ب / ب راستى ئەز ب دەليڤە دبينم بێژمە بابێت كچان: تەقوا خودێ بكەن و ژ خودێ بترسن، كچێت هەوە ئەمانەتن دەف هەوە، و ئيرادە و حەزا خۆ يا هەى، و دڤێت هوين حەزكرنا وان پشت گوهێ خۆڤە نەهاڤێژن، و بزانن ئيسلامێ رێك نەدايە كەسێ ـ بلا باب ژى بيت ـ خورتيێ ل كچێ بكەت، و پێ ل حەزكرنا وێ بدانيت، و پشت گوهێت خۆڤە باڤێت، بەلگە ژى ئەڤەيە كچەك هاتە دەف پێغەمبەرێ خۆشتڤى (سلاڤێت خودێ لێ بن) بەلێ نەديت، ئينا چيرۆكا خۆ بۆ دايكا مە موسلمانان عائيشايێ (خودێ ژێ رازی بیت) ڤەگێرا، گۆت: بابێ من ئەز يا دايمە برازيێ خۆ و ب دلێ من نينە و دڤێت ب من بێ بهاييا خۆ راكەت، عائيشايێ گۆتێ روينە خوارێ هەتا پێغەمبەر (سلاڤێت خودێ لێ بن) دهێت و بێژێ، پێغەمبەر (سلاڤێت خودێ لێ بن) هات و گۆتێ، ئينا پێغەمبەرى (سلاڤێت خودێ لێ بن) فرێكرە دويف بابێ وێرا و گۆتە كچێ: ڤێ گاڤێ تو يا ب كەيفا خۆيى تە دڤێت لێڤە ببە، و تە دڤێت رازى ببە، ئينا كچێ گۆت: ئەز يا رازيمە ب وى تشتێ بابێ من بۆ من دڤێت، بەلێ من دڤيا ئەز نيشا كچ و ژنێت موسلمانان بدەم و وان ئاگەهداركەم كو كەسێ حەق نينە خورتيێ ل وان بكەت، و هەكە كچ ژ بچويكاتى ب ئێكى هاتە گۆتن چ كور خال بيت يان كور مەت يان كور مام دڤێت رەئيا وێ بێتە وەرگرتن، هەرگاڤا مەزن بوو كا يا رازيە يان نە و هەكە يا رازى نەبيت دڤێت خورتى لێ نەهێتەكرن، و هەركەسێ خورتيێ لێ بكەت يێ گونەهكارە چ باب بيت يان باپير يان هەر كەسێ هەبيت، و خودێ چێتر دزانيت.
