ب / هندى تشت د دلێ مرۆڤيدا بيت و نەدەرێخيت نەيێ گونەهكارە، بلا د دلێ ويدا بغولغوليت ژى، و هزرا خۆ تێدا بكەت، و هەست و هايێت ئەڤەينێ نە ب دەستێ مرۆڤينە، دا دەستەسەر بكەت، كچا هۆسا نەيا گونەهكارە، د بوخارى و موسلمێدا هاتيە، پێغەمبەر (سلاڤێت خودێ لێ بن) دبێژيت: (إِنَّ اللَّهَ تَجَاوَزَ عن أُمَّتِي ما حَدَّثتْ بِهِ أَنْفُسَهَا ما لم تَعْمَلْ أو تَتَكَلَّمْ) ب راستى خودێ يێ ل ئوممەتا من بۆرى ژ وێ يا د دلێت خۆدا دبێژن هندى نەكەن يان پێ باخڤن. و دا ئەو ژ ڤى كراسێ دەروونى رزگار ببيت.. هەكە ئەو كورێ وێ هزرا خۆ دايە سەر يێ خودێناس و پارێزكار و كێرهاتى بيت، و ژبەر كێرهاتى و دينداريا وى حەزكەت شوى پێ بكەت، بۆ هەيە ئەو ب رێكەكێ حەزكرنا خۆ بگەهينيتێ، بەلێ ب مەرجەكى ئەڤ حەزكرنە درێژيێ نەدەتە خۆ و بكێشتە رێكێت خەلەت، و خودێ ژێ نەرازى، ئيمامێ بوخارى (خودێ ژێ رازی بیت)، ناڤ و نيشانێت بابەتەكى ب ڤى رەنگى ئينايە: (باب عرض المرأة نفسها على الرجل الصالح) بابەتێ خۆنيشادانا ژنێ بۆ زەلامێ كێرهاتى، و ئيمامێ نەوەوى (خودێ ژێ رازی بیت)، د شەرحا موسلميدا و ئبن حەجەر (خودێ ژێ رازی بیت)، د فەتحێدا و ئبن قەيم (خودێ ژێ رازی بیت)، د حاشيا ئەبو داووددا دبێژن: باشە ژن حەزا خۆ بۆ زەلامێ كێرهاتى دياركەت، بەلێ ئەز دبێژم: دڤێت رێكەكا وەسا بيت شەرما وێ كو سەرومالێ وێيە نەهێتە برينداركرن و حورمەتا وێ نەشكێت و ئەڤ حەزە درێژيێ نەدەتە خۆ بكێشيتە تشتەكێ دويماهيك نەباش و خراب، ڤێجا دياركرنا ڤێ حەزێ ب رێكا دايكێ بيت يان خويشكێ يان خالەتێ يان براي يان ب هەر رێكەكا ب ئنيەتا پاقژ سنوردايى، و خودێ چێتر دزانيت.
