ب / مەحرەمێ ژنێ ئەوە يێ هەتا هەتا ل سەر حەرام و نابيت شوى پێ بكەت. و ئەگەرێت مەحرميێ ژى سێنە: بابينى و شيرخوارن و خزماتى، و مەحرەمێت ژنێ ژ ئەگەرێ بابينيێ ئەڤەنە:
ئێك: باب و باپير چ يێت دايكێ بن و چ يێت بابێ بن.
دوو: كور و نەڤى و هندى بچنە خوارێ و چ نەڤيێت كورا بن يان يێت كچا.
سێ: برايێت ژنێ چ يێت دايبابى بن يان يێت بابێ يان يێت دايكێ.
چار: برازا و خوارزا و هندى بچنە خوارێ، خوارزا و برازا و زارۆكێت وان و زارۆكێت زارۆكێت وان و هۆسا.
پێنج: مامێت ژنێ.
و مەحرەمێت ژنێ ژ ئەگەرێ شيرخوارنێ هەر ئەون يێت بابينيێ، چونكى پێغەمبەر (سلاڤێت خودێ لێ بن) دبێژيت: ((يحرم من الرضاعە مايحرم من النسب)) ئانكو: ب رێكا دەيبابان كا چ ل سەر مرۆڤى حەرام دبن خويشك و مەت و خالەت و برازا و خوارزا هۆسا ب رێكا شيرى ژى عەينى تشتى كچ و كورێت وێ ژنێ هەمى دبنە خويشك و برايێت مرۆڤى، و عەيالێ وان كچ و كورا دبنە خوارزا و برازايێت مرۆڤى، مەت و خالەتێت وان كچ و كوران دبنە خالەت و مەت بۆ مرۆڤى. ب كورتى مرۆڤ دبيتە كورێ وێ مالێ و هەمى عەيالێ وان دبنە خويشك و برايێت مرۆڤى.
و مەحرەمێت ژنێ ژ ئەگەرێ خزماتيێ:
ئێك: خەزويرێ ژنێ، بابێ زەلامى.
دوو: كورێت زەلامى، نەڤسيێت ژنێ.
سێ: زاڤايێ ژنێ، زەلامێ كچا وێ.
و مەحرەمێت ژنێ فەرمان و حوكمێ هەميان د سەرەدەريێدا ئێكە، بۆ وان هەيە دەستكەنە هەڤدوو و د جلكێت كاريدا هەڤدوو ببينن.. سەروچاڤ و پاتك و دەستان هەتا ئەنيشكێ و پێيان، و كا ژن چاوا سەرەدەريێ دگەل مەحرەمێت خۆ يێت بابينيێ دكەت وەسا بۆ هەيە هەر وێ سەرەدەريێ دگەل مەحرەمێت خۆ يێت شيرخوارنێ و خزماتيێ بكەت، و خودێ چێتر دزانيت.
