرێ ئەڤە خوينا عادێيە يا رەشە و ئەڤە يا ئستيحازێيە رەنگەكێ ديە.. وى وەختى ئەو دێ بەرێ خۆ دەتێ كا باراپتر ژنێت وێ دەڤەرێ نەخاسمە ژنێت نێزيكى وێ ژ خويشك و دۆتمام و كەس و كاران كا چەند دمينن و رۆژێت وان چەندن، هند دێ خۆ گريت و نڤێژان تێدا ناكەت، پشتى هينگێ دێ سەرێ خۆ شۆت و نڤێژان كەت و خەم نينە بلا خوين هەر يا بەردەوام بيت حمنا دشا پێغەمبەرى (سلاڤێت خودێ لێ بن) دبێژيت: ئەز هاتمە دەف پێغەمبەرى (سلاڤێت خودێ لێ بن)، ل مالا خويشكا من زەينەبێ بوو، من گۆتێ: حال و مەسەلەيێت من ئەڤەنە (كو بەردەوام هەمى هەيڤێ ئەز خوينێ دبينم، و ناهێليت ئەز نڤێژ و رۆژيان بگرم.. ڤێجا تو چ فەرمان ل من دكەى؟).. ئينا پێغەمبەرى (سلاڤێت خودێ لێ بن) گۆتێ: (بۆچى تو پەمبى ب كار نائينى، بەلكى خوينێ بگريت)، گۆت: پترە ژ هندێ گۆت: (باشە پاتەيەكى بێخە بەر) گۆت: ژ هندێ پترە، گۆت: (جلكەكێ دى بكە بەر خۆ)، گۆت: ژ هندێ پترە خوينا من گەلەك دئێت. ئينا پێغەمبەرى (سلاڤێت خودێ لێ بن) گۆتێ: (ئەز دوو تشتان دێ بۆ تە بێژم هەچيا تو بكەى دورستە و تو چێتر دزانى، ئەڤە تشتەكە ژ شەيتانى دڤێت رۆژێت ژنان ل بەر بەرزەكەت (پێدڤيە ئەم بۆ شەيتانى نەهێلين)، شەش رۆژان ئان حەفتان خۆ بگرە پاشى سەرێ خۆ بشۆ و بيست و سێ رۆژان يان بيست و چاران و ب شەڤێت وانڤە نڤێژ و رۆژيان بگرە. ترمزى ڤەگێرايە، و خودێ چێتر دزانيت.
