ب / ئەڤە راستە و راست نينە، يا نەراست تێدا ئەوە زەلام حەديسا پێغەمبەرى (سلاڤێت خودێ لێ بن) ژ جهێ وێ دەربێخيت و تەعەسوفێ د مافێ خۆدا بكەت، و هەرگاڤا گازى ژنا خۆ بكەت بێژتێ ما تە گول پێغەمبەرى (سلاڤێت خودێ لێ بن) نەبوويە دبێژيت: هەكە زەلامى داخوازا ژنا خۆ بۆ هەوجەييا خۆ كر بلا بێتە دەف خۆ هەكە ل سەر تەنويرێ بيت. ئەڤ حەديسە بەحسێ وى دەمى دكەت يێ زەلام تێدا هەوجەي نڤينێ، و ژبەر هندێ داخوازا وێ دكەت نە بۆ هەر هەوجەييەكا هەبيت، گەلەك هزرا خۆ د ئاخفتنا پێغەمبەريدا بكە (سلاڤێت خودێ لێ بن): ( إِذا دعا الرَّجُلُ زَوْجتَهُ لِحَاجتِهِ فَلْتَأْتِهِ وإِنْ كَانَتْ عَلَى التَّنُّور) هزرا خۆ د (لِحَاجتِهِ) بۆ هەوجەييا خۆدا بكە دێ زانى كەنگى فەرە ژن ل دويف زەلامێ خۆ بهێت و هەرگاڤا زەلامى ژن داخوازكرە نڤينا خۆ نابيت ژن خۆ ڤەگريت هەكە چو هێجەت و دەستويريێت شەرعى نەبن، و هەكە خۆ ڤەگرت بێ ئەگەرەكێ شەرعي يا گونەهكارە، بەلێ هەكە ئەگەرەكێ شەرعى هەبيت بۆ هەيە نەهێت و نەهێليت زەلام بچيتە نڤينا وێ، ژ وان ئەگەران: هەكە يا نەساخ و نەخۆش بيت، يان د بێنڤێژياندابيت، يان د چلكاندابيت، يان يا ب رۆژى بيت رۆژيا فەرز، يان نڤين دێ بيتە ئەگەرێ زيانگەهاندنێ، يان دويفهاتنا وێ دێ بيتە ئەگەرێ ژێچۆنا ئەرك و فەرزەكى و دێ فەرزێت وێ ژ وێ بەت، هنگى هەكە ل دويف نەهات نەيا گونەهكارە، چونكى خودێ مەزن ئەمرێ زەلامان يێ كرى ئەو ب باشى سەرەدەريێ دگەل وان بكەن ((وَعَاشِرُوهُنَّ بِالْمَعْرُوفِ)) ئانكو و ب باشى و قەنجى دگەلدا بن و سەرەدەريێ دگەل بكەن، و ئەڤە نە ب باشيە ژن يا نەخۆش بيت ئەو بەرچاڤ نەوەرگريت يان ببيتە ئەگەرێ ژدەستچۆنا ئەرك و واجب و فەرزان، و خودێ چێتر دزانيت.
