ب : پێدڤیه ژیانا مه هه‌می و هه‌می كاروبارێت ژیان ل دویف مه‌نج و به‌نامێ خودێ بن و دڤێت شه‌ریعه‌ت دهه‌می كاروبارێت مه‌دا حاكمدار بیت هه‌كه ئه‌م خو موسلمان ب دانین و نابیت دنڤێژاند ئه‌ز موسلمان بم و ل دویف شه‌ریعه‌تی ئه‌ز نڤێژان بكه‌م و د به‌لاڤكرنا میراتیدا نه موسلمان بم و ب كه‌یفا خۆ بم كا چاوا د نڤێژێدا ئه‌ز یێ ئازاد و ب كه‌یفا خۆ نینم، دڤێت وه‌سا بكه‌م وه‌كی د شه‌ریعه‌تیدا هاتی، هوسا دڤێت بزانم دمیراتیدا ژی ئه‌ز نه یێ ئازاد و بكه‌یفا خۆ مه، دڤێت وه‌سا بێته لێكڤه‌كرن وه‌كی خودایێ مه‌زن د قورئانا خۆ یا پیروزدا ئاشكرا كری، و ئه‌ڤه فه‌رمانه له‌وا خودایێ مه‌زن دبێژیت : (لّلرّجَالِ نَصيِبٌ مّمَّا تَرَكَ الْوالِدانِ وَالاْقْرَبُونَ وَلِلنّسَاء نَصِيبٌ مّمَّا تَرَكَ الْوالِدانِ وَالاْقْرَبُونَ مِمَّا قَلَّ مِنْهُ أَوْ كَثُرَ نَصِيباً مَّفْرُوضاً) زه‌لامان د وی مالێ دایبابان و كه‌س و كاران ب پاش خۆڤه هیلایی بار و پشك هه‌نه، و ژنان ژی ژ وی مالێ دایبابان وكه‌س و كاران پاش خۆڤه هێلایی پشك و بار هه‌نه، چ كێم چ زێده پشكه‌كه به‌ری خودێڤه هاتیه دانان.
و دایكا ته یا گونه‌هكاره و ئه‌و ب ڤێ چه‌ندێ دده‌ته سه‌ر فه‌رمان و توخیب و سنورێت خودێ، له‌وا خودایێ مه‌زن دویماهیكا ئایه‌تێت میراتێدا دسوره‌تا نیسائدا پشتی پشك و بار و فه‌رمان و ئه‌حكامێت گریدایی میراتێ دیاره‌كرین دبێژیت : (تِلْكَ حُدُودُ اللَّهِ وَمَن يُطِعِ اللَّهَ وَرَسُولَهُ يُدْخِلْهُ جَنَّاتٍ تَجْرِى مِن تَحْتِهَا الاٌّنْهَرُ خَالِدِينَ فِيهَا وَذالِكَ الْفَوْزُ الْعَظِيمُ وَمَن يَعْصِ اللَّهَ وَرَسُولَهُ وَيَتَعَدَّ حُدُودَهُ يُدْخِلْهُ نَاراً خَالِداً فِيهَا وَلَهُ عَذَابٌ مُّهِينٌ) ئه‌ڤه فه‌رمان و توخیبێت خودێنه د به‌لاڤكرنا میراتیدا یێ گوهداریا خودێ و پێغه‌مبه‌رێ وی بكه‌ت، و ل دویف فه‌رمانێت خودێ د به‌لاڤكرنا میراتیدا بچیت، دێ خودێ وی ب به‌حه‌شتێ خه‌لاتكه‌ت و هه‌ر و هه‌ر دێ تێدا بیت، و ئه‌ڤه‌یه سه‌ركه‌فتن و سه‌رفه‌رازیا مه‌زن، ویێ گوهداریا خودێ و پێغه‌مبه‌ری نه‌كه‌ت و فه‌رمانێت وی د میراتیدا ب جهـ نه ئینیت دێ وی ئێخیته ناڤ ئاگریدا و هه‌ر و هه‌ر دێ تیدا بیت، و ئیزایه‌كا رسواكه‌ر بۆ وییه.
ڤێجا زرباركرنا كچێ ب هجه‌تا یا شوی ب ئێكێ بیانی كری، ئاخفتنه‌كا پویچ و بێ بنه‌مایه، و به‌س ئه‌و ڤێ دده‌نه به‌ر رویێ خۆ؛ دا نه ده‌نێ هه‌كه نه، بۆچی ئه‌و كچا شوی ب پسمامی خۆ كری زرباردكه‌ن، و بوچی كچا هێژ نه شكیر زرباردكه‌ن، هیڤیا من ئه‌وه خودێ مه ب زڤرنیته فه‌رمانا خۆ زڤرینه‌كا جوان، و دورستاهی ل به‌ر هه‌می فه‌رمانیت خودێ بین و ئیسلامێ هه‌میێ وه‌رگرین و پارچه پارچه نه‌كه‌ین و خودێ چێتر دزانیت.
