ب / دويف بەلگە و دەليلێت بەردەستێ مە ژ قورئان و حەديسان؛ دەنگێ ژنێ نەعەورەتە، و نەيێ حەرامە. و سەحابان گول دەنگێ ژنان دبوو، و ژن دهاتنە دەف پێغەمبەرى (سلاڤێت خودێ لێ بن) و دەف زەلامان پسيارا دينێ خۆ دكرن و پێغەمبەرێ خودێ (سلاڤێت خودێ لێ بن) بەرسڤا وان ددا و نەدگۆتە وان نابيت دەنگێ هەوە بگەهيتە گوهێت زەلامان، چونكى دەنگێ هەوە عەورەتە و يێ حەرامە، و دايكا مە عائيشا ئێك ژ پێنج سەحابانە (خودێ ژێ رازی بیت) يێت پتر حەديس بۆ مە ژ پێغەمبەرێ خودێ (سلاڤێت خودێ لێ بن) ڤەگوهاستين و ئەڤ حەديسە بۆ زەلامان دگۆتن و زەلام دچۆن پسيار ژێ دكرن و بەرسڤا وان ددا، هەروەسا هەمى دايكێت دى يێت مە موسلمانان و كەسێ دەنگێ ژنێ نەدورست نەدانايە، و قورئانێ چەند ديمەن يێت بۆ مە ئيناين دەنگێ ژنێ و زەلامى تێدا وەكى وێ دان و ستاندنا د ناڤبەرا مووسا پێغەمبەري (سلاڤێت خودێ لێ بن) و كچا شوعەيب پێغەمبەريدا چێ بووى، يان ئەو دان و ستاندنا د ناڤبەرا خوشكا مووسا پێغەمبەرى (سلاڤێت خودێ لێ بن) و مرۆڤێت فيرعەونيدا چێ بووى، بەس نەيا دورستە ژن نازك و نازداري دگەل زەلامان باخڤيت ئەو نازك و نازدارى نامێت خەلەت بۆ يێ بەرامبەر بهنێريت و شەيتان دلێ وى خەلەت بكەت و د بەر خەلەتيێرا ببەت، خودێ مەزن دبێژيت: ((يَا نِسَاءَ النَّبِيِّ لَسْتُنَّ كَأَحَدٍ مِنَ النِّسَاءِ إِنِ اتَّقَيْتُنَّ فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَعْرُوفًا)) ئانكو: گەلى ژنێت پێغەمبەرى هوين نەوەكى چو ژنێت دينە، ئەگەر هوين تەقوايا خودێ بكەن، ڤێجا ئاخفتنا خۆ ب نازكى نەكەن وەختێ هوين دگەل زەلامان دئاخڤن، دا ئەوێ نەساخى و خرابى د دليدا هەى تەمايى نەكەڤيتە دلى، و ئاخفتنەكا عەدەتى باخڤن. هندەك حەديسا پێغەمبەرى (سلاڤێت خودێ لێ بن) خەلەت تێدگەهن ئەوا دبێژيت: (أَيُّهَا النَّاسُ مالَكُمْ حِين نَابَكُمْ شَيْءٌ في الصَّلاَە أَخذتمْ فِي التَّصْفِيقِ ؟، إِنَّما التَّصْفِيقُ لِلنِّسَاءِ. منْ نَابَهُ شيءٌ فِي صلاتِهِ فَلْيقلْ: سُبْحَانَ اللَّهِ) ئانكو: گەلى خەلكى هەوە خێرە دەمێ تشتەك بۆ هەوە د نڤێژێدا چێ بوو هەوە دەست ب دەستقوتانێ كر؟ دەستقوتان يا ژنان ب تنێيە، هەركەسێ تشتەك بۆ د نڤێژا ويدا چێ بوو بلا بێژيت: (سبحان الله). و ئەڤە ڤێ ناگەهينيت دەنگێ ژنێ يێ حەرامە يان عەورەتە، چونكى ئەڤ حوكمە يێ تايبەتە ب نڤێژێڤە خۆ هەكە ژن ب تنێ ژى نڤێژێ بكەن يان دگەل باب و برايێت خۆ نڤێژآ بكەت و كەسێ بيانى ل وێرێ نەبيت هەر ديسا دڤێت بۆ ئاگەهداركرنا ئيمامى دەستان بقوتيت، نەكو چونكى دەنگێ وێ يێ حەرامە يان عەورەتە، چونكى يێت وێرێ ژنن يان مەحرەمێت وێنە و باب و برانە، و خودێ چێتر دزانيت.
