ب / ئەم نابێژينە ڤان خويشكان هەما دەرسۆكێ نەكەنێ باشترە، نە.. نەخێر ئەم وەنابێژينێ، بەلكى ئەم دبێژينێ دەستێت تە خۆش بۆ وێ پێنگاڤا نەيا تمام تە هاڤێتێ، پێدڤيە تو تمامكەى و وى رەنگێ دەرسۆكێ بكەيێ خودێ ژ خۆ رازيكەى. و دويف شەريعەتێ ئيسلامێ نابيت پرچا ژنێ دەركەڤيت و دڤێت حەفكا وێ يا ڤەشارتى بيت، و ئەز نابێژمە تە ئەڤە ئەمرێ پێغەمبەرێ خۆشتڤى تنێيە (سلاڤێت خودێ لێ بن)، بەلكى ئەمر و فەرمانا خودێيە پاشى يا پێغەمبەرێ وى (سلاڤێت خودێ لێ بن)، و دەمێ تو دورست دەرسۆكا خۆ نەكەيێ تو بێ ئەمريا خودێ و پێغەمبەرێ وى (سلاڤێت خودێ لێ بن) دكەى، و ئەز دبێژم هەكە تو بزانى ئەڤە بێ ئەمرى و گونەهە تو ناكەى، وەرە دگەل من دا گوهدانا ئەمرێ خودێ بكەين پاشى يێ پێغەمبەرێ خۆ يێ خۆشتڤى (سلاڤێت خودێ لێ بن)، خودێ مەزن بۆ ڤەشارتنا پرچى د سۆرەتا نووردا دبێژيت: ((وَلْيَضْرِبْنَ بِخُمُرِهِنَّ عَلَى جُيُوبِهِنَّ)) و بلا جهێ خەمل و چەكێت خۆ كو جهێ بازن و حنجۆل (خلخال) و گوهار و رستكێت حەفكێ و رستكێت دكەڤنە سەر سينگى و تۆقا سەرى دەرنەئێخن، و بۆ بيانيان ديارنەكەن، ژبلى جهێ دياربوونا، وێ ب ڤێ نەڤێ، و بێى ئنيەتا خراب وەكى هەردوو دەست و سەروچاڤان و گوستيرك و كلێ چاڤان، و بلا دەرسۆكا خۆ ب سەر سينگێ خۆدا بەردەن بلا دەرسۆكا وان، پرچ و ستۆ و سينگێ وان، ژ بيانيان ڤەشێريت، و بلا جهێ خەملا خۆ ژبلى هەردوو دەست و سەروچاڤان و جوانيا خۆ يا سينگى و پرچێ و لنگان، بۆ كەسێ ديار نەكەن.
ڤێجا خويشكا هێژا.. ئەز بۆ دلسۆزى دبێژم تە، و من چو مەرەمێت دى پێ نينن، هەركەسێ بێژيتە تە چو د قورئانێدا نەهاتيە ل سەر پرچ و سينگ ڤەشارتنێ، دڤێت تە بخاپينيت و تە ژ بن ئەمرێ خودێ دەربێخيت، هشيار بى گوهێ خۆ نەدە ڤان كەسان، رۆژا تو د گۆريدا دمينيە ب تنێ كەس فايدێ تە نەكەت ژبلى گوهداريا تە بۆ خودێ، ڤێجا يا رژ د و هشياربە سەر وێ گوهداريێ ژێ نەدەركەڤە، هەر ئەوە سەرمال و رەئسمالێ تە، و هەر ئەو تنێ دێ فايدێ تە كەت، جارەكا دى وەرە دا گوهێ خۆ بدەينە پێغەمبەرێ خۆ يێ خۆشتڤى (سلاڤێت خودێ لێ بن) كا چ دبێژيت، عائيشا دايكا مە موسلمانان (سلاڤێت خودێ لێ بن) دبێژيت: ئەسما مەخسد پێ خويشكا وێيە هاتە دەف پێغەمبەرى (سلاڤێت خودێ لێ بن) هندە جلكێت تەنك ل بەر بوون، ئينا پێغەمبەرى (سلاڤێت خودێ لێ بن) گۆتێ (يا أَسْمَاءُ إِنَّ الْمَرْأَة إذا بَلَغَتْ الْمَحِيض لم تَصْلُحْ أَنْ يري منها إلا هذا وَهَذا وَأَشَارَ إلى وَجْهِهِ وَكَفَّيْهِ) ئەسماْ .. هەكە ژن بالغ بوو نابيت چو ژ وێ بێتە ديتن ئەڤە و ئەڤە نەبيت ئيشارەت كرە دەستێت خۆ و نافچاڤێت خۆ ئانكو: ژبلى هەردوو دەست و نافچاڤان نابيت چو جهێ دى ژ لەشێ ژنێ بێتە ديتن. ئەز دبێژم پشتى تە دگەل من گوهداريا ئەمرێ خودێ مەزن و پێغەمبەرێ وى (سلاڤێت خودێ لێ بن) كرى دێ بريارا تە ئەو بيت و پێنگاڤا كێم ئەوا تە هاڤێتى كو دەرسۆك راكرنە دێ ئەو بيت وێ پێنگاڤێ تمامكەى و ب دورستى دەرسۆكا خۆ بكەيێ و خودێ و پێغەمبەرى (سلاڤێت خودێ لێ بن) ژ خۆ رازيكەى، و خودێ چێتر دزانيت.
