ب / كارئينانا دەستى بۆ ئينانەخوارا ئاريانا دلى، جمهورێ زانايان دبێژن: حەرامە و نەدورستە، و يێت ل سەر ڤێ بۆچۆنێ مالكى و شافعينە و باراپتر ژ حەنەفيان و بەلگەيێ وان خودێ مەزن دبێژيت: ((وَالَّذِينَ هُمْ لِفُرُوجِهِمْ حَافِظُونَ))(( إِلَّا عَلَىٰ أَزْوَاجِهِمْ أَوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ))(( فَمَنِ ابْتَغَىٰ وَرَاءَ ذَٰلِكَ فَأُولَٰئِكَ هُمُ الْعَادُونَ)) و ئەوێت دەهمەن پاقژ و نامويس پارێز، بۆ هەڤسەرێت خۆ نەبن، يان جاريێت خۆ، و د ڤێدا ل وان نائێتە گرتن، و هەركەسێ د سەر ڤانرا دەرباز ببيت، ئانكو: ژ هەڤسەر و جاريا خۆ زێدەتر بچيت، ئەو زۆردار و ستەمكارە، ب راستى ئەڤە ئەون يێت ژ تخويبێ خودێ دەركەفتين.
و هەكە ئەڤ كارە يێ دورستبا دا پێغەمبەر (سلاڤێت خودێ لێ بن) بەرێ مە دەتێ دەمێ گۆتيە گەنجان ـ كچ و كوران ـ يێت شيان ب رەنگەكێ گشتى هەبن هەروەكى د ڤەگێرا بوخارى و موسلميدا هاتى: (يا مَعْشَرَ الشَّبَابِ من اسْتَطاعَ الْبَاءَە فَلْێتَزَوَّجْ فإنه أَغَض لِلْبَصَر وَأَحْصَنُ لِلْفَرْجِ وَمَنْ لم يسْتَطعْ فَعَلَيْهِ بِالصَّوْمِ فإنه له وِجَاءٌ) گەلى گەنجان (كچ و كوران) يێ شيان هەبن كچ بيت كور بيت بلا هەڤژينيێ بكەت، ب راستى ئەڤە باشتر چاڤى دگريت و نامويسێ پاك رادگريت و يێ نەشێت بلا رۆژيان بگريت، ب راستى رۆژى بۆ پاشڤەبرە.
كارئينانا دەستى يا دورستبا وەكى هندە زانايێت مالكى دبێژن دا پێغەمبەر (سلاڤێت خودێ لێ بن) بەرێ مە دەتە وێ، ئەو ژ ژن ئينان و شويكرنێ ب ساناهيترە، و دەمێ بەرێ مە نەدايێ و بەرێ مە دايە تشتەكێ ب زەحمەتتر دا مە ژ خەلەتيێ پاشڤە ببەت ئەڤە دياردكەت ئەو كارئينانا دەستى بۆ ئينانەخوارا ئاريانا دلى نە يا دورستە، و زانستێ نوژداريێ ژى دبێژيت: ڤى كارى زيانێت خۆ يێت هەين، يێت لەشى و يێت دەروونى و يێت جڤاكى، لەشى خاڤ و سست دكەت و خەمۆكيێ دورست دكەت و مرۆڤى ژ ئەرك و واجبان سست و دوير دكەت، و دبيتە ئەگەرێ لاوازيا مێرينيێ ل دەف زەلامى پشتى ژنئينانێ، و دبيتە ئەگەرێ هندێ ژن هەست ب خۆشيا نڤينێ وەكى پێدڤى نەكەت، و دبيت ببيتە ئەگەرێ نەمانا پەردا كچينيێ و ئەڤە ب سەرێ گەلەكان يا هاتى، و شەنگستێ سەرەكى د شەريعەتيدا ئەوە هەر تشتێ زيان و زەرەرێت وێ پتربن، و ب زانين ئاشكرا بوو ئەو تشت زيانكارە، ئەو تشت نەيێ حەلالە و نەدورستە، ڤێجا ئەڤ عەدەتێ نهێنى ژ ڤى رەنگيە يێ زيان و زەرەر لێ ئاشكرابووين، ڤێجا نەيا دورستە، و زانايێ ناڤدار زەرقا د راستا واندا ئەڤێت دورستكرين دبێژيت: هەمى ئێكن د بنياتدا ئەڤ كارە يێ خەلەتە و نەيێ دورستە، هەتا هندە حەنەفى و حەنبەلى ژى ل سەر ڤێ بۆچۆنێنە كو د بنياتدا نەيێ دورستە و دورست نابيت ب سێ مەرجان نەبيت:
ئێك: نەيا شويكرى بيت يان نەيێ ب ژن بيت، هەكە هەڤژينى پێك ئينابيت دڤێت ئەو ب رێكا هەڤدو يا د دلێ خۆدا بشكێنن.
دوو: بترسيت، ترسەكا بێ شك و گۆمان هەكە ڤى كارى نەكەت دێ كەڤيتە د زنايێدا و هەر ژ زنايێ و هەر ژ ڤى كارى.. نە ، ئەڤ كارە و نە زنا.
سێ: دەمێ ب ڤى كارى رادبيت مەخسەد پێ خۆشى نەبيت، بەلكى مەخسەد پێ شكاندنا گر و ئاريانا د دليدا بيت، و خودێ چێتر دزانيت.
