پ /ب راستى.. كچ يا بوويە قوربانيا گەلەك عەدەت و سەروبەرێت عەشيركى، و زولم و خورتى بەردەوام يا لێ هاتيەكرن، و يا مخابنى بۆ دهێتەكرن و دل بۆ دئێشيت گەلەك جاران ئەڤ ستەم و زولم و زۆرداريە ب ناڤێ دينى لێ دهێتەكرن و دين ژ ڤێ چەندێ يێ بەريە، ب ناڤێ دينى دهێتە قوتان و ئێشاندن، و ب ناڤێ دينى ب خورتى ددەنە شوى و بێى دلێ وێ، و ب ناڤێ دينى دهێتە پاشئێخستن و ناهێلن زانينا خۆ و خواندنا خۆ ببەتە سەرى، و ب ناڤێ دينى ناهێلن رەوشەنبيريێ بۆ خۆ وەرگريت و پشكداريا زەلامى بكەت د رێڤەبرنا ژيانێدا، و ب ناڤێ دينى ناهێلن دەركەڤيت بۆ كار و تشتێ پێدڤى، و دين ژ ڤێ هەميێ يێ بەريە، و بەرامبەر ڤێ هندەك هاتن دا كلكەن كۆرەكر، و ڤيان گلێش و تيڤلێت باژێرڤانيا رۆژهەلاتي بۆ مە بينن و ڤيان ژنێ ژ هەمى بيروباوەرێت وێ دەربێخن، و قوربانى و تەپەسەريا وێ خرابتر لێ كر، و كا چەند زولم و ستەم ل سەر بوو زێدەتر و ستويرتر لێ كر، و ئێك ژ وان زولمێت كچێ دهێتەكرن ئەڤەيە ب ڤى رەنگى سەرەدەرى دگەل ڤى كراسى بێتەكرن، و ئەڤە يا خەلەتە و نەيا دورستە و نەرێكەكا حەكيم و زانستيە، چونكى دبيت يا ستەملێكرى بيت و چو گونەها خۆ نەبيت، چونكى زانست دبێژيت: دبيت پەردا وێ يا كچينيێ يا مەتاتى بيت و نەدريێت هەتا بچويكێ خۆ يێ ئێكێ نەدانيت، و ديسا دبيت ژبەر ئەگەرەكى ژ ئەگەران كچينيا خۆ ژ دەست دابيت و نە ژ دەهمەن پيسيێ، وەكى ژ جهەكێ بلند كەتبيت يان حێل خۆ هاڤێتبيت يان تشتەكێ گران ب جهێ نامويسا وێ كەفتبيت يان عادا نهێنى ب دەستى كربيت يان خوريان ل جهێ نامويسا وێ بيت و ب دەستى خوراندبيت، دبيت ب ڤان ئەگەران هەميان پەردا كچينيێ نەمابيت وێ گونەها خۆ نينە، ڤێجا نابيت لەز بێتەكرن و هەلويستەكێ خەلەت بێتە وەرگرتن.. نەخاسمە كوشتن، چونكى كوشتن ب چو رەنگان نەيا دورستە و يا حەرامە و بۆ كەسێ نينە خۆ هەكە سەد ژ سەدێ يا گونەهبار ژى بيت، و كچ سەرا هندێ ناهێتە كوشتن و نابيت مرۆڤ گوهێ خۆ بدەتە شەيتانى، و نابێژنە ڤێ غيرەت و دەعياتى ئەڤە گوهدان و دويفچۆنا شەيتانيە و خۆ هەكە كچێ خەلەتيەك ژى كربيت دبيت يا پەشێمان بيت بۆ خۆ تۆبە كربيت هەلويست و سەرەدەريا دورست بێتە پاراستن و سۆز و پەيمان ژێ بێنە وەرگرتن ئەو پاك و پاقژيێ راگريت و ب دورستى تۆبە بكەت، چونكى پێغەمبەرێ خۆشتڤى (سلاڤێت خودێ لێ بن) د حەديسا بوخارى و موسلميدا دبێژيت: (هەركەسێ موسلمانەكى پەردە و ستارەكەت، خودێ دێ وى رۆژا قيامەتێ ستارەكەت) بەلكى د ريوايەتا موسلميدا دبێژيت: (هەركەسێ موسلمانەكى پەردە و ستارەكەت، خودێ دێ وى د دنيا و ئاخرەتێدا ستارەكەت) و هەكە هەرئێكێ ژ مە هزرا خۆ بكەت كا وێ رۆژێ چەند هەوجەى پەردە و ستارەكرنێيە، چونكى وێ رۆژێ چو بەرزەنابيت هەكە وى ل دنيايێ خەلك ستارەكربيت و هەتكا وى نەبربيت خودێ ژى رۆژا قيامەتێ دێ وى ستارەكەت و هەتكا وى د ناف خەلكێ مەحشەرێدا نابەت، و خودێ چێتر دزانيت.
