ب / دڤێت ئەم بزانين ئێك ژ ئارمانجێت سەرەكى، يێت پێكئينانا هەڤژينيێ زارۆكن، هەر ژبەر هندێ ژى خودێ مەزن ژ مرۆڤى دخوازيت ئنيەتا خۆ ژ چۆنا نڤينا وى نەبەس تێركرنا هەوجەييا وى بيت، دبێژيت: ((فَالْآنَ بَاشِرُوهُنَّ وَابْتَغُوا مَا كَتَبَ اللَّهُ لَكُمْ )) ڤێ گاڤێ ژ ئێرە و پێدا شەڤێت رەمەزانێ هەرنە نڤينا هەڤسەرێت خۆ، و وێ بخوازن يا خودێ بۆ هەوە نڤێسى ژ دوينەهێ، و ديسا دبێژيت: ((نِسَاؤُكُمْ حَرْثٌ لَّكُمْ فَأْتُوا حَرْثَكُمْ أَنَّىٰ شِئْتُمْ وَقَدِّمُوا لِأَنفُسِكُمْ وَاتَّقُوا اللَّهَ وَاعْلَمُوا أَنَّكُم مُّلَاقُوهُ وَبَشِّرِ الْمُؤْمِنِينَ)) ژنێت هەوە زەڤينە بۆ هەوە جهێ شينكرنا دويندەهێنە، ڤێجا كا هەوە چاوا بڤێت هەرنە زەڤيا خۆ، هەرنە نڤينا ژنا خۆ، و كار و كريارێت باش بدەنە پێشيا خۆ، بەرى خۆ بهنێرن، و ژ خودێ بترسن و بزانن هوين هەر دێ گەهنە خودێ، و مزگينيێ بدە باوەرداران.
و هەرگاڤا پرۆژێ مرۆڤى هاتە دانان و دياربوو.. نابيت زێدەگاڤى ل سەر بێتەكرن، و دڤێت رێز لێ بێتەگرتن و حورمەتا خۆ هەبيت و بێ هێجەت و ئەگەر و دەستويرەكا شەرعى ب چو رەنگا نابيت ژن خۆ ژێ خلاس بكەت و ژ بەر خۆ ببەت، و هەكە وەكر يا گونەهكارە، نەخاسمە هەكە پشتى چل رۆژێت ئێكێ بيت و گونەه مەزنترە هەكە گەهشتە سەد و بيست رۆژان و پشتى حەملە دگەهيتە سەد و بيست رۆژان ب چو رەنگان نابيت بچويكى ژ بەر خۆ ببەت ژبلى هەكە نوژدارێت بسپۆر و تايبەتمەند و باوەرپێكرى بێژن: هەكە بچيك ببيت دێ دايك مريت و ژيانا دايكێ بن گەف و مەترسيەكا بێ گۆمان و ب دورستاهي بيت.. هنگى دورستە بچويك ژ بەر ژنێ بێتەبرن، و هەكە پشكنينان ب رەنگەكێ گۆمانبر دياركر بچويك ناچيت و نەيێ دورستە هەكە بەرى سەد و بيست رۆژان بيت دورستە ژن ببەت، بەلێ هەرگاڤا گەهشتە ڤى دەمى و ژێ بۆرى نابيت ئەو ژ بەر خۆ ببەت و بلا خۆ بهێليتە ب هيڤيا خودێڤە، دبيت خودێ كارەكى بكەت نەيێ چاڤەرێكرى و دلێ وێ خۆش ببيت خۆ ژێ خلاس نەكر، ئەڤ راستيە دگەل من ب خۆ رويدا، جارەكێ ژنەكێ تەلەفۆنا من كر، گۆت: سەيدا ئەز يا ب حالم و نوژدار دبێژنە من بچويكێ تە تەشابەتە و دڤێت تو ژبەر خۆ ببەى، و هەكە ژ بەر خۆ نەبەى ژى هەر نامينيت، من پسيار ژێ كر ئەڤە هەيڤا چەندە؟ گۆت: هەيڤا پێنجێ بۆرى، من گۆت: مادەم وەسايە خۆ سپێرە خودێ و پشتا خۆ ب وى گەرمكە و خۆ ب هيڤيا ويڤە بهێلە بەلكەى تشتەكێ دلخۆشكەر بۆ تە دورست ببيت، گەلەك دويف من درێژكر دا فەتوا ژ بەرخۆبرنێ بدەمێ، هەر من گۆتێ: بێهنا خۆ فرەهكە و تو خوسارەت نابى، و هەكە بوو و مر ئەڤە ژى دێ بۆ تە خێر هێتە نڤێسين، و من ئەڤ چيرۆكە ژبيركر، پشتى دەمەكێ درێژ ژنەكێ تەلەفۆنا من كر، گۆت: سەيدا.. تو من دنياسى؟ من گۆتێ ببۆرە.. گەلەك تەلەفۆنا دكەن و داخوازا بەرسڤێت شەرعى دكەن و ئەز نەشێم هەميان بنياسم، گۆت: ئەز ئەو ژنم يا من تەلەفۆنا تە بەرى دەمەكێ درێژ ژبەر بچويكێ د زكێ خۆدا كرى، سەيدا ب خودێ.. خودێ كچەكا دايە مە هندا جوانە.. هندا جوانە ئەز و بابێ وێ هەردوو دلناهێلين بەرێ خۆ بدەينێ، خودێ ژ تە رازى بيت، هەكە تو نەباى بێ گۆمان ئەم دا خۆ ژێ خلاسكەين. و چيرۆكەكا هۆسا دگەل زانايێ ناڤدار قەرزاوى رويدا خودێ ژيێ وى درێژكەت و ساخلەميا وى باشكەت، دبێژيت: ل ئەمريكا پسيار ژ من هاتەكرن ل سەر خۆخلاسكرنا بچويكەكێ ژيێ وى ژ سەد و بيست رۆژان بۆرى د زكێ دايكێدا، و گۆت: نوژدار دبێژن: نەيێ دورستە و دڤێت ژ بەر خۆ ببەى، بەلێ من گۆتێ: مادەم ژ سەد و بيست رۆژان بۆريە بهێلە ب هيڤيا خودێڤە و ژ بەر خۆ نەبە. دبێژيت: پشتى ئەز ڤەگەريايمە قەتەرێ و پشتى دەمەكى نامەك بۆ من هات ئەز ڤەدكەم وێنەكێ بچويكەكێ جوانە ل پشتا وى نڤێسە: مام.. ئەز سوپاسيا تە دكەم، هەكە تو نەباى ئەز نەدهاتمە سەر دنيايێ، دەركەفت ئەو بچويكێ نوژداران گۆتيێ دڤێت نەهێلى چونكى نەيێ دورستە، و خودێ چێتر دزانيت.
