ب / هەكە وەبيت وەكى تو دبێژى و تو يا پەشێمانى و د ترس و شەرمێت خودێدا و نە د ترس و شەرم و لۆمەييا دنيايێدا، پشت راستبە خودى دێ ل تە بۆريت، چونكى پەشێمانى تۆبەيە، هەروەكى پێغەمبەر (سلاڤێت خودێ لێ بن) دبێژيت: (الندم التوبە)، تۆبەبكە خودێ دێ تۆبا تە قەبويلكەت و زێدەى ڤێ هەكە تو د تۆبا خۆدا يا راست بى دێ گونەهێت تە ب باشيان گوهۆريت، خودێ مەزن دبێژيت: ((وَالَّذِينَ لَا يَدْعُونَ مَعَ اللَّهِ إِلَٰهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَن يَفْعَلْ ذَٰلِكَ يَلْقَ أَثَامًا))(( يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا))(( إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَّحِيمً))(( وَمَن تَابَ وَعَمِلَ صَالِحًا فَإِنَّهُ يَتُوبُ إِلَى اللَّهِ مَتَابًا)) و ئەوێت ژبلى خودێ، دوعايان ژ كەسێ دى نەكەن و نەپەرێسن و ئەو مرۆڤێ خودێ كوشتنا وى دورست نەكرى، و ب هەقى نەبيت كو بەرانبەر ئێكێ دى بێتە كوشتن ناكوژن، و زنايێ و دەهمەنپيسيێ ناكەن، و هەر كەسێ ڤان بكەت، دێ گونەه ل سەر ستوير بن، و دێ پێ ئێتە جزاكرن. رۆژا قيامەتێ ئيزا دێ ل سەر بيتە دوقات، و هەروهەر دێ رەزيل و شەرمزار تێدا مينيت، چونكى گونەه ژى دا دگەل گاوريێ. ژبلى وى يێ تۆبەكرى و باوەرى ئينايى و كار و كريارێت راست و قەنج كرين، ئەڤێت هۆسا، خودێ دێ گونەهێت وان كەتە خێر، ئانكو دێ گونەهێت وان ژێبەت، و خێران دێ ل جهێ وان دانيت، و خودێ ب خۆ گونەه ژێبەر و دلۆڤانە.
ڤێجا خويشكا هێژا.. ئەو هزرا بۆ تە چێدبيت خۆ بكوژى ژبەر گونەهێت خۆ هزرەكا خەلەتە و ژبەرێ شەيتانيڤەيە، چونكى ترسا گونەهان دڤێت مە پالدەن بۆ تۆبێ و كرن و زێدەكرنا خێران، و چەند گونەه بێتە بيرا من هند ئەز بۆ خێرا گەرم ببم و خێران ل خۆ زيدەكەم، نە هزرەكا شەيتانى من بگريت ئەز هزرا كوشتنآ بكەم، و هەكە ئەم د تۆبا خۆدا د راست بين خودێ دێ مە پارێزيت، و مە شەرمزار ناكەت و پەردێ ل سەر مە ناراكەت، نە ل دنيايێ و نە ل ئاخرەتێ، چونكى هەروەكى ئبن عەباس (خودێ ژێ رازی بیت) ژ پێغەمبەرێ خودێ (سلاڤێت خودێ لێ بن) ڤەدگوهێزيت: خودێ حەژ ستارەكرنێ دكەت، دێ تۆبەداران ستارەكەت و شەرمزار ناكەت، ڤێجا بلا نەترسن بەس هەكە د تۆبا خۆدا د راست و دورست بن.
و هەكە ترسا تە ئەوە تو نەشێى شويكەى ژبەر وى تشتێ تە ژ دەستدايى هەكە تو د تۆبا خۆدا يا راست و دورست بى و بۆ خودێ بيت و پەشێمانيا تە راست و دورست بۆ خودێيە.. بۆ چو تشتێ دى نينە، تو دشێى كراسێ خۆ بۆ دايكا خۆ ب تنێ بێژى و تە ببەتە دەف نوژدارەكا تايبەت و پەردا تە چارەسەركەن و خۆ ستارەكەى و بپارێزى، و خودێ چێتر دزانيت.
