ب/ ئيسلامخوازى و دەعوە بۆ دينێ خودێ سەرفەرازى و پەرستنە، و قەدر و عيبادەتە، خودايێ مەزن ئەمر دكەت ((وَمَنْ أَحْسَنُ قَوْلًا مِمَّنْ دَعَا إِلَى اللَّهِ وَعَمِلَ صَالِحًا وَقَالَ إِنَّنِي مِنَ الْمُسْلِمِين)) ما ئاخفتنا كێ ژ يا وى چێترە ئەوێ بۆ رێكا خودێ گازى خەلكى بكەت، و كار و كريارێت دورست دكەت و بێژيت ب راستى ئەز موسلمانم. و ئەڤە ژ ژن مێران دگريت بێ فەرق و جوداهي، و ئيسلامخوازى ئەو رێكە يا دلێت پەردەكرى ڤەدكەت و دلێت رەق نەرم دكەت، و ئەو رێكە يا چاڤێت تارى رۆن دكەت و گوهێت گران ڤەدكەت و خەلكى بەر ب دينێ خودێڤە دئينيت، و رێكا هەمى پێغەمبەرانە سلاڤێت خودێ ل سەر وان بن هەر ژ ئادەم پێغەمبەر بگرە هەتا دگەهيە پێغەمبەرێ مە يێ خۆشتڤى (سلاڤێت خودێ لێ بن). خودايێ مەزن دبێژيت: ((رُسُلًا مُبَشِّرِينَ وَمُنْذِرِينَ لِئَلَّا يَكُونَ لِلنَّاسِ عَلَى اللَّهِ حُجَّةٌ بَعْدَ الرُّسُلِ وَكَانَ اللَّهُ عَزِيزًا حَكِيمًا)) ئەو پێغەمبەر مزگين ئين و ئاگەهداركەر بوون، دا مرۆڤان پشتى هنارتنا پێغەمبەران چو هێجەت بەرانبەرى خودێ نەمينن و خودێ ب خۆ ژى يێ سەردەست و كار بنەجهە، و رێكا هەر كەسەكێيە خۆ دويفچۆيێ پێغەمبەرى بزانيت چ ژن چ مێر و خۆ ژ وان بدانيت يێت رێكا پێغەمبەرى گرتين. خودايێ مەزن د قورئانا خۆ يا پيرۆزدا دبێژيتە پێغەمبەرێ خۆ: ((يَا أَيُّهَا النَّبِيُّ إِنَّا أَرْسَلْنَاكَ شَاهِدًا وَمُبَشِّرًا وَنَذِيرًا))(( وَدَاعِيًا إِلَى اللَّهِ بِإِذْنِهِ وَسِرَاجًا مُنِيرًا)) هەى پێغەمبەر مە تو يێ هنارتى دا ببيە شاهد و مزگين ئين و ئاگەهداركەر و بانگهەلدێر بۆ دينێ خودێ، ديسا ئەمر دكەت و دبێژيتە پێغەمبەرێ خۆ: ((قُلْ هَذِهِ سَبِيلِي أَدْعُو إِلَى اللَّهِ عَلَى بَصِيرَةٍ أَنَا وَمَنِ اتَّبَعَنِي)) هەى موحەممەد بێژە ئەڤە رێكا منە كو دەعوە و بانگخوازيە بۆ ڤى دينى، و ئەز ب زانين و بەلگەيێت ئاشكرا بانگى بۆ رێكا خودێ هەلددێرم ئەز و هندى دويف من كەفتين چ ژن چ مێر بێ فەرق و جوداهي، لەوا دڤێت ئەڤ رێكە هەر يا بەردەوام بيت هەتا رۆژا قيامەتێ، و نابيت ب چو رەنگان دەستان ژێ بەردەين و سستيێ تێدا بكەين و ئەم هەمى ژن و مێر. من نەڤێت فەلسەفەكێ بكەم و سەرێ هەوە گێژكەم گەلەك بەلگە و نيشان و دەليلان رێزكەم ديار ببيت ئەڤێت دبێژن بانگخوازى و ئيسلامخوازى ل سەر ژنێ نەواجبە و ناهێلن ژن رۆلێ خۆ ببينيت، ما ئەو بەرێ خۆ نادەنە دەستپێكا هاتنا ئيسلامێ كا دەعوە بەس د ناف زەلاماندا يا بەلاڤ بوو و بەس زەلام ب دەعوێ رادبوون؟! باشە دەورێ دايكا مە موسلمانان خەديجايێ (خودێ ژێ رازی بیت) چ بوو؟! و دەورێ ئەسمايێ (خودێ ژێ رازی بیت) د مشەختبوونا پێغەمبەريدا (سلاڤێت خودێ لێ بن) چ بوو؟! باشە شەهيدا ئێكێ د ئيسلامێدا كى بوو؟! باشە ژنێ پشكدارى د مشەختبوونا ئێكێ و يا دووێدا بۆ حەبەشە و مەدينێ كر يان نە؟! باشە دەمێ ئەبو بەكر هاتيە ئێشاندن و هاى ژ خۆ نەمايى پشتى هشيار بووى و ڤياى دەنگ و باسێت پێغەمبەرى (سلاڤێت خودێ لێ بن) بزانيت داخوازا كێ كر زەلامان يان يا فاتيما كچا خەتابى (خودێ ژێ رازی بیت) ؟! باشە ئەگەرێ موسلمانبوونا عومەرێ كورێ خەتابى عيملاقێ ئيسلامێ كى بوو ژن بوو يان زەلام؟! باشە سۆز و پەيمانا عەقەبە يا دووێ ژن يا پشكدار بوو يان نە؟! باشە خيتابا شەرعى ژن و مێران وەكى ئێك ناگريت دەمێ دبێژيت؟!: ((وَادْعُ إِلَى رَبِّك))و بۆ رێكا خودايێ خۆ گازى خەلكى بكە، ئەرێ ئەڤ گازيە و ئەڤ ئەمرە بۆ زەلامى ب تنێيە يان ژ هەردوويان دگريت؟ يان دەمێ دبێژيت: ((ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ)) و ب حيكمەت، ئانكو ب ئاخفتنا بنەجه و موكوم و ب دەليل و نيشان و ب نەرمى و ب ئاوايەكێ كارلێكەر و شيرەتا قەنج كو پێ بزانن تە ب وان شيرەتان خێرا وان دڤێت، و تە چو مەرەمێت دى نينن يان ژى ب قورئانێ ئەوا كو ئەو ب خۆ حيكمەت و شيرەتكارەكا قەنج، بانگهلدێرە بۆ رێكا خودايێ خۆ كو ئيسلامە، ئەرێ ئەڤە ئەمرە ل هەردوويان دهێتەكرن يان ل زەلامى تنێ ژبلى ژنێ؟! دەمێ دبێژيت: ((وَلْتَكُنْ مِنْكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَأُولَئِكَ هُمُ الْمُفْلِحُونَ)) بلا هوين هەمى ببنە ملەتەك، داخوازا قەنجييێ بكەن و فەرمانا چاكيێ بكەن، و خەلكى ژ خرابيێ بدەنە پاش، و هەر ئەڤەنە د سەرفەراز. و ل ڤێرێ ژى ديار دبيت كەس نينە ئەڤ بريارە ژێ نەگريت.. و كەس نينە بێژيت ئەڤ ئەمرە ژ من ناگريت.. و كەس نينە بێژيت ئەز ژ وان نينم يێت كو دڤێن ب گازيا دينێ خودێ رابن و هندەكێت دى دێ شوينا من پێ رابن، ئەرێ ئەڤە بەحسێ زەلامى ب تنێيە و كەسەك جهێ كەسەكێ دى دگريت زەلام شوينا ژنێ؟! نەخێر كەس شوينا كەسێ ناگريت، و پێدڤيە ل سەر مە هەمى كەسان ـ هەر ئێك د جهێ خۆدا ژن و زەلامان ـ گازيا دينێ خودێ بكەت، و هەر ئێك ژى پێدڤيە بزانيت ب رێكەكێ دڤێت دەعوا دينێ خۆ بكەت، ديسا دەمێ دبێژيت: ((وَتَعَاوَنُوا عَلَى الْبِرِّ وَالتَّقْوَى)) و ل سەر باشى و پارێزكاريا خودێ هاريكارێت ئێك بن، ئەرێ ئەڤە ئەمرە يان نە؟! ژن و زەلامان دگريت يان نە؟! باشە بانگخوازى و ئيسلامخوازى باشيە يان خرابيە؟! باشە هەكە باشى بيت پا نە ئەرك و واجب و پێدڤيە ل سەر هەمى كەسان ژن و مێران هاريكارى هەڤبن ل سەر؟! ديسا دەمێ دبێژيت: ((وَالْعَصْرِ))((إِنَّ الْإِنْسَانَ لَفِي خُسْرٍ))(( إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ)) سويند ب دەمى. ب راستى مرۆڤ هەمى د خوسارەتن (بەر خوسارەتن). ئەو نەبن ئەوێت باوەرى ئيناين، و كار و كريارێت قەنج كرين، و هەڤدوو ل سەر هەقيێ شيرەت كرين، و هەڤدوو ب بێنفرەهيێ شيرەت كرين. هەلبەت ل ڤێرێ ژى يا ديارە خودايێ مەزن سويند دخۆت كو مرۆڤ هەمى د خوسارەتن ژن و مێر نە زەلام ب تنێ ژبلى ژنان ئەو نەبن يێت ب كارێ دەعوێ و گازيا دينێ خودێ رادبن و بێهنا خۆ ل سەر ئەزيەت و نەخۆشيان ژى دكێشن ئەوێت د رێكا ڤێ گازيێدا دگەهنێ. ڤێجا هەكە چو بەلگە و نيشانێت دى د قورئانێدا نەبن سۆرەتا عەسر نەبيت بەسى مەيە ئەم بزانين گازيا دينێ خودێ ل سەر مە هەميان واجبە ژن و مێران، و دڤێت ئەم بكەين هەكە مە ژن و مێران بڤێت ئەم ژ خوسارەتان نەبين. ديسا دەمێ دبێژيت: ((وَالْمُؤْمِنُونَ وَالْمُؤْمِنَاتُ بَعْضُهُمْ أَوْلِيَاءُ بَعْضٍ يَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ))ئەڤ ئايەتە چو هێجەتان بۆ كەسێ ناهێليت نە ژنان، نە ئەو زەلامێت باوەرى ب ئەركێ بانگخوازيا ژنێ نەى و رێكا وێ دگريت و نەهێليت ژن ب ڤى واجبێ پيرۆز رابن، واجبێ ئەمر ب باشيێ و دانەپاش ژ خرابيێ، و ل ڤێرێ نابيت ژن هزر بكەت يان زەلامەك هزر بكەت ژن نەيا داخوازكريە بۆ ڤى واجبى و ئەركى، بەلكى ئەو ژى وەكى زەلاميە د ڤى ئەركيدا، و دەستپێكێ كەسێ ئێكێ باوەرى ب پێغەمبەرى (سلاڤێت خودێ لێ بن) ئيناى و پشتەڤانى و هاريكاريا وى كرى ژن بوو (خديجە) دايكا مە موسلمانان. ڤێجا نابيت ئەڤرۆ ئەڤ كۆما هندە يا مەزن خۆ ژ جڤاكي بدەتە پاش و بێژيت مانێ زەلام تنێ دەعوێ دكەن، بەلكى ل سەر وێ ژى واجبە وەكى زەلامى ﭽ ﮑ ﮒ ﭼ بەرێ خۆ بدێ هەكە ئەو خۆ ژ (مۆمناتان) حسێبكەت پێدڤيە بزانيت ل سەر وێ ئەركە هاريكاريا برايێ خۆ بكەت و دەعوا دينێ خودێ بكەت و دەست ژێ بەرنەدەت، و خودێ چێتر دزانيت.
