ب / بەلێ دورستە و مەرج نينە هەمى دەمان سەرێ وێ يێ گرتى بيت و دەرسۆك ل سەر سەرى بيت نەخاسمە هەكە بەس مەحرەم ل مالێ بن، بەلێ دڤێت كچ يا هشيار بيت چونكى مخابن مالێت مە پێگريى ب فەرمانێت شەرعى يێت جڤاكى ناكەن و گەلەك كەس پێگريێ ب تۆر و ئەدەب و سنجێ سەرەدانان ناكەن و قەستا ژۆر دكەن بێ دەرگەه قوتان و دەستوير وەرگرتن، وەكى خودێ گۆتى: ((يَا أَيُّهَا الَّذِينَ آمَنُوا لَا تَدْخُلُوا بُيُوتًا غَيْرَ بُيُوتِكُمْ حَتَّى تَسْتَأْنِسُوا وَتُسَلِّمُوا عَلَى أَهْلِهَا ذَلِكُمْ خَيْرٌ لَكُمْ لَعَلَّكُمْ تَذَكَّرُونَ)) گەلى ئەوێت هەوە باوەرى ئينايين، نەچنە د چو خانيانڤە ژبلى خانيێت خۆ، هەتا هوين دەستوورێ وەرنەگرن، و سلاڤ نەكەنە خودانێت وان كو بێژن ((السلام عليكم)) بێمە ژۆر؟ جارەكێ يان سێ جاران، ئەڤە بۆ هەوە چێترە كو هوين بێ دەستوور و ژ نشكەكێڤە بچنە ژۆر، دا هوين كار ب ڤان رەوشتان بكەن د دەرهەقێ دەستوور وەرگرتنێدا بەرى بچنە د خانيەكيڤە. باراپتر خەلك ب ناڤێ ئەم مرۆڤێت ئێكين يان ئەم مالەكين يان ئەم خوينەكين يان ئەم جيرانێت ئێكين خۆ ل ڤان فەرمانا ناگرن پێگريێ پێ ناكەن و ددەنە مالێت خەلكيڤە و ئەڤە گونەهە و بێ ئەمريا فەرمانا خودێ و پێغەمبەرێ ويە، ژبەر هندێ ئەز دبێژم بلا خويشكێت مە د هشيار بن و ئاگەه ژ ڤان حالەتان هەبيت هەكە وەكى دى دورستە و چو تێدا نينە، نەخاسمە هەكە خويشكا شويكرى بيت و زەلامێ وێ ل مال بيت دبيت د راستا وێدا ئەو يا خودان خێرتربيت هەكە يا سەركۆل بيت ب ئنيەتا دلێ زەلامێ خۆ خۆشكەت و ب خۆڤە گرێدەت و چاڤێ وى ل دەرڤەى مالێ بگريت، و خودێ چێتر دزانيت.
