ب / دڤێت موسلمانان ب گشتى كەساتيەكا تايبەت هەبيت، و ب تايبەتمەنديا ئيسلامێ هاتبيتە ئاڤاكرن، كەساتيەكا وەسا بەردەوام پاراستنا سەربەخۆييا خۆ بكەت، و ئەڤ كەساتيە هەر بمينيت خالەكا ئاشكرا و بەرز د ناف كەساتيێت جۆرە و جۆردا، و د كەساتيێت ديدا نەحەليێت، چونكى يا وەرگرتيە ژ رەسانەتيا ئيسلامێ، ئەو رەسەناتيا پشتا خۆ نەدەتە هەڤچەرخى و نويخوازيێ، و دڤێت كچا موسلمان يا بەرنياس بيت، ب رێز و سەر و بەرێ خۆڤە، و ب سنج و رەوشتێ خۆڤە، و خالەك بيت د ناف رەگەزێ كچاندا، و كەساتيەكا نموونەيى بيت، و لاواز و چاڤلێكەر نەبيت، هەرجهێ بايێ لێدا ب وى رەخيڤە خوارببيت، دڤێت كچا موسلمان ژ هندێ مەزنتر بيت ببيتە ئێخسيرا چاڤلێكرنێ و ب كۆرەيي چاڤلێكرنێ بكەت، و بەرێ خۆ بدەتە رەگەزآ خۆ كا ئەو چ دكەن ئەو ژى بكەت، نە.. ئەڤە يا خەلەتە، ئيمان و باوەريا د دليدا پێدڤيە د گەش بن و سەركێش و ئاراستەكرنا وێ بكەن، مودێلا جادێ و گوهۆرينا جادێ كارلێكرنێ ل رەسەناتيا وێ يا موكم ناكەن دگەل كو رۆژا خۆ دژيت و ئاگەه ژ زەمان و چەرخێ خۆ و پێشكەفتنا ب خۆڤە دبينيت، هەيە. پشتى ڤێ ئەز دبێژم:
ئێك: دڤێت يا ئاشكرابيت ل دەف مە ئيسلام نە دژى جوانى و جوانكاري و پاك و پاقژيێيە، د سەحيحا موسلميدا هاتيە: (ان الله جميل يحب الجمال ) كاروبارێت خودێ هەمى د جوانن و خودێ حەژ جوانيێ دكەت، ئيسلام مە پال ددەت بەردەوام خەمێ ژ پاقژى و جوانيا خو بخوين، چ ژن چ زەلام، چونكى خودێ حەژ جوانيێ دكەت، رامانا وێ ئەوە دڤێت ئەم پويتەى بدەينە ڤێ چەندێ، و هەكە ژن يا شويكرى بيت، ل سەر پێدڤيە خۆ بۆ زەلامێ خۆ جوانكەت و بخەملينيت، و خودێ مەز دبێژتێ هەمى ژيێ خۆ جوانيا خۆ نيشا زەلامێ خۆ بدە نەبەس ژيەكێ ئاشكرا تنێ: (( وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاءِ بُعُولَتِهِنَّ)).
دوو: ئەو سالۆنێت ب رێڤەبەريا زەلامان، يان ب رێڤەبەريا ژنان و زەلام هاريكار تێدا.. ب چو رەنگان نابيت ژن قەستا ڤان سالۆنان بكەت، و هەكە چۆ وان سالۆنان يێت زەلام تێدا رێڤەبەر يان هاريكار ئەو يا گونەهكارە و بێ ئەمريا خودێ و پێغمبەرێ وى دكەر و ئەڤە نە جهێ دان و ستاندن و نيقاشێيە.
سێ: ئەو سالۆنا كچا نەموسلمان ب رێڤە دبەت، ڤێجا چ دين بيت نەدورستە ئەو شەرمينگەها خۆ ل دەف وێ ئاشكراكەت، چونكى خودايێ مەزن دورستكريە ژنا موسلمان شەرمينگەها ژنا موسلمان ببينيت، نە يا نەموسلمان، و باراپتر تەفسيرزان خودآ ژ وان رازى بيت دبێژن: مەخسد ژ گۆتنا خودێ ((أَوْ نِسَائِهِنَّ)) ژنێت موسلمانن، ژبەر كو ئەڤێت دى نەيێت باوەريێنە، و دبيت دێ رەوشا وێ كەت و جوانيا وێ ل جهێت نەهەژى دێ ژێ خەبەردەت.
چار: ئەو سالۆنا كاروبارێت نەدورست تێڤە دهێنەكرن، و جوانكاريەكا نەيا شەرعى دهێتەكرن، و بلا ب رێا ژنان ژى بيت، و ئەو ژن موسلمان ژى بن، بەلێ مادەم ل دەف وێ حەلال و حەرام د فەرهەنگا وێدا نينە، و ب هەمى رەنگێت جوانكاريێ رادبيت؛ نەدورستە چۆنا ڤان سالۆنان بێتەكرن، چونكى دبيت گەلەك جاران ئەو ل دەف خۆ ژبەر كو حەلال و حەرام ل دەف وێ نەفەرە و نەگرنگە هندە رەنگێت جوانكاريا حەرام دێ بۆ ژنا موسلمان هەلبژێريت، و ديسا ئەڤێت دهێنە ڤان سالۆنا باراپتر ئەون يێت پێگرى سڤك و خەما وان نەحەراميە ، جارەكێ دوو جاران دبيت كچا موسلمان د بەر خەلەتيێرا ببەن و بەرێ وێ بدەنە خرابيێ وێ هاى ژ خۆ نە، و كورت و كرمانج يێ تێكەليا خرابان كر و ل ديوانێت وان روينشت بلا گەلەك ژ خۆ پشت راست نەبيت، خۆ راگريت و وەكى وان لێ نەهێت و دكەڤندا يا هاتيە گۆتن: نەبێژە من تو كى، بێژ من هەڤالێت تە كينە ئەز دێ بێژمە تە تو كى. و مخابن باراپتر هەكە نەبێژين هەمى سالۆنێت مە ژ ڤى رەنگينە ئەڤێت ئەڤرۆ هەين، ژبەر هندێ ئەز كچ و ژنێت موسلمان شيرەت ناكەم بچنە ڤان رەنگە سالۆنان بەلكى ئەز وان شيرت دكەم و ب دلسۆزى ئەو چۆنا ڤان سالۆنان نەكەن.
پێنج: هەكە سالۆن هەبن ب رێڤەبەريا ژنان ب تنێ و زەلام ناچنێ و بۆ كارێ خۆ رێكێت شەرعى يێت جوانكاريێ پێڤەتر ناوەرگرن و مكياج و جوانكاريا حەرام ناكەن و ئەو ب خۆ ژى يێت باوەريێنە و باراپتر ئەوێت قەستا وى جهى دكەن د باشن خودانێت خۆ و باشيێنە.. چو نينە، دورستە ژن بچيتە ڤان جهان، و خودێ چێتر دزانيت.
