ب / كچ و كور هەكە باب يێ ساخ بيت وەكى ئێك ماف يێ د مالێ بابێدا هەى و نابيت باب فەرق و جوداهيێ د ناڤبەرا واندا بكەت، و هەكە ب كريارا خۆ ئەو هەست بۆ كچێ دورستكر يێ گونەهكارە، چونكى پێغەمبەرێ خودێ (سلاڤێت خودێ لێ بن) ئەمرێ دايبابان دكەت عەدالەت و دادپەروەريێ د ناڤبەرا عەيالێ خودا بكەت، دبێژيت: هەروەكى ئيمام ئەحمەد و ئەبو داوود و نەسائى ژ نەعمانێ كورێ بەشيرى (خودێ ژێ رازی بیت) ڤەدگوهێزن: (اعدلوا بين أبنائكم اعدلوا بين أبنائكم اعدلوا بين أبنائكم) و تەبەرانى و بەيهەقى و سەعيد بن مەنسور ژ ئبن عەباسى (خودێ ژێ رازی بیت) ب ڤێ بێژەيێ ڤەدگێرن: (سووا يبن أولادكم في العطية ولو كنت مفضلا أحدا لفضلت النساء) ژ ڤان هەردوو ريوايەتان دهێتە زانين نابيت باب فەرق و جوداهيێ د ناڤبەرا عەيالاندا بكەت نەخاسمە كچ و كوران، و پێغەمبەر (سلاڤێت خودێ لێ بن) دبێژيت: هەكە من ئێك ب سەر ئێكى ئێخستبا دا كچان ب سەرئێخم. بەلێ هەكە ئەگەرەكێ شەرعي هەبيت و عەيالێت دى د رازى بن و مەخسەد و ئنيەتا بابێ نە زيان گەهاندن بيت و فەرق و جوداهي بيت دورستە دانا وى وەكى ئێك نەبيت هەروەكى جمهورێ زانايان ڤێ دبێژن، بەلێ موستەحەبە وەكى ئێك دان بۆ هەبيت و دڤێت باب كچ و كوران خودانكەت هەتا هەردوو مەزن دبن و پشتى مەزن دبن هندى كچ شوى نەكەت مافێ وێ هەر ل سەر بابێ دمينيت خودانكەت و بەرپسيارە ژ وێ، بەلێ نەبەرپسيارە ژ كورى هەكە مەزن بوو و شيا شۆلكەت و خۆ خودانكەت. ل ڤێرێ ديار دبيت مافێ كچێ پترە ژ يێ كورى هندى شوى نەكەت، و هەكە باب نەما هەردووكان پشك و بار يێ د ميراتێ بابێ خۆدا هەي و نابيت كچ ژێ بێتە زرباركرن چ يا بچويك بيت يان يا مەزن، چ يا شويكرى بيت يان نەيا شويكرى بيت، چ يا هەژار بيت يان يا زەنگين، مافەكە و خودێ يێ دايێ، خودێ مەزن دبێژيت: ((لِلرِّجَالِ نَصِيبٌ مِمَّا تَرَكَ الْوَالِدَانِ وَالْأَقْرَبُونَ وَلِلنِّسَاءِ نَصِيبٌ مِمَّا تَرَكَ الْوَالِدَانِ وَالْأَقْرَبُونَ مِمَّا قَلَّ مِنْهُ أَوْ كَثُرَ نَصِيبًا مَفْرُوضًا)) زەلامان د وى (مالێ) دەيباب و كەس و كاران ب پاش خۆڤە هێلايى، بار و پشكەك هەيە، و ژنان ژى ژ وى (مالێ) دەيبابان و كەس و كاران ب پاش خۆڤە هێلايى، بار و پشك هەيە، چ كێم چ زێدە، پشكەكە ژ بەرێ خودێڤە هاتيە دانان. بەلێ كچ هندە جاران دايكە و هندە جاران خويشكە و هندە جاران هەڤژينە و د هەمى كراساندا زەلام بەرپرسە ژ خودانكرنا وێ و ل سەر زەلامى دكەڤيت خودانكەت و پێدڤيێت وێ پەيداكەت و مەزاختنێ لێ بكەت، لەوا عەدالەت و دادپەروەرى دخوازيت ئەڤە د بەلاڤەكرنا ميراتيدا بەرچاڤ بێتە وەرگرتن، و ديسا كراسێت كچ تێدا دهێتە ڤەگوهاستن كچێ بۆ دايكێ بۆ خويشكێ بۆ هەڤژينێ و د هەر كراسەكێدا پشك و بارەكا هەى، هەكە دايك بيت پشك و بارەكا هەى، و هەكە هەڤژين بيت پشك و بارەكا هەى، و ئەگەر خويشك بيت پشك و بارەكا هەى، و گەلەك جاران پشكا وێ هندى يا زەلاميە دەمێ ميراتى وەردگريت: وەكى دايك دگەل زەلامێ خۆ و كورێ وان عەيالەك هەبيت هنگى باب و دايك دێ وەكى ئێك وەرگرن، خودێ مەزن دبێژيت: ((وَلِأَبَوَيْهِ لِكُلِّ وَاحِدٍ مِنْهُمَا السُّدُسُ مِمَّا تَرَكَ إِنْ كَانَ لَهُ وَلَدٌ )) و دەيبابێت وي يێ مرى هەر ئێكى شەشێك دگەهيتێ؛ ئەگەر ئەوێ مرى زارۆك هەبيت چ كور بن، چ كچ، خويشك و برايێت دايكێ هەكە برايێ وان مر و نە باب و نە عەيال پاش خۆ نەهێلابن هندى ئێك دگەهيتێ هەكە دوو بن ئانكو خويشكەك و برايەك بيت، و هەكە ژ دوويان پتر بن هەمى هەڤپشكن وەكى ئێك د سێكا ميراتێ برايێ واندا، خودێ مەزن دبێژيت: ((وَإِنْ كَانَ رَجُلٌ يُورَثُ كَلَالَةً أَوِ امْرَأَةٌ وَلَهُ أَخٌ أَوْ أُخْتٌ فَلِكُلِّ وَاحِدٍ مِنْهُمَا السُّدُسُ فَإِنْ كَانُوا أَكْثَرَ مِنْ ذَلِكَ فَهُمْ شُرَكَاءُ فِي الثُّلُثِ ))و ئەگەر زەلامەك يان ژنەك بێ عەيال و بێ باب مەخسەد يا بێ دويندەه و باب و باپير بيت مر، و برايەك يان خويشكەكا ژ دەيكێ هەبيت شەشێك بۆ هەر ئێكيە، و ئەگەر ژ ئێكى پتر بن هەمى د سێكێدا د هەڤپشكن، و هندەجاران نيڤا ميراتى بۆ ويە هەكە چو خويشك و برا دگەل نەبن و ببيتە ميراتخۆرێ بابێ خۆ ((وَإِنْ كَانَتْ وَاحِدَةً فَلَهَا النِّصْفُ)) و ئەگەر ميراتخۆر كچەك ب تنێ بيت، نيڤا ميراتى بۆ وێيە، و د كراسەكێ ديدا پشكا وێ چارێكەكە هەكە بوو ميراتخۆرێ زەلامێ خۆ و زەلامێ وێ عەيال نەبن، هەكە عەيال هەبن پشكا وێ هەشتێكە ((وَلَهُنَّ الرُّبُعُ مِمَّا تَرَكْتُمْ إِنْ لَمْ يَكُنْ لَكُمْ وَلَدٌ فَإِنْ كَانَ لَكُمْ وَلَدٌ فَلَهُنَّ الثُّمُنُ مِمَّا تَرَكْتُمْ ))و ئەگەر هەوە چو زارۆك نەبن كور يان كچ، ژ وێ يان ژ ئێكا دى، چارێكا ميراتێ هەوە بۆ هەڤسەرێت هەوەيە، و ئەگەر هەوە زارۆكەك هەبيت هەشتێكا ميراتێ هەوە بۆ وانە و پشكا وێ نەئێكە ژ ميراتێ د ناڤبەرا چەند پشكان دزڤريت دويف كراسێ ئەو تێدا (نيڤە يان سێكە يان چاريكە يان دوسێكە يان هەشتێكە يان هندى نيڤا يا برايە) و ئەڤ گۆتنا دبێژيت: كچ يان ژن نيڤا كورى يان زەلامى وەردگريت گۆتنەكا بێ وژدانە و ئەڤە كراسەكە ژ كراسێت ميرات وەرگرتنێ، و ب راستى هەمى كراسێت ميرات وەرگرتنێ كو زۆر گەلەكن د چار كراسان تنێدا ژن (چ كچ بيت يان هەڤسەر بيت يان دايك بيت) ئەو ژى ئەڤەنە:
كراسێ ئێكێ: هەكە ئەوێ مرى كچ و كور هەر دوو هەبن، هنگى كچ نيڤا كورى ژ ميراتێ دايكێ يان بابێ وەردگرن ئەو ژى دويف گۆتنا خودێ: ((يُوصِيكُمُ اللَّهُ فِي أَوْلَادِكُمْ لِلذَّكَرِ مِثْلُ حَظِّ الْأُنْثَيَيْنِ)) د دەرهەقێ زارۆكێت هەوەدا خودێ ب ڤى رەنگى فەرمانا هەوە دكەت، هەكە هەوە كور و كچ پاش خۆ هێلان بارا كورى تەمەتى بارا دوو كچانە.
كراسێ دووێ: هەكە ژن و مێر بوونە ميراتگرێت هەڤدوو ئەو ژى دويف گۆتنا خودێ مەزن: ((وَلَكُمْ نِصْفُ مَا تَرَكَ أَزْوَاجُكُمْ إِنْ لَمْ يَكُنْ لَهُنَّ وَلَدٌ فَإِنْ كَانَ لَهُنَّ وَلَدٌ فَلَكُمُ الرُّبُعُ مِمَّا تَرَكْنَ مِنْ بَعْدِ وَصِيَّةٍ يُوصِينَ بِهَا أَوْ دَيْنٍ وَلَهُنَّ الرُّبُعُ مِمَّا تَرَكْتُمْ إِنْ لَمْ يَكُنْ لَكُمْ وَلَدٌ فَإِنْ كَانَ لَكُمْ وَلَدٌ فَلَهُنَّ الثُّمُنُ مِمَّا تَرَكْتُمْ مِنْ بَعْدِ وَصِيَّةٍ تُوصُونَ بِهَا أَوْ دَيْن)) و نيڤا ميراتێ ژنێت هەڤسەرێت هەوە هێلايى بۆ هەوەيە پشتى مرنێ ئەگەر وان چو زارۆك كور يان كچ نەبن نە ژ هەوە، و نە ژ چو زەلامێت دى و ئەگەر وان زارۆكەك هەبيت، چارێكەك ژ ميراتێ وان هێلايى بۆ هەوەيە هەلبەت پشتى جهئينانا وەسيەتا كرى و دەرئێخستنا قەر و دەينان و ئەگەر هەوە چو زارۆك نەبن كور يان كچ، ژ وێ يان ژ ئێكا دى، چارێكا ميراتێ هەوە بۆ هەڤسەرێت هەوەيە، و ئەگەر هەوە زارۆكەك هەبيت هەشتێكا ميراتێ هەوە بۆ وانە، پشتى جهئينانا وەسيەتا هەوە كرى و دەرێخستنا قەران.
كراسێ سيێ: هەكە دايك و باب بوونە ميراتگرێت كورێ خۆ و كورێ وان عەيال نەبن، باب دوو سێكان وەردگريت و دايك سێكەكێ ئەو ژى دويف گۆتنا خودآ: ((وَلِأَبَوَيْهِ لِكُلِّ وَاحِدٍ مِنْهُمَا السُّدُسُ مِمَّا تَرَكَ إِنْ كَانَ لَهُ وَلَدٌ فَإِنْ لَمْ يَكُنْ لَهُ وَلَدٌ وَوَرِثَهُ أَبَوَاهُ فَلِأُمِّهِ الثُّلُثُ))و دەيبابێت وي يێ مرى هەر ئێكى شەشێك دگەهيتێ؛ ئەگەر ئەوێ مرى زارۆك هەبيت چ كور بن، چ كچ و ئەگەر چو زارۆك چ كور، چ كچ نەبن و دەيبابێت وى بوونە ميراتخۆرێت وى، سێك بۆ دەيكا ويە.
كراسێ چارێ: هەكە ميراتگر باب و كچ و دايك بن.. نيڤ بۆ كچێيە، سێك بۆ بابێيە و شەشێك بۆ دايكێيە، دگەل هندێ ژى هەژيە بێژين كچ كو نەڤيە پتر ژ باپيرێ خۆ وەردگريت.
بەلێ بەرامبەر ڤان چار كراسان ئەوێت ژن تێدا نيڤا زەلامى وەردگريت د دەه كراسێت ديدا هندى زەلامى وەردگريت (ئانكو دووجار و نيڤان هندى كراسێت نيڤا زەلامى وەردگريت):
كراسێ ئێكێ: هەكە ژنەك يان زەلامەك مر و خويشكەك و برايەكێ دايكێ پاش خۆ هێلان و عەيال و باب نەبن هەرئێك ژ وان شەشێك دگەهيتێ دويف گۆتنا خودێ: ((وَإِنْ كَانَ رَجُلٌ يُورَثُ كَلَالَةً أَوِ امْرَأَةٌ وَلَهُ أَخٌ أَوْ أُخْتٌ فَلِكُلِّ وَاحِدٍ مِنْهُمَا السُّدُسُ ))و ئەگەر زەلامەك يان ژنەك بێ عەيال و بێ باب ـ مەخسەد بێ دويندەه و باب و باپير بيت ـ مر، و برايەك يان خويشكەكا ژ دەيكێ هەبيت.. شەشێك بۆ هەر ئێكيە.
كراسێ دووێ: هەكە ژنەك يان زەلامەك مر و پتر ژ خويشك و برايەكێ دايكێ پاش خۆ هێلان و عەيال و باب نەبن هەمى وەكى ئێك كچ و كور هەڤپشكن د سێكێدا دويف گۆتنا خودێ: ((فَإِنْ كَانُوا أَكْثَرَ مِنْ ذَلِكَ فَهُمْ شُرَكَاءُ فِي الثُّلُثِ ))و ئەگەر زەلامەك يان ژنەك بێ عەيال و بێ باب ـ مەخسەد يا بێ دويندەه و باب و باپير بيت ـ مر، و پتر ژ دوو خويشك و برايێت دايكێ هەبن هەمى د سێكێدا د هەڤپشكن.
كراسێ سيێ: هەكە دايك و باب بوونە ميراتگرێت كورێ خۆ و كورێ وان كور و كچ هەبن.. هەرئێكى وەكى ئێك شەشێك دگەهيتێ، هەروەكى گۆتنا خودێ هۆسا هاتى: ((وَلِأَبَوَيْهِ لِكُلِّ وَاحِدٍ مِنْهُمَا السُّدُسُ مِمَّا تَرَكَ إِنْ كَانَ لَهُ وَلَدٌ ))و دەيبابێت وي يێ مرى هەر ئێكى شەشێك دگەهيتێ؛ ئەگەر ئەوێ مرى زارۆك هەبن چ كور بن، چ كچ.
كراسێ چارآ: هەكە ژنەك بمريت و زەلامى و خويشكەكا دايبابى پاش خۆ بهێليت، هەرئێك ژ وان نيڤ دگەهيتێ وەكى ئێك.
كراسێ پێنجێ: هەكە ژنەك بمريت خويشكەكا بابێ پاش خۆ بهێليت هەرئێك ژ وان نيڤ دگەهيتێ وەكى ئێك.
كراسێ شەشێ: هەكە ژنەك بمريت و زەلامێ خۆ و دايكا خۆ و خويشكا خۆ يا دايبابى پاش خۆ بهێليت، نيڤ دگەهيتە زەلامى و نيڤ دگەهيتە دايكێ.
كراسێ حەفتێ: هەكە ژنەك بمريت و زەلامێ خۆ و خويشكەكا دايبابى و خويشك و برايەكێ دايكێ پاش خۆ بهێليت، نيڤ بۆ زەلاميە و نيڤ بۆ خويشكا دايبابيە و يێت دى د زربارن.
كراسێ هەشتێ: هەكە زەلامەك مر و ژنەك و دوو كچ و دايك و باب پاش خۆ هێلان، شەشێك بۆ بابێيە و شەشێك بۆ دايكێيە و هەر كچەكێ سێكەكە هەژيە بێژين كچ ل ڤێرێ پتر ژ باپيرى وەردگريت.
كراسێ نەهێ: هەكە زەلامەك مر و ژنەك و دوو كچ و دايك و باب پاش خۆ هێلان، ميرات دبيتە بيست و حەفت پشك، سێ پشك دگەهنە ژنێ و شازدە پشك دگەهنە كچان هەر ئێكێ هەشت پشك و دايك و بابان وەكى ئێك هەر ئێكێ چار پشك دگەهنێ، ديسا هەژيە بێژين: د ڤى كراسيدا كچ دوو جار هندى باپيرێ خۆ وەردگرن.
كراسێ دەهێ: هەكە زەلامەك مر و دايكەك و خويشكەك و باپيرەك پاش خۆ هێلان، سێك بۆ دايكێيە و سێك بۆ باپيرى و يێ مايى بۆ خويشكێيە، ئانكو هەمى وەكى ئێك وەردگرن.
و د پازدە كراسێت ديدا كچ پتر ژ زەلامى وەردگريت، بۆ نموونە: دوو سێ كراسان دێ دياركەين ژبلى وان ئەڤێت بەرى نوكە دگەل مە بۆرين:
نموونا ئێكێ: هەكە زەلامەك مر و دايك و دوو كچ و برايەك پاش خۆ هێلان، دوو پشك دگەهنە دايكێ و هەر كچەكێ چار پشك دگەهنێ و براى دوو پشك ب تنێ دگەهنێ. بەرێ خۆ بدآ هەر كچەك دوو جار هندى مامێ خۆ وەردگرن.
نموونا سيێ: هەكە زەلامەك مر و دوو كچ و باب و دايك پاش خۆ هێلان، ميراتێ وى دبيتە دوازدە پشك: دوو دگەهنە دايكێ و دوو دگەهنە بابێ وەكى ئێك و كچان هەشت پشك دگەهنێ هەر ئێكى چار پشك، ئانكو هەر ئێك دوو جار هندى باپيرێ خۆ وەردگريت.
و هندە كراسێـت هەين ميرات دگەهيتە ژنێ و زەلامى چو ناگەهيتێ، وەكى هەكە ژنەك مر و زەلام و خويشكەكا دايبابى و خويشك و برايەكێ دايكێ پاش خۆ هێلان، نيڤا ميراتێ وێ بۆ زەلاميە و نيڤ بۆ خويشكا دايبابيە و چو ناگەهيتە خويشك و برايێ دايكێ.
د ڤان رۆنكرنێت كورت يێت بۆريدا بۆ مە باش و باش و ب رەنگەكێ گۆمانبر دياربوو ئاخفتنا ڤەكرى دهێتە گۆتن پشكا ژنێ د ئيسلامێدا ژ ميرات وەرگرتنێ نيڤ پشكا زەلاميە ئاخفتنەكا خەلەت و بێ وژدان و يا زالم و ستەمدارە، و هەكە ڤەكۆلەر و تويژاندنكار هەمى سيستەمان بخوينن و ڤەكۆلن ئەو چو سيستەمێت وەكى ئيسلامێ عادل و دادپەروەر نابينن د لێكڤەكرنا ميراتيدا، چاوە نە و چێكەرێ مە چێكەرێ ژن و مێران ئەو سيستەم يێ دانايى و ئەو د قورئانا خۆ يا پيرۆزدا پشتى كۆمەكا پشك و باران دياركرى دبێژيت: ((بَاؤُكُمْ وَأَبْنَاؤُكُمْ لَا تَدْرُونَ أَيُّهُمْ أَقْرَبُ لَكُمْ نَفْعًا فَرِيضَةً مِنَ اللَّهِ إِنَّ اللَّهَ كَانَ عَلِيمًا حَكِيمًا)) بابێت هەوە و زارۆكێت هەوە، هوين نوزانن كى ژ وان پتر د خێرا هەوەدايە، ژبەر هندێ خودێ هەر ئێكى پشك و بارێت وى دياركرن، ئەڤ ئەركە ژ بەرێ خودێڤە ل سەر هەوە هاتە دانان، ب راستى خودێ يێ زانا و كار بنەجهە. و دويماهيكا ئايەتا ميراتێ ژن و مێراندا دبێژيت ((وَصِيَّةً مِنَ اللَّهِ وَاللَّهُ عَلِيمٌ حَلِيمٌ)) ئەڤە فەرمانە ژ خودێ، و خودێ زانا و حەليمە، و خودێ چێتر دزانيت.
