ب / ئيسلامێ.. بۆ رێزگرتن و قەدر و بهايەكێ تايبەت بۆ ژنێ، ل سەر نەدانايە كارێ دەرڤەى مالێ بكەت، بەلێ ئەڤە هندێ ناگەهينيت حەرامە ئەو دەركەڤيت و پشكداريێ د پێشخستن و ئاڤاكرنا جڤاكيدا بكەت، و هەرگاڤا مەرجێت شەرعى بەرچاڤ هاتنە وەرگرتن دورستە ژن بۆ كارێ دويف سروشتێ وێ دهێت و پێدڤيێت ڤى چەرخى دخوازن دەركەڤيت، و ئەو مەرج ژى ئەڤەنە:
ئێك: ئەو كارێ بۆ دەركەڤيت يێ حەلال بيت و حەرامى تێدا نەبيت.
دوو: پێگريێ ب جلكێ خۆ يێ شەرعى بكەت و مەرجێت جلكى هەميان ب جه بينيت.
سێ: ئاوايێ رێڤەچۆنا وى يا ئاسايى بيت و نەبيتە ئەگەرێ چاڤزڤراندنێ، هەروەكى خودێ مەزن دبێژيت: ((وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ الْجَاهِلِيَّةِ الْأُولَى)) و جوانيا خۆ ئاشكەرا نەكەن وەكى ئاشكەراكرنا سەر وەختێ نەزانينا بەرێ ب رێڤەچۆنەكا شكەستن و خوار و ڤيچى و نازدارى تێدا، و ديسا هەر ل سەر ڤى بابەتى دبێژيت : ((وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِنْ زِينَتِهِنَّ)) و بلا پێت خۆ ل عەردى نەدەن، دا چەكێ خۆ يێ ڤەشارتى حنجۆلێت پيان ئاشكەرا بكەن، ئانكو: رێڤەچۆنا وێ يا وەسا نەبيت بێژتە غەيرى خۆ بەرێ خۆ بدەنە من.
چار: دڤێت ئاوايێ ئاخفتنێ بەرچاڤ وەرگريت و نازك و نازداري دگەل زەلامان نەئاخڤيت، چونكى ئاخفتنا نازك و نازدارى تێدا نامێت خەلەت بۆ يێ بەرامبەر دهنێريت و شەيتان دلێ وى خەلەت دكەت و د بەر خەلەتيێرا دبەت، خودێ مەزن دبێژيت: ((يَا نِسَاءَ النَّبِيِّ لَسْتُنَّ كَأَحَدٍ مِنَ النِّسَاءِ إِنِ اتَّقَيْتُنَّ فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَعْرُوفًا)) ئانكو: گەلى ژنێت پێغەمبەرى هوين نەوەكى چو ژنێت دينە، ئەگەر هوين تەقوايا خودێ بكەن، ڤێجا ئاخفتنا خۆ ب نازكى نەكەن وەختێ هوين دگەل زەلامان دئاخڤن، دا ئەوێ نەساخى و خرابى د دليدا هەى تەمايى نەكەفتە دلى، و ئاخفتنەكا عەدەتى باخڤن.
مەرجێ پێنجێ: هند ئاخفتنێ دگەل زەلامى بكەت هندى هەوجەيى دخوازيت و پێدڤى و زێدەتر نە، و دڤێت ئەم بزانين باراپتر ژ خەلەتيێت د ناڤبەرا ژن و زەلاماندا روى ددەن ب رێيا ميانەتا زێدەيە و ئاخفتنا درێژيێ ددەتە خۆ د ناڤبەرا واندا و يا سوحبەتەك دكێشيتە سوحبەتەكا دى و هەوجەيى بۆ نەى.
مەرجێ شەشێ: چاڤگرتنە ژ بەرێخۆدانا حەرام و نەدورست، هەكە ئەڤ مەرجە بەرچاڤ هاتنە وەرگرتن و ژنێ پێگرى پێ كر.. بۆ هەيە دەركەڤيت بۆ وى كارێ وێ بڤێت، و خودێ چێتر دزانيت.
