ب / پێگوهۆركى هەكە كچ ب كچێ بيت و ژن ب ژنێ بيت و ئێك بۆ يا دى ببيتە مەهر ئەڤ كچە مەهرا يا دى، و يا دى مەهرا ئەڤێيە، هەكە ئەڤە مەرجێ وان بيت ل دەف هەمى زانايان ئەڤ ماركرنە يا حەرامە و نەيا دورستە، چونكى پێغەمبەرى (سلاڤێت خودێ لێ بن) دگەلەك حەديسێت دورستدا يا ئاشكراكرى ئەڤ رەنگێ پێگوهۆركيێ يێ حەرامە ژ وان موسلم و بوخارى ژ ئبن عومەرى (خودێ ژێ رازی بیت) ڤەدگێرێن ژ پێغەمبەرى (سلاڤێت خودێ لێ بن): (أن رسول الله (سلاڤێت خودێ لێ بن) نهى عن الشغار والشغار أن يزوج الرجل ابنته على أن يزوجه ابنته وليس بينهما صداق)، بەلێ هەكە پێكهاتنە گوهارتن و هەرێك مەهرا وان يا تايبەت هاتە دياركرن و بۆ ئێكدوو نەبوونە مەهر، و بۆ هەرئێكێ مەهرەكا تايبەت هاتە دياركرن ئەڤ مارەكرنە ديسا جهێ جودابوونێيە د ناڤبەرا زاناياندا، ئيمامێ شافعي و ئيمام مالك و ئيمام ئەحمەد د ريوايەتەكێدا مادەم مەهر هاتە دياركرن و گۆتن و بۆ ئێكدوو نەبوونە مەهر.. مارەكرن يا دورستە و نەيا حەرامە، بەلێ ئەزموون و سەربۆران يا دياركرى ئەڤ رەنگێ مارەكرنێ نە د سەرفەرازن و پر گرفتارى و ئارێشەنە، لەوا هەكە ئەم خۆ ژێ دوير بێخين گەلەك باشترە، نەخاسمە گەلەك زانا ژ وان ئيمام ئەحمەد د ريوايەتەكێدا و ئبن حەزم دبێژن: مادەم مەرجێ وان پێگوهۆركيە مەهرێ دەستنيشانكەن يان دەستنيشان نەكەن هەر ئەو پێگوهۆركيە يا پێغەمبەرى (سلاڤێت خودێ لێ بن) نەهى ژێ كرى، و خودێ چێتر دزانيت.
