ب / دەستپێكى نە بۆ بابێ، نە براى، و نە دايكێ، و نە بۆ كەسێ هەيە خورتيێ ل كچێ بكەت، و بێى حەزا وێ بدەنە ئێكێ وێ نەڤێت، چونكى هاتيە زانين كچەك هاتە دەف پێغەمبەرێ خۆشتڤى (سلاڤێت خودێ لێ بن) بەلێ نەديت، ئينا چيرۆكا خۆ بۆ دايكا مە موسلمانان عائيشايێ (خودێ ژێ رازی بیت) ڤەگێرا، گۆت: بابێ من ئەز يا دايمە برازيێ خۆ و ب دلێ من نينە، و دڤێت ب من بێ بهايا خۆ راكەت. عائيشايێ گۆتێ روينە خوارێ هەتا پێغەمبەر (سلاڤێت خودێ لێ بن) دهێت و بێژێ، پێغەمبەر (سلاڤێت خودێ لێ بن) هات و گۆتێ ئينا پێغەمبەرى (سلاڤێت خودێ لێ بن) فرێكرە دويف بابێ وێرا و گۆتە كچێ: ڤێ گاڤێ تو يا ب كەيفا خۆيى تە دڤێت لێڤەببە و تە دڤێت رازى ببە، ئينا كچێ گۆت: ئەز يا رازيمە ب وى تشتێ بابێ من بۆ من دڤێت، بەلێ من دڤيا ئەز نيشا كچ و ژنێت موسلمانان بدەم و وان ئاگەهدار بكەم كو كەسێ حەق نينە خورتيێ ل وان بكەت، بەلێ بەرامبەر ژى دڤێت كچ بزانيت نابيت ئەو بێ دەستويريا باب و سەركارێ خۆ شوى بكەت، پێغەمبەرێ خۆشتڤى (سلاڤێت خودێ لێ بن) دبێژيت: (ايما امرأة نكحت بغير اذن وليها فنكاحها باطل) هەر ژنەكا بێ دەستويريا سەركارێ خۆ شويكەت شويكرنا وێ نەيا دورستە، دڤێت كچ ڤێ ژى بزانيت نەبەس بزانيت كەسێ مافێ تەعدا و خورتيێ نينە لێ بكەت، و ديسا ژ حەديسا بۆرى ديار دبيت، ئنيەتا بابێ يا خەلەت بوو، بەرژەوەنديا خۆ ژ شويكرنا كچا خۆ دڤيا، دڤيا ب ڤێ شويكرنێ كێم و كاسى و لەنگيێت خۆ دورست بكەت، ئها ئەڤە نەيا دورستە و يا خەلەتە، كچێ ماف يێ هەى هەكە ديت بابێ خێرا خۆ بەر چاڤ دگريت نەيا كچێ ئەو د ڤێ پرسێدا گوهێ خۆ نەدەتە بابێ خۆ و ب وى نەكەت و رازى نەبيت شوى ب وى نەكەت يێ بابێ دڤێت خورتيێ لێ بكەت، و نەيا گونەهكارە د ڤى كاريدا، بەلێ نابيت وێ نەرازيبوونێ ب رێكێت خەلەت دەرببريت وەكى ژێ سل ببيت يان دەنگێ خۆ ل سەر بلند بكەت يان زڤر و نەجوان دگەل باخڤيت، و ئاخفتنێت نە د رێدا د راستا ويدا بێژيت، چونكى خەلەتيا ل دەف دايبابان نابيت ب زڤرى بێتە گوهارتن، خودێ مەزن دبێژيت: ((وَإِنْ جَاهَدَاكَ عَلَى أَنْ تُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا وَصَاحِبْهُمَا فِي الدُّنْيَا مَعْرُوفًا وَاتَّبِعْ سَبِيلَ مَنْ أَنَابَ إِلَيَّ ثُمَّ إِلَيَّ مَرْجِعُكُمْ فَأُنَبِّئُكُمْ بِمَا كُنْتُمْ تَعْمَلُونَ)) و ئەگەر دەيبابێت تە مانە ب تەڤە، تە د بەر هندێرا بكەن تو تشتەكى بۆ من بكەيە هەڤپشك تو چو ژێ نەزانى، گوهێ خۆ نەدە وان، و د دنيايێدا ب قەنجى و باشى دگەل وان ببۆرينە خۆ ژ وان دوير نەئێخە، و يێ باش بە دگەل وان، بەس گوهداريا وان د شركێدا نەكە، و رێكا وى بگرە يێ بەر ل من بۆ تۆبەكرن و دلبێشيێ، پاشى دێ هەر ب بال منڤە زڤرن، ڤێجا هنگى يێ هەوە كرى دێ بۆ هەوە بێژم و هەوە پێ ئاگەهداركەم. ديسا خودێ مەزن دبێژيت: ((وَوَصَّيْنَا الْإِنْسَانَ بِوَالِدَيْهِ حُسْنًا وَإِنْ جَاهَدَاكَ لِتُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا إِلَيَّ مَرْجِعُكُمْ فَأُنَبِّئُكُمْ بِمَا كُنْتُمْ تَعْمَلُونَ)) و مە ئەمرێ مرۆڤان يێ كرى، قەنجى و باشيێ دگەل دەيبابێت خۆ بكەن، و ئەگەر ئەو ژ تە بخوازن و خۆ ب تەڤە بوەستينن، دا تو وى تشتێ تە زانين پێ نەى، بۆ مە بكەيە هەڤال و هەڤپشك، ڤێجا تو گوهێ خۆ نەدە وان بۆ گونەهێ، چ شرك چ هەر گونەهەكا دى و زڤرينا هەوە ب بال من ڤەيە، ڤێجا هەر ئێكى ل دويف كارێ ئەو دكەت دێ جزاكەين ئەڤە مزگينيەكا خۆشە، بۆ وى يێ باش دگەل دەيبابێت خۆ و رێكا راست گرتى، و گەفە بۆ وى يێ دگەل دەيبابێت خۆ يێ خراب و رێكا خراب گرتى. پشتى ڤێ.. بابێ تە يێ خەلەت بوو تەعدايى ل تە كرى، بەلێ تو ژى يا خەلەت بووى تە ئەڤ نەرازيبوونە ب رێكێت نەدورست دەربرى و تە دلێ بابێ خۆ دهێلا و تە شەرێ وى دكر، بەلێ مادەم ئەڤرۆ تو يا پەشێمانى و دلێ تە ب بابێ تەڤەيە.. ئەڤ تشتەكێ جوانە ژ دل بابێ خۆ ئازاكە دا خودێ ژى ئازاكەت، بەلێ ئەو خەلەتيا تە د راستا بابێ خۆدا كرى پێدڤى تۆبەك و پەشێمانيەكا ژ دلە، بەلكى خودێ ل تە ببۆريت و تە ئازاكەت، چونكى خودێ ئەمرێ مە يێ كرى: ((فَلَا تَقُلْ لَهُمَا أُفٍّ وَلَا تَنْهَرْهُمَا وَقُلْ لَهُمَا قَوْلًا كَرِيمًا)) د خزمەتكرنا واندا نەبێژە وان ((ئۆف)) ژى كو تو وەستيان و بێزاريا خۆ ژ وان ديار بكەى، و ل وان نەخورە و وان پاشڤە نەبە و شوينا ((ئۆف ئۆفێ)) ئاخفتنەكا نەرم و جوان دگەل وان بكە. بەرێ خۆ بدێ هەكە مە ماف نەبيت ئەم ئۆف ئوفێ د راستا واندا بكەين پا چاوا خەبەر و زڤرى و دەنگ بلندى چێ دبيت! پێغەمبەرێ خۆشتڤى (سلاڤێت خودێ لێ بن) دبێژيت: (مِنَ الْكبائِر شتْمُ الرَّجلِ والِدَيْهِ،» قالوا: يا رسولَ اللَّه وهَلْ يشْتُمُ الرَّجُلُ والِديْهِ ؟، قال: نَعمْ، يَسُبُّ أَبا الرَّجُلِ، فيسُبُّ أَباه، ويسُبُّ أُمَّهُ، فَيسُبُّ أُمَّهُ) ژ گونەهێت مەزنە مرۆڤ خەبەرا بێژيتە دايبابێت خۆ، گۆتن: يا پێغەمبەرێ خودێ ما مرۆڤ خەبەرا دبێژيتە دايبابێت خۆ؟! گۆت: بەلێ، دێ خەبەرا بێژيتە بابێ كەسەكى، ئەو ژى دێ خەبەرا بێژيتە بابێ وى، و خەبەرا دبێژيتە دايكا وى ئەو ژى خەبەرا دبێژيتە دايكا وى. خودێ ژ وان سەحابان رازى بيت هزر نەدكرن دێ هندەك هەبن ئێكسەر و روى ب روى دێ خەبەران بێژنە دايبابێت خۆ، ژ بەر هندێ ئەڤە غەريب ديت و گۆتن: ما مرۆڤ خەبەرا دبێژيتە دايبابێت خۆ؟ وان هزر نەكريە مرۆڤ خەبەران بێژتە دايبابێت خۆ لەوا ئەڤ پسيارە كرن، و پێغەمبەرێ خۆشتڤى (سلاڤێت خودێ لێ بن) مرۆڤى پالددەت هند دگەل ديبابێت خۆ يێ ب تۆر و ئەدەب بيت خەبەرا نەبێژتە دايبابێت خەلكى سەر خاترا دايبابێت خۆ دا وان بپارێزيت كو ئاخفتنەكا خەلەت د دەرحەقێ واندا بێتە گۆتن، بەرێ خۆ بدێ ئها دڤێت هۆسا مرۆڤێ هشيار بيت د راستا دايباباندا، و خودێ چێتر دزانيت.
