ب / ئەڤە بابەتەكێ گرنگە و هەر د وى وەختيدا يێ هەستيارە، لەوا دڤێت خەلەت نەهێتە وەرگرتن و كچ دەرگەهى بەر خۆ فرەه بكەت و بكەڤيتە د خەلەتيێدا و خەلەتى وێ ببەتە نەفەقەكا بێ سيناهي و پاشى پەشێمانى ژى فايدێ وێ نەكەت. بەلێ هەكە ئەو كورێ ئەوێ هزرا خۆ دايە سەر يێ خودێناس و پارێزكار و كێرهاتى بيت و ژبەر كێرهاتى و دينداريا وى حەزكەت شوى پێ بكەت، بۆ هەيە ئەو ب رێكەكێ حەزكرنا خۆ بگەهينيتێ، بەلێ ب مەرجەكى ئەڤ حەزكرنە درێژيێ نەدەتە خۆ و بكێشتە رێكێت خەلەت و خودێ ژێ نەرازى. ئيمامێ بوخارى (خودێ ژێ رازی بیت) ناڤ و نيشانێت بابەتەكى ب ڤى رەنگى ئينايە: (باب عرض المرأة نفسها على الرجل الصالح) بابەتێ خۆنيشادانا ژنێ بۆ زەلامێ كێرهاتى، و ئيمامێ نەوەوى (خودێ ژێ رازی بیت) د شەرحا موسلميدا و ئبن حەجەر (خودێ ژێ رازی بیت) د فەتحێدا و ئبن قەيم (خودێ ژێ رازی بیت) د حاشيا ئەبو داووددا دبێژن: باشە ژن حەزا خۆ بۆ زەلامێ كێرهاتى دياركەت، بەلێ ئەز دبێژم دڤێت رێكەكا وەسا بيت شەرما وێ كو سەرومالێ وێيە نەهێتە برينداركرن و حورمەتا وێ نەشكێت و ئەڤ حەزە درێژيێ نەدەتە خۆ بكێشيتە تشتەكێ دويماهيك نەباش و خراب، ڤێجا دياركرنا ڤێ حەزێ ب رێكا دايكێ، خويشكێ، خالەتێ، براى.. يان ب هەر رێكەكا ب ئنيەتا پاقژ و سنوردايى بيت.
كتێبێت ژيانناما پێغەمبەرى (سلاڤێت خودێ لێ بن) چيرۆكا ژنئينانا ئێكێ يا پێغەمبەرێ خۆشتڤى (سلاڤێت خودێ لێ بن) ب خەديجايێ دايكا مە موسلمانان هەڤالا وێ نەفيسا كچا مونەييە دبێژيت: خەديجا ژنەكا خۆپاراستى و رێكوپێك و خوباوەر و ب هێز و دەهمەن پاقژ بوو، و ژ مالباتەكا مەزن بوو ،هەمى كەسێت ملەتێ وێ هيڤى دكرن بۆ خۆ بخوازن، بەلێ پشتى دلسۆزى و ئەمانەتداريا وى ژ خزمەتكارێ خۆ مەيسەرە گولێ بووى حەزكر شوي ب پێغەمبەرى (سلاڤێت خودێ لێ بن) بكەت سەر خاترا سنج و تۆر و ئەدەب و ئەخلاق و ئەمانەتداريا وى، نە بۆ چو تشتێ دى، چونكى پێغەمبەر (سلاڤێت خودێ لێ بن) يێ هەژار و دەست كورت بوو، و ل دەف مامێ خۆ بوو، مامێ وى خودان دكر، و خەديجا خودان سەر و سامان بوو، و وێ زەلام بۆ بازرگانيێ كرێ دگرتن و ژ زەنگينێت رێزا ئێكێ بوو د ناف قورەيشياندا. ئەڤ حەزا دلێ خۆ بۆ هەڤالا خۆ نەفيسايێ گۆت دا بگەهينيتە پێغەمبەرى (سلاڤێت خودێ لێ بن)، نەفيسا چۆ دەف پێغەمبەرى (سلاڤێت خودێ لێ بن) گۆتێ: بۆ تو ژنێ نائينى؟ گۆت: ما چ د دەستێ مندايە ژنێ پێ بينم؟ گۆت: هەكە پێشتەڤە هەبيت و بێيە داخوازكرن بۆ جوانى و مالى و ماقويلى و هەڤكويفيێ تو قەبويل ناكەى؟ گۆت: ئەو كيە؟ گۆت: خەديجايە، گۆت: و دێ چاوا ئەڤە بيت؟ گۆت: ئەو سەر من؟ گۆت: بلا ئەز دێ كەم، نەفيسا زڤرى و بەرسڤا پێغەمبەرى (سلاڤێت خودێ لێ بن) گەهاندە خەديجايێ، ئينا وێ جابا مامێ خۆ و پسمامێ خۆ وەرەقە هنارت هاتن، و پێغەمبەر (سلاڤێت خودێ لێ بن) و مامێ خۆ ئەبو تالب و ئيمام حەمزە هاتن، خەديجا بۆ پێغەمبەرى (سلاڤێت خودێ لێ بن) خواست و هەڤژينيەكا پيرۆز پێكئينا، و پێغەمبەرى (سلاڤێت خودێ لێ بن) ژن ل سەر نەئينا هەتا چۆيە بەر دلۆڤانيا خودێ. و ژ پيرۆزيا خەديجايێ (خودێ ژێ رازی بیت) پشتى مري ژى پێغەمبەرى (سلاڤێت خودێ لێ بن) ژبير نەكر و هەڤسۆزى بۆ هەبوو، هند ناڤێ وێ دئينا هەتا عائيشا (خودێ ژێ رازی بیت) پێ تێك چۆى هندى پێغەمبەرى (سلاڤێت خودێ لێ بن) مەدحێت وێ دكرن، و ژ قەدرگرتن بۆ وێ پێغەمبەرى (سلاڤێت خودێ لێ بن) قەدرەكێ تايبەت ددا هەڤالێت وێ و كەس و كارێت وێ، و خودێ چێتر دزانيت.
