ب : مه‌هرا ژنێ كێم بیت یان زێده‌بیت مافه‌كێ تایبه‌تێ ژنێیه، و كه‌سێ ژ بلی ژنێ حه‌ق و ماف تێدا نینه، نه بابێ و نه برایی و نه زه‌لامێ ژنێ، و بۆ كه‌سێ نینه مه‌هرا وێ بێ یی وێ بخۆت، و ده‌ستێ خۆ درێژكه‌ته سه‌ر، كی بیت؛ له‌وا خودایێ مه‌زن فه‌رمانا زه‌لامان و كه‌س و كارێت ژنێ ژ دایباب و برایان و هه‌ڤژینان دكه‌ت، مه‌هرێت ژنان ب ده‌نێ، و دڤێت ڤێ دانێ ب منه‌ت و قه‌نجی نه‌زانن، به‌لكی ئه‌رك و واجب بزانن خودایێ مه‌زن دبێژیت: (وَءَاتُواْ النِّسَآءَ صَدُقَاتِهِنَّ نِحْلَةً فَإِن طِبْنَ لَكُمْ عَن شَىْءٍ مِّنْهُ نَفْساً فَكُلُوهُ هَنِيئاً مَّرِيئاً) و مارا ژنان ب خۆشی بده‌نێ، و ھه‌که وان ژنان تشته‌ک ژ مارا خۆ ب خۆشی و ب دلێ خۆ، بۆ ھه‌وه ھێلا و گه‌رده‌نا ھه‌وه ئازا کر، ئێدی بخۆن، ل ھه‌وه حه‌لال بیت و نۆشی جان بیت. و ئه‌ڤ مارا زه‌لام دگرێبه‌ستا ماره‌كرنێدا دده‌ته ژنێ، مافێ وێیه و نابیت ئه‌و ل سه‌ر بكه‌ته منه‌ت؛ چونكی گرێبه‌ستا ل سه‌ر وی بنیاتی هاتیه گێران، و نا بیت ب خورتی و ب خاپاندن و حیل و حه‌واله و نه ب دلێ وێ ژێ بێته ستاندن، و هه‌كه ژ شه‌رماندا ته‌نازل ژ مه‌هرا خۆ كر، بۆ زه‌لامی حه‌لال نابیت، ئبن عه‌باس خودێ ژێ رازی د راڤه‌كرنا گۆتنا خودێدا دبێژیت: (فَكُلُوهُ هَنِيئاً مَّرِيئاً) بخۆن ل ھه‌وه حه‌لال بیت، و نۆشی جان بیت، هه‌كه نه ب زیان بیت، یان ب خاپاندنبیت، هه‌ر گاڤا زه‌لامی ب ئێك ژڤان رێكا ب زیانێ یان ب خاپاندنێ مه‌هرا ژنێ گه‌هانده خۆ، هنگی بۆ زه‌لامی حه‌رامه و نه دورسته، و هه‌كه زه‌لامێ ب رێكا زیانكرنێ یان خاپاندنێ یان ب هه‌ر رێكه‌كا دی نه یا دورست مه‌هرا ژنێ گه‌هانده خۆ، وی خیانه‌ت كر و گونه‌ھ كر، و مالێ ژنێ ژ مه‌هرێ بۆ حه‌لال نابیت چ مه‌هرا پێشیی (مقدم) یان یا پاشیێ بیت (مؤجل)، دڤێت هه‌ردووكان د ده‌مێ واندا بده‌تێ، چ یا كێم بیت یان گه‌له‌ك بیت، خودایێ مه‌زن دبێژیت: (وَإِنْ أَرَدْتُّمُ اسْتِبْدَالَ زَوْجٍ مَّكَانَ زَوْجٍ وَءَاتَيْتُمْ إِحْدَاهُنَّ قِنْطَاراً فَلاَ تَأْخُذُواْ مِنْهُ شَيْئاً أَتَأْخُذُونَهُ بُهْتَاناً وَإِثْماً مُّبِيناً وَكَيْفَ تَأْخُذُونَهُ وَقَدْ أَفْضَى بَعْضُكُمْ إِلَى بَعْضٍ وَأَخَذْنَ مِنكُم مِّيثَاقاً غَلِيظاً) و ئه‌گه‌ر ھه‌وه ڤیا ژنه‌کێ شوینا ژنه‌کا دی پشتی به‌ردانێ بینن، و ئێک ژ وان ھه‌وه ماله‌کێ مه‌زن ب ناڤێ مه‌ھرێ دابیتێ، چو ژ وی مالی ژێ نه‌ستینن ھوین وی مالی چاوا دێ ژ بێ به‌ختی و ب گونه‌ھه‌کا مه‌زن ژێ ستینن، ئه‌رێ چاوا ھوین دێ وی مالی ژێ ستینن، و ھوین چۆینه ده‌ڤ ئێکدو، و ھوین ب تنێ مایینه د گه‌لێک، و وه‌ختێ مه‌ھرکرنێ وان په‌یمانا موکوم ژ ھه‌وه ستاندییه. و نابیت ئه‌و گڤاشتنان ل سه‌ر ژنێ بكه‌ت؛ دا ده‌ست ژ مه‌هرا خۆ به‌رده‌ت، و هه‌كه وه‌كر یێ گونه‌هكاره، و ئه‌و مه‌هر بۆ وی نه یا حه‌لاله، و دڤێت زه‌لام نه‌كه‌ته د دلێ خۆدا ژی، مه‌هرا ژنێ نه ده‌تێ، یان رێكه‌كێ ب رێكا ب خاپینیت؛ دا مه‌هرا وێ نه ده‌تێ، مه‌یمونێ كوردی ژ بابێ خۆ جابانێ(گاڤانێ) كوردی دڤه‌گوهێزیت، دبیژیت: من گۆل پێغه‌مبه‌ری بوو سلاڤێت خودێ ل سه‌ربن گۆت: (أيما رجل تزوج امرأة على ما قل من المهر أو كثر ليس في نفسه أن يؤدي إليها حقها خدعها فمات ولم يؤد إليها حقها لقي الله يوم القيامة وهو زان) هه‌ر زه‌لامه‌كێ ژ نه‌كێ ماره‌بكه‌ت، ل سه‌ر ماره‌كا كێم یان یا گه‌له‌ك، و ل به‌ر نه بیت مارا وێ بده‌تێ، و خاپاند هه‌تا مری، و مارا وێ نه‌دایێ، دێ به‌رامبه‌ر خودێ راوه‌ستیت، و ئه‌و یێ خیانه‌ت لێ كری، و ئبن هه‌یته‌م د زوائیدێدا دبێژیت: طه‌به‌رانی د ئه‌وصه‌ط و صه‌غیرێدا ڤه‌گێرایه، و زه‌لامێت وی باوه‌رپیكرینه، و ژ خاپاندنێیه، زه‌لام ب هجه‌تا پارچا عه‌ردی، یان كرینا سه‌یارێ، یان كرینا خانی، ژنێ مه‌جبوركه‌ت بێی دلێ خۆ مارا خۆ ب ده‌ته زه‌لامی، و ئه‌و دان یا ب خورتی و ب زیان و ب خاپاندن مارا ژنێ بۆ زه‌لامی حه‌لال ناكه‌ت بلا ب هه‌ردوو ده‌ستێت خۆ ژی دابنه ڤێ.
