ب / پێنگاڤا ئێكێ: هەكە تو ئێكێ موسلمان و ديندار باش بنياسى و تو ببينى ئەڤە هەژيە ببيتە هەڤپشكێ ژيانا تە دورستە تو رێكەكێ ژ رێكان حەزا خۆ بگەهينيێ دا بهێت تە بخوازيت، و ئێكجار بەسە هەكە حەز هەبيت دێ هێت و رێكا دورست گريت، و هەكە حەز نەبيت دێ پاش گوهێت خۆڤە هاڤێت، و هەكە ڤيا رێكەكا خەلەت بگريت و ڤيا ڤێ گۆتنا تە دەرفەت وەرگريت و بكێشيتە پەيوەنديێت نەدورست ئەڤە تو د هەلسەنگاندن و بهاكرنا خۆدا يا خەلت بووى، هنگى دڤێت ئێكجارى بهێلى چونكى كێر ناهيت.
پێنگاڤا دووێ: بريارا خۆ زوى نەدەى و بۆ خۆ پسياركەى كا ئەڤ كورە يێ چاوانە، و بەرى هەمى تشتان پسيارا ديندارى و سنح و رەوشت و ئەخلاقێ وى بكە، و مشێورەتا جوامێر و كێرهاتي و دلسۆزان بكەى ئەوێت بزانن دەمێ ديتنا وان هاتە خواستن ئەو ژ خودێ بترسن وێ بێژنە تە يا ژێ دزانن، و هشياربى مشێورەتا مرڤێت وى نەكەى، چونكى مخابن ڤێ گاڤێ لاوازيا دينى يا وەل خەلكى كرى دويف بنەمايان ناچن، كەس نابێت دەوێ من ترشە هەكە يێ پر خەلەتى ژى بيت و كانيا خەلەتيان بيت دێ بێژنە تە يێ باشە. پسيارا هەڤالێت وى بكە كا هەڤالينيا كێ دكەت، چونكى ژ كەڤن وەرە عاقلداران يا گۆتى: نەبێژە من تو كى بێژە من تو هەڤالينيا كێ دكەى دێ بێژمە تە كا تو كى. پسيارا دايبابێت خۆ بكە هەكە د رازى بن، بێژێ: پێغەمبەرێ خودێ (سلاڤێت خودێ لێ بن) بەرى بێژيتە مە كچان، دبێژيتە هەوە: (إذا جاءكم من ترضون دينه وخلقه فأنكحوه إلا تفعلوه تكن فتنە في الأرض وفساد عريض) گەلى دايبابان و سەركارێت كچان هەكە ئەو هات كچێت هەوە بخوازيت يێ هوين ژ دين و ئەخلاقێ وى رازى بدەنێ و هەكە وەنەكەن دێ بەلا و خرابيەكا مەزن د عەرديدا چێبيت. ئەرێ رازيبوونا هەوە سەر ڤى بنەمايە يێ پێغەمبەرێ خودێ (سلاڤێت خودێ لێ بن) گۆتى سەر بنەمايێ دين و ئەخلاقانە يان تشتەكێ دى! چونكى مخابن گەلەك دايباب ديتنا وان يا تەنگە و دير بەرێ خۆ نادەنە كاروباران و هزردكەن بەرژەوەندى و خێرا كچێ يا د هندێدا شوى ب ئێكێ زەنگين بكەت و بەس، و هزرا قيامەتا ڤێ كچێ ناكەن، و هزرا زارۆكێت وێ ناكەن، ئەرێ ئەڤە كێر دهێت ببيتە بابەكێ باش و دێ زارۆكێت باش بۆ پەروەردەكەت كو ببنە خێرەكا ب رێژ و بەردەوام پشتى دايبابان.
پێنگاڤا سيێ: ئستيخارێ بكە، خۆ هەكە يێ باش ژى بيت ئستيخارێ ژبيرنەكە، و رامانا ئستيخارێ ئەڤەيە ئەم دوعا ژ خودێ بكەين خودێ وێ بكەت و ساناهي بكەت يا خێرا مە تێدا چ چێبوون چ نەچێبوون و دوعايەكا تايبەتە پشتى نڤێژێ دهێتەكرن، و هەكە دلێ تە بۆ هەركارەكى رۆن بوو وى لايى بگرە خێرا د وێرێدا، و هەكە هەر تو دوودل مايى ئستيخارێ دووبارە و دووبارەبكە نەراوەستە هەتا دلێ تە ل سەر تشتەكى قايم دبيت و تو ژ دوودليێ دەردكەڤى، و ئستيخارێ ژبير نەكە خۆ هەكە يێ باش ژى بيت، ما كى ل سەر دنيايێ دگەهيتە پێغەمبەرێ مە يێ خۆشتڤى (سلاڤێت خودێ لێ بن) دەمێ گۆتيە زەيدى بۆ من زەينەبێ بخوازە و ئاخفتن گەهانديێ گۆت: ئەز چ ئاخفتنا نابێژم هەتا ئستيخارێ نەكەم. هەرچەندە زانا دبێژن كرنا زەينەبێ بۆ ئستيخارێ نە ژبەر هندێ بوو كا كيژ خێرترە شوى ب پێغەمبەرى (سلاڤێت خودێ لێ بن) بكەت يان نە، بەلێ مەخسەدا وێ ئەو بوو ترسيا ژ دەرهەقێ وى نەدەركەڤيت و تەخسيرى و كێماسيێ د ماف و حەقێ ويدا بكەت. و ئەم بهايێ ئستيخارێ نوزانين هەتا ئەم رامانا ئستيخارێ نەزانين، هەكە مە زانى دێ بۆ مە ئاشكرا بيت كا بەردەوام ئەم چەند هەوجەي ڤێ دوعايێنە و بەردەوام ئەم پێدڤى ئستيخارێينە.
رامانا ئستيخارێ ئەوە خواستنا داخوازا خێرێيە ژ خودێ، ئەرێ ئەم بەردەوام د كاروبارێت خۆدا پێدڤى نينين خودێ هاريكاريا مە بكەت، و خێرێ بێختە تێدا؟! ئەرێ بارا پتر ژ كار و كريارێت مە ئەم نەپێدڤى ڤێ دوعايێنە؟!، جابرێ كورێ عەبدوللاى (خودێ ژێ رازی بیت) دبێژيت: پێغەمبەرى (سلاڤێت خودێ لێ بن) د هەمى كاروبارێت مەدا ئستيخارە نيشا مە ددا هەروەكى سۆرەتەك ژ سۆرەتێت قورئانێ نيشا مەددا. و ئەڤ نڤێژە ل وى دەمى دئێتەكرن دەمێ مرۆڤ دكەڤيتە د ناڤبەرا دوو بريارێن ژێك جودادا و مرۆڤ نوزانيت كيژ وان بكەت، ب مەرجەكى ئەو تشتێ مرۆڤ تێدا دوودل نە ژ واجيباتان بيت، چونكى تشتێ واجب نابيت مرۆڤ ل سەر يێ دوودل بيت، بەلێ هەكە تشتەكێ نەيێ واجب بيت و مرۆڤ نەزانيت و بۆ مرۆڤى ديار نەبوو كا چ بكەم خێرترە هنگى دێ نڤێژا ئستيخارێ كەت دا سەرێ خێرێ بۆ مرۆڤى ئاشكرا ببيت، چونكى رامانا ئستيخارێ ئەوە: رەئيا خێرێ گەل مرۆڤ نەزانيت ، ڤێجا دڤێت خودێ ژ هەردوو رەئيان دلێ وى بێخيتە سەر رەئيا خێرێ، و بۆ وێ رەئيێ دلێ وى رۆنكەت. بۆ نموونە: ئێك يێ كچێ دخوازيت و نوزانيت رازى بيت بۆ وى چێترە يان نە، هينگێ دێ ڤێ نڤێژێ كەت دا ل سەر ئێك رەئى راوەستيت. و ئەڤ نڤێژە دوو ركاعەتن، دەمێ كرنێ نەيێ دەستنيشانكريە، هەر دەمەكێ بێتەكرن دورستە. شيرەتا من: ل سێكا دويماهيا شەڤێ بێتەكرن چێترە، چونكى وى دەمى زهنا مرۆڤى يا زەلالە و خودايێ مەزن ژى دئێتە عەسمانێ دنيايێ و دبێژيت: كێ داخوازەك هەيە ئەز بۆ ب جه بينم. كێ دوعايەك هەيە ئەز قەبويل بكەم. پشتى دوو ركاعەت دئێنەكرن و سلاڤا ملان دئێتە ڤەدان خودانێ هەوجەيێ دێ ڤێ دوعايێ كەت: ((اللهم اني استخيرك بعلمك واستقدرك بقدرتك واسالك من فضلك العظيم فانك تعلم ولااعلم وتقدر ولااقدر وانت علام الغيوب، اللهم ان كنت تعلم ـ (ل ڤێرێ دێ هەوجەييا خۆ بێژى) ـ خير لي في ديني ومعاشي وعاقبە امري فاقدره لي ويسره لي ثم بارك لي فيه، اللهم ان كنت تعلم ـ (ل ڤێرێ دێ هەوجەييا خۆ بێژى) ـ شر لي في ديني ومعاشي وعاقبە امري فاصرفه عني واصرفني عنه واقدر لي الخير حيث كان)). هەلبەت كرنا ڤێ دوعايێ ب كوردى ژى بيت دورستە و ب ئانەهيا خودێ دێ خودێ دلێ وى ئێخيتە سەر وێ رەئيا د خێرا ويدا. بەلێ يا خەلەتە ئەم ڤێ دووعايێ ب كاروبارێت سەرەكى و چارەنڤيسڤە گرێدەين، هەر كارەكێ هەبيت واجب و ئەرك تێنەبن يێت دى هەمى يا باشتر ئەوە ئستيخارە بۆ بێتەكرن، چونكى كەس نوزانيت كا خێر دكرنێدايە يان د نەكرنێدا و يا باش ئەوە ئەڤ دوعايە پشتى نڤێژێ بێتەكرن و يێ نەشێت نڤێژێ بكەت چ يێ ب جەنابەت بيت يان ژن د عادێ و چلكاندا بيت دورستە بۆ خۆ دوعا ئستيخارێ بێ نڤێژ بكەن و دوعايێ تنێ بخوينن و بێژن، و مەرج نينە ب عەرەبى بێژن، دورستە ب كوردى دوعا ئستيخارێ بكەن. و ب ڤى رەنگى:
يا خودێ ئەز ب زانينا تە يا خێرتر ژ تە دخوازم، و ئەز شيانێ ب شيانا تە دخوازم، و ئەز داخوازێ ژ تە دكەم ژ كەرەما تە يا مەزن، ب راستى تو دشێى و ئەز نەشێم، و تو دزانى (كا خێرا من د كيرێدايە) و ئەز نوزانم و تو زانايێ نهێنيانى. يا خودێ هەكە تو بزانى ئەڤ كارە (... كارێ خۆ بێژە...) بۆ من د دينێ من و دنيا من و دويماهيا مندا چێترە بۆ من بنڤێسە و بۆ من ساناهى بكە، يا خودێ هەكە تو بزانى ئەڤ كارە (... كارێ خۆ بێژە...) بۆ من د دينێ من و دنيا من و دويماهيا مندا خرابترە.. ژ من بدە پاش و من ژێ بدە پاش، و خێرێ ب رزقێ من بكە هەرجهێ لێ بيت پاشى من ژێ رازيكە.
پشتى ڤان پێنگاڤان ئانەهيا خودێ بريار دێ يا خێرێ بيت و خێر دگەل وێ بريارێ بيت يا هاتيە وەرگرتن، و خودێ چێتر دزانيت.
