ب / ئەڤە دمينيتە سەر بنەمالێ هەكە چو نەخۆشى و ئێشێت ڤەگوهێز و ڤەگر تێدا نەبن چو تێدا نينە و دورستە د بنەمالێدا هەڤژينى بێتە پێكئينان. پێغەمبەرێ خودێ (سلاڤێت خودێ لێ بن) كچا مەتا خۆ زەينەب بۆ خۆ ئينا و مارەكر، و كچا خۆ فاتيما دا پسمامێ خۆ عەليێ كورێ ئەبى تالبى (خودێ ژێ رازی بیت)، بەلێ هەكە تو چو ژ مالا خۆ نەزانى كا ئەڤ رەنگێ ئێشا دەف باب و باپيران بابكالكان هەبوو يان نە.. هنگى بەرێ خۆ بدە نوژدارا و پشكنينێن پێدڤى بكە و بريارا خۆ بدە، بەلێ زانست مرۆڤى شيرەت ناكەت ئەو شوى يان ژنێ ژ مرۆڤێت خۆ بينيت، چونكى هەكە ئێش د زنجيرا بابينيا واندا هەبن ب ساناهي يان ب زويتر دێ د زارۆكێت واندا دياربيت، و ئەڤە چەند يا بەرچاڤ و بەردەستە كەس نەشێت نەوەيى بدانيت، و هندە حەديسێت لاواز ژى ل سەر ڤێ چەندێ يێت هاتين باشترە ئەو مرۆڤ ژ بيانيا بينيت و شوى ب بيانيان بكەت، وەكى ڤێ حەديسێ: (اغتربوا، لا تچووا) ئانكو: ژنان ژ بيانيان بينن و زارۆكێت خۆ بەرهنگارى لاوازيێ نەكەن، هەرچەندە ئەڤ حەديسە يا لاوازە و يا بێ سەندە، بەلێ ژ ئبن ئەبى مەليكە هاتيە عومەرێ كورێ خەتابى (خودێ ژێ رازی بیت)، گۆتە بنەمالا سائب و د لاوازبوون: (قد اضويتم فانكحوا النوابغ) هوين يێت لاوازبووين ژنان ژ بيانيان بينن، بەلێ يا فەر ئەوە چ ژ بيانيان بن يان ژ كەس و كاران بيت فەرە ئەم دين و ئەخلاقى ژبيرنەكەين. و ل سەر ڤى بنياتى بهەلبژێرين، چونكى پێغەمبەر (سلاڤێت خودێ لێ بن) دبێژيت كوران هەروەكى د بوخارى و موسلميدا هاتى: (تُنْكَحُ المَرْأَة لأَرْبعٍ: لِمالِهَا، وَلِحَسَبِهَا، وَلِجَمَالِهَا، ولِدِينِهَا، فَاڤفَرْ بِذاتِ الدِّينِ تَربَتْ يدَاك) ژن بۆ چار تشتان دئێتە مارەكرن: بۆ مالێ وێ و بۆ مالباتا وێ و بۆ جوانيا وێ و بۆ دينێ وێ، بگەهە يا خودان دين (هەكە تە وەنەكر و ل سەر ڤى بنياتى ژن نەهەلبژارت) دەستێت تە ب ئاخێ بكەڤن و هەژار ببى. و ژ ڤێ حەديسێ ديار دبيت خەلك بارا پتر ژنێ ژبەر ڤان هەرچار خاسلەتان دهەلبژێرن، ڤێجا تو ل سەر يا خودان دين رژدبە (چ يا نێزيك بيت يان يا بيانى بيت) و وێ بگەهينە خۆ و ل سەر هەڤالينيا وێ يێ رژدبە. ديسا هەروەكى د موسلمێدا هاتى دبێژتێ: (الدُّنْيا مَتَاعٌ، وَخَيْرُ مَتاعهَا المَرْأَة الصَّالحة) ئانكو: دنيا خۆشيەكا بەروەختە، و باشترين خۆشيا دنيايێ ژنا باشە. و دبێژيتە كچان: (إضا جاءكم من ترضون دينه وخلقه فأنكحوه إلا تفعلوه تكن فتنە في الأرض وفساد عريض) گەلى كچان.. هەكە ئەو هات هەوە بخوازيت يێ هوين ژ دين و ئەخلاقێ وى رازى شوى پێ بكەن و هەكە وەنەكەن دێ بەلا و خرابيەكا مەزن د عەرديدا چێبيت. پێغەمبەرى (سلاڤێت خودێ لێ بن) سێ جاران ئەڤ ئاخفتنە دوبارەكر ، و خودێ چێتر دزانيت.
