ب / هەكە ژن كەفتە د ژڤاناندا دڤێت هاتن و چۆنێ و دەركەفتنێ نەكەت هەروەكى بەرى هنگى دكر و دڤێت ڤى دەمى بەرچاڤ وەرگريت و كريارێت خۆ تخويبداى بكەت، چونكى دبيت هێژ پەيوەندى ب رەنگەكى ژ رەگان ب زەلامێ خۆڤە مابيت هەكە د ژڤانێت بەردانێدا بيت و ژبەر رێزگرتنا زەلامى هەكە د ژڤانێت مرنا زەلاميدا بيت، بەلە ئەڤە وێ ناگەهينيت بێتە زيندانكرن و د بنيرا نەدەركەڤيت، بۆ هەيە بۆ پێدڤيا دەركەڤيت و بهێت و بچيت بەلێ د تخويبێ پێدڤى و هەوجەيياندا.. چ هەوجەييێت بەردەستى (مادي) بن يان يێت دەروونى، و هەكە يا خودان كار بيت وەكى فەرمانبەريێ يان كارەكێ پيشەيي هەبيت وەكى دورينكاريێ بۆ هەيە بۆ كارێ خۆ دەركەڤيت و هەكە سەبرآ وێ نەهێت و خەريب ببيت بۆ هەيە دەركەڤيت خەربيێت خۆ ژبيرڤەببەت. جابرآ كورآ عەبدوللاى (خودێ ژێ رازی بیت) د ڤەگێرا موسلميدا دبێژيت: خالەتا من هاتە بەردان، د ژڤانێت خۆدا چۆ دا قەسپێت خۆ بچنيت، زەلامەكى نەهێلا دەركەڤيت هاتە دەف پێغەمبەرى (سلاڤێت خودێ لێ بن) گۆتێ: بەلێ هەرە بچنە بەلكى بكەيە خێر يان كارەكێ خێرێ پێ بكەى. و ئيمامێ نەوەوى (خودێ ژێ رازی بیت) د شرۆڤەكرنا ڤێ حەديسێدا دبێژيت: ئەڤە بەلگەيە ژنا د ژڤاناندا بۆ هەيە بۆ هەوجەييێت خۆ دەركەڤيت. و ئەڤە بۆچۆنا مالكى و سەورى و لەيس و شافعى و ئەحمەديە و گەلەكێت دى خودێ ژ هەميان رازى بيت، و ديسا ل دەف ئيمامێ بەيهەقى (خودێ ژێ رازی بیت) هاتيە ئەو ژنێت زەلامێت وان د ئوحودێدا هاتينە شەهيدكرن هاتنە دەف پێغەمبەرى (سلاڤێت خودێ لێ بن) گۆتن: يا پێغەمبەرێ خودێ سەبرێ مە ب تنێ ناهێت ب شەڤ بچينە دەف ئێك هەتا دەمێ خەوێ دهێت هەرئێك ژ مە بچيتە مالا خۆ، پێغەمبەرى (سلاڤێت خودێ لێ بن) گۆتێ: بەلێ هەوە چەند ڤيا دگەلێك باخڤن و هەكە دەمێ خەوێ هات هەرئێك هەرنە مالا خۆ. و ژ ڤێ حەديسێ دهێتە زانين بۆ ژنێ هەيە دەركەڤيت چ هەوجەيى يا بەردەستى بيت يان يا دەروونى، و خودێ چێتر دزانيت.
