ب / زانايێت مە د راستا سەرەدانا ژناندا بۆ گۆرستانێ بۆ پتر گۆتنەكێ يێت جوداچۆين، هندەك زانا دورست ناكەن ژبەر گۆتنا پێغەمبەرى (سلاڤێت خودێ لێ بن) ئەوا خودانێت سونەنان ژ ئبن عەباسى (خودێ ژێ رازی بیت) ڤەگێراين دبێژيت: پێغەمبەرێ خودێ (سلاڤێت خودێ لێ بن) لەعنەتێت ل سەرەدانكەرێت گۆران ژ ژنان يێ كرى، و هندەكێت دى سەرەدانا ژنان مەكروه يا داناي، بەلێ بۆچۆنا ب هێزتر و دورستر و بەلگە بۆ پشتگريێ دكەن دورستە بۆ ژنێ سەرەدانا گۆران بكەت. و حەديسا بەرى نوكە زانا دگەل حەدەيسا ئبن ماجە و ترمزى و حاكمى و بەيهەقى و ئيمام ئەحمەد ژ پتر سەحابيەكى ڤەگێراين كۆم دكەن: پێغەمبەرێ خودێ (سلاڤێت خودێ لێ بن) لەعنەتێت ل ژنا زێدە سەرەدانكەر بۆ گۆران يێ كرى، ژ ڤێ حەديسێ دهێتە زانين ژن زێدە بچيتە سەر زياراتا نەيا دورستە، هەكە وەكى زەلامان هندە جاران بچيت دورستە، و ئەڤ حەديسە ئەوا دبێژيت: (كُنْتُ نَهَيْتُكُمْ عَنْ زِيارَە القُبُور فَزُوروها) ئانكو: من نەهيا هەوە ژ سەرەدانا گۆران كربوو، هەرن سەرا بدەن. و د ريوايەتەكێدا: (فمن أراد أن يزور القبور فليزر فإنها تذكرنا بالآخرة). هەركەسێ بڤێت سەرەدانا گۆران بكەت، بلا سەرەدانێ بكەت، ب راستى ئەو ئاخرەتێ ل بيرا مە دئينيت. و عائيشا دايكا مە موسلمانا ب ڤى رەنگى د ئەمرێ پێغەمبەرى (سلاڤێت خودێ لێ بن) دگەهشت كو دەستپێكێ نەهى كربوو ژ سەرەدانا گۆران پاشى دورستكر، و ئەڤە بۆ ژنان و زەلامان وەكى ئێكە، حاكم ژ ئبن ئەبى مەليكە (خودێ ژێ رازی بیت)، ڤەدگێريت: عائيشا دايكا مە موسلمانا ديت، ژ سەرەدانا گۆرێ عەبدولرەحمان ڤەدگەريا، گۆتێ: ما پێغەمبەرى (سلاڤێت خودێ لێ بن) نەهى نەكريە ژن بچنە سەر گۆران، گۆت: بەلێ دەستپێكێ نەهي كربوو پاشى ئەمر كر بچين، هەروەكى ئيشارەتێ ددەتە ڤێ حەديسێ: من نەهيا هەوە ژ سەرەدانا گۆران كربوو، هەرن سەرا بدەن. يان ڤێ ريوايەتێ: هەركەسێ بڤێت سەرەدانا گۆران بكەت، بلا سەرەدانێ بكەت، ب راستى ئەو ئاخرەتێ ل بيرا مە دئينيت. بەلگەيەكێ دى ل سەر دورستيا چۆنا ژنان بۆ سەر گۆران، ژ ئەنەسى (خودێ ژێ رازی بیت)، دبێژيت: پێغەمبەر (سلاڤێت خودێ لێ بن) د بەر ژنەكێرا بۆرى ل نك گۆرەكى دكرە گرى، گۆت: "ژ خودێ بترسە و بێهنا خۆ فرەهكە" ئينا گۆت: ژ من دويركەڤە بەلا ب سەرێ من هاتى ب سەرێ تە نەهاتيە. و نەدنياسى، ئێكى گۆتێ: ئەو پێغەمبەرێ خودێ بوو (سلاڤێت خودێ لێ بن). هاتە بەردەرگەهێ پێغەمبەرى (سلاڤێت خودێ لێ بن) چ دەرگەهڤان ل دەف نەديتن، گۆت: من تو نەنياسى! (هەروەكى داخوازا لێبۆرينێ دخوازيت) گۆت: "سەبرێ دورست و ب خێر بەس ئەوە يێ دەستپێك و د گەرمەگەرما نەخۆشيێدا. تشتێ پێغەمبەرى (سلاڤێت خودێ لێ بن) گۆتيێ بێهنا خۆ فرەكە و نەگۆتێ تو بۆچى هاتيە سەر گۆران، ژ ئەڤا بۆرى بۆ مە ديار دبيت سەرەدانا ژنان بۆ گۆران دورستە و ئەو ژى وەكى زەلامان هەوجەى دل نەرميێيە و هەوجەيە بيرا وێ وەكى زەلامان بێتە ئاخرەتێ، بەلێ ب مەرجێ هندێ ب جلكێ شەرعى بچيت و سەرەدانێت خۆ گەلەك زێدەنەكەت و هندە رۆژان دەستنيشان نەكەت بۆ خۆ بكەتە عەدەت دڤێت هەر د وان رۆژاندا بچيت، و خودێ چێتر دزانيت.
