ب / پێدڤيە ئەم بزانين بەرێخۆدانا حەرام نەيا دورستە و نەزەر يا حەرامە چ ژ كچێ بيت بۆ كورى يان ژ كورى بيت بۆ كچێ، و خودێ مەزن ئەمرێ هەردووكان وەكى ئێك دكەت و دبێژيت: ((قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ))(( وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا)) و بێژە خودان باوەران، بلا چاڤێ خۆ ژ بەرێخۆدانا نەدورست و حەرام وەرگێرن، و بلا دەهمەن و نامويسا خۆ بپارێزن، ئەڤە بۆ وان چێتر و پاقژترە بكەڤنە د پيساتيا گونەهێدا، ب راستى خودێ ئاگەهدارى وێيە، ئەوا ئەو دكەن. پاشى دويفرا هەر د ئايەتا دويفرا دبێژتە ژنان: و بێژە ژنێت خودان باوەران بلا چاڤێت خۆ ژ بەرێخۆدانا نەدورست و حەرام وەرگێرن، و بلا دەهمەن و نامويسا خۆ بپارێزن، و بلا جهێ خەمل و چەكێت خۆ كو جهێ بازن و حنجۆل (خلخال) و گوهار و رستكێت حەفكێ و رستكێت دكەڤنە سەر سينگى و تۆقا سەرى دەرنەئێخن، و بۆ بيانيان ديارنەكەن، ژبلى جهێ دياربوونا، وێ بڤێت نەڤێت، و بێى ئنيەتا خراب وەكى هەردوو دەست و نافچاڤان و گوستيرك و كلێ چاڤان، ژ ڤان ئايەتان ديار دبيت نەزەر يا حەرامە چ كچ بكەت چ ژن چ كور چ زەلام، بەلێ ئەرێ نەزەر بەرێخۆدانە يان ئەو بەرێخۆدانە يا ئنيەتا خرابي دگەل و مەخسەد تێدا و تيرێت شەيتانى دگەل تێكەل و هەكە ب ڤێ ئنيەتێ مامۆستا و قوتابى بەرێ خۆ دا ئێكدوو.. ئەو هنگى نەزەركر و كەفتنە د حەراميدا، و بلا بزانن بەرێخۆدانا حەرام و نەزەر رەنگەكە ژ رەنگێت زنايێ، و پێغەمبەرێ خۆشتڤى (سلاڤێت خودێ لێ بن) دبێژيت: (العينان تزنيان وزناهما النظر) ئانكو: هەردوو چاڤ زنايێ دكەن و زنايا وان بەرێخۆدانە، ڤێجا دڤێت قوتابى و مامۆستا ژ خودێ بترسن و هەكە ڤەشارتى و ب دزيڤە بەرێخۆدانا حەرام كر و كەس پێ نەحەسيا بلا بزانن ئەو نەشێن ل خودێ ڤەشێرن، خودێ مەزن دبێژيت: ((يَعْلَمُ مَا يُسِرُّونَ وَمَا يُعْلِنُونَ إِنَّهُ عَلِيمٌ بِذَاتِ الصُّدُور)) خودێ ب ئاگەهە ژ وێ يا ئەو نەپەنى و ئاشكەرا، دكەن. ب راستى ئەو يێ ب ئاگەهە ژ وى يێ د دلان و سينگاندا ڤەشارتى. ((يَعْلَمُ خَائِنَةَ الْأَعْيُنِ وَمَا تُخْفِي الصُّدُورُ)) خودێ خيانەتا چاڤان و بەرێخۆدانا ب دزى و نهينيڤە و د دلاندا ڤەشارتى، ژێ ب ئاگەهە. و بەرێخۆدانا ئێكێ چێدبيت، و يا نەيا مەقسوود گونەه تێدا نينە، بەلێ گونەه يا د وێ بەرێخۆدانێدا ئەوا دويفرا دهێت و يا ب مەرەم، پێغەمبەرێ خۆشتڤى (سلاڤێت خودێ لێ بن) دبێژيتە عەلى (خودێ ژێ رازی بیت) (يا علي لاَ تُتْبِعِ النّظرَة النَّظرَة فَإِنَّمَا لك الأُولَى وَلَيْسَتْ لك الآخِرَة) عەلى.. بەرێخۆدان دويف بەرێخۆدانێڤە نەبەردە، يا ئێكێ بۆ تەيە و يا دووێ ل سەر تەيە، ئانكو: بەرێخۆدانا ب مەرەم گونەهە، ڤێجا هەرگاڤا ئەڤ بەرێخۆدانە د ناڤبەرا قوتابى و مامۆستادا چێ بوو ئەو يا حەرامە، و خودێ چێتر دزانيت.
