ب / هەكە كچ يا تێگەهشتى بيت و ل سەر بنياتەكێ دورست نەرازيبوونا خۆ ديار دكەت و بێژيتە دايبابێت خۆ: داخوازا هەوە و حەزكرنا هەوە ل سەر چاڤێت من، بەلێ من نەڤێت و ئەز حەزناكەم شوى پێ بكەم، و ئەگەرێت خۆ هەبن نەيا گونەهكارە و دايبابان حەق نينە دلێ خۆ بهێلن يان خورتيێ ل كچێ بكەن، و كچ پتر نەيا گونەهكارە، هەكە بابێ يان دايكێ بەرژەوەنديى و هەوجەييەكا تايبەت هەبيت ئێكجار هنگى كچ نەيا گونەهكارە خۆ نەرازيكەت، چونكى كچەك هاتە دەف پێغەمبەرێ خۆشتڤى (سلاڤێت خودێ لێ بن) بەلێ نەديت ئينا چيرۆكا خۆ بۆ دايكا مە موسلمانان عائيشايێ (خودێ ژێ رازی بیت) ڤەگێرا، گۆت: بابێ من ئەز يا دايمە برازايێ خۆ و ب دلێ من نينە و دڤێت ب من بێ بهاييا خۆ راكەت. عائيشايێ گۆتێ روينە خوارێ هەتا پێغەمبەر (سلاڤێت خودێ لێ بن) دهێت و بێژێ، پێغەمبەر (سلاڤێت خودێ لێ بن) هات و گۆتێ، ئينا پێغەمبەرى (سلاڤێت خودێ لێ بن) فرێكرە دويف بابێ وێرا و گۆتە كچێ: ڤێ گاڤێ تو يا ب كەيفا خۆيى تە دڤێت لێڤەببە و تە دڤێت رازى ببە، ئينا كچێ گۆت: ئەز يا رازيمە ب وى تشتێ بابێ من بۆ من دڤێت، بەلێ من دڤيا ئەز نيشا كچ و ژنێت موسلمانان بدەم و وان ئاگەهداركەم كو كەسێ حەق نينە خورتيێ ل وان بكەت. هەلبەت ئەڤ حەديسە ڤەگێرانا نەسائى و ئبن ماجە و بەيهەقى و دارەقوتنى و تەبەرانى و ئيمام ئەحمەديە، و خودێ چێتر دزانيت.
