ب : ب راستی ئه‌ڤ مافه نه جهێ ئێك ده‌نگیێیه دناڤبه‌را زانایاندا، و ل سه‌رڤی مافی دژێك جودانه، ل ده‌ف گه‌له‌ک زانایان ئه‌ڤ کاره ل سه‌ر ژنێ نه‌واجبه، نه‌خاسمه ھه‌که ئه‌و ژ وان بیت یێت خزمه‌تا وێ د مالا وێدا دھاته‌کرن، و ئه‌و ب خزمه‌تا خۆ نه‌رادبوو، ھه‌که ب خزمه‌تێ رابوو باشه و ھه‌که پێ نه رابوو، زه‌لامێ وێ ئه‌و ماف نینه ل سه‌ر دانیت پێ راببیت، و ئه‌ڤه بۆچۆنا جمھورێ زانایانه ژ حه‌نه‌فی و مالکی و شافعی و حه‌نبه‌لیان، به‌لێ ل ده‌ف وان یا ھه‌ژیتر ئه‌وه ئه‌و ب خزمه‌تێ رابیت؛ چونکی ئه‌ڤه عه‌دتێ ل کاره و ژیان رێناکه‌ڤیت ھه‌که کار ب عه‌ده‌تێ به‌لاڤ و ل کار نه‌ھێته‌کرن، و زانا ئبن ته‌یمیه و ئبن قه‌یم و ھنده زانایێت دی وه‌کی سه‌وری و ئه‌بو به‌کر ئبن شه‌یبه و ئه‌بو ئیسحاقێ جوزجانی دبێژن خزمه‌تکرن ل سه‌ر واجبه و ب راستی دلێ من ژی دگه‌ل ڤێ بۆچۆنێیه چونکی به‌لگه و ده‌لیل پتر پشته‌ڤانیا ڤێ بۆچۆنێ دکه‌ن، ژ وان به‌لگه‌یان:
ئێک: د ڤه‌گێرا بوخاری و موسلمیدا ھاتیه: (أَنَّ فَاطِمَةَ أَتَتْ النبي صلی الله علیه وسلم تَسْأَلُهُ خَادِمًا وَشَكَتْ الْعَمَلَ فقال ما أَلْفَيْتِيهِ عِنْدَنَا قال ألا أَدُلُّكِ على ما هو خَيْرٌ لَكِ من خَادِمٍ تُسَبِّحِينَ ثَلَاثًا وَثَلَاثِينَ وَتَحْمَدِينَ ثَلَاثًا وَثَلَاثِينَ وَتُكَبِّرِينَ أَرْبَعًا وَثَلَاثِينَ حين تَأْخُذِينَ مَضْجَعَكِ) فاتیما کچا پێغه‌مبه‌ری سلاڤێت خودێ ل سه‌ربن، ھاته ده‌ف پێغه‌مبه‌ری سلاڤێت خودێ ل سه‌ربن داخوازا خزمه‌تکاره‌کی ژێ کر، و گازنده ژ شۆلی کر، پێغه‌مبه‌ری سلاڤێت خودێ ل سه‌ربن گۆت: ته ھه‌وجه‌ییا خۆ ل ده‌ف مه نه‌دیت، ئانکو: مه چو خزمه‌تکارێت زێده نینن بده‌ینه ته، باشه ئه‌ز به‌رێ ته نه‌ده‌مه تشتێ بۆ ته ژ خزمه‌تکاری چێتر ده‌مێ تو دچیه سه‌ر جھێت خۆ، سیھـ و سێ جاران خودێ مه‌زن بدانه (بێژه: الله اکبر) و سیهـ و سێ جاران خودێ ژ کێم و کاسیان پاک و پاقژ بکه (بێژه: سبحان الله) و سیهـ و سێ جاران شوکرا خودێ بکه (بێژه: الحمد لله).
جھێ به‌لگه‌یی پێغه‌مبه‌ری سلاڤێت خودێ ل سه‌ربن، نه‌گۆته کچا خۆ ما تو بۆچی شۆل دکه‌ی؟ ل سه‌ر ته نینه تو ب شۆلێ مالێ رابی و خزمه‌تێ بکه‌ی، و ل سه‌ر زه‌لامێ ته دکه‌ڤیت، و دڤێت ئه‌و ب شۆلێ مالێ رابیت و خزمه‌تکاری بۆ ته بگریت، به‌لکی دله دلیدا و به‌رێ وێ دا زکرێ خودێ؛ دا بێھنا خۆ پێ ل سه‌ر گرانیا شۆلی فره‌ھ بکه‌ت.
دوو: د ڤه‌گێرا بوخاریدا ھاتیه ئه‌سما کچا ئه‌بو به‌کری خودێ ژێ رازی بیت دبێژیت: زوبه‌یری ئه‌ز ماره‌کرم و وی چو مال و کۆله نه‌بوون، حێشتره‌ک و ھه‌سپه‌ک نه‌بیت من ئالف بۆ ھه‌سپێ وی دئینا، و ئاڤ ب حێشترێ دئینا، و شۆلێ وی دکر و ھه‌ڤیر دکر و نان دپات و شۆل دکر، و به‌رکێت قه‌سپا ژ ئاقاری دئینان، ھه‌تا ئه‌بو به‌کری خزمه‌تکاره‌ک بۆ من ھنارتی به‌لا ھه‌سپی ژ من ڤه‌کری، ھه‌روه‌کی ئه‌ز ئازاکریم.
رویێ به‌لگه وه‌رگرتنێ: ئه‌سمایێ ئه‌ڤ نه‌خۆشیه دبر و پێغه‌مبه‌ری سلاڤێت خودێ ل سه‌ربن و بابێ وێ ئه‌بو به‌کری، خودێ ژێ رازی بیت دزانی، و نه‌دگۆتنێ تو بۆچی خۆ دوه‌ستینی؟ ئه‌ڤه ل سه‌ر ته ناکه‌ڤیت و ل سه‌ر زه‌لامێ ته زوبه‌یری خودێ ژێ رازی بیت واجبه ڤان کاران ھه‌میان بکه‌ت.
سێ: دیسا د بوخاریێدا ھاتیه، جابرێ کورێ عه‌بدوللای خودێ ژێ رازی بیت دبێژیت: بابێ من مر، و حه‌فت کچ یان نه‌ھ کچ بۆ من ھێلان، و من بیژنه‌ک ماره‌کر، ئینا پێغه‌مبه‌ری سلاڤێت خودێ ل سه‌ربن گۆته من: ته ژن ئینایه یا جابر؟ من گۆت: به‌لێ یا پێغه‌مبه‌رێ خودێ، گۆت: کچه یان بیژنه؟ من گۆتێ: بیژنه یا پێغه‌مبه‌رێ خودێ، ئینا گۆته من بۆچی کچ نه‌دبوو ته تڕانه دگه‌ل کربان و وێ تڕانه دگه‌ل ته کربان، و ته که‌نیێ وێ ئینابا و وێ که‌نیێ ته ئینابا؟ جابر دبێژیت، من گۆت: بابێ من یێ مری و کچ یێت بۆ من ھێلاین و من نه‌دڤیا ئه‌ز ئێکا د ژیێ واندا بینم، من ئێک ئینا ب کاروبارێت وان رابیت، ئینا گۆت: بارک الله لک، ئانکو ته پیرۆز بیت.
رویێ به‌لگه‌وه‌رگرتنێ: پێغه‌مبه‌ری سلاڤێت خودێ ل سه‌ربن نه‌گۆتێ ما که‌نگی دورسته ئه‌و خزمه‌تا ته و خویشکێت ته بکه‌ت، به‌لکی گۆتێ (بارک الله لک) و جابری مه‌خسه‌دا خۆ بۆ پێغه‌مبه‌ری سلاڤێت خودێ ل سه‌ربن دیارکر ژی دڤێت ژنا وی ب خزمه‌تا مالێ راببیت و پێغه‌مبه‌ری سلاڤێت خودێ ل سه‌ربن په‌سندکر و پاشڤه نه‌بر و نه‌گۆتێ ئه‌ڤه نه‌یا دورسته.
چار: به‌لگه‌یێ چارێ عورف و عاده‌ت ل سه‌ر ھندێنه ژن ب خزمه‌تا خۆ و مالا خۆ و عه‌یالێ خۆ رادبیت.
