ب / بەلێ ئەڤ دوعايەيە، نەبەس يا دورستە، بەلكى دوعايەكا زێدە يا بەركەفتى و جوانە، چونكى چ كور چ كچ هەكە دويماهيەكا باش بڤێن و د هشيار بن ل سەر پاشەرۆژ و دويندەه و زوريەتا خۆ دێ كاركەن و دوعاكەن خودێ وان دگەل هەڤژينەكێ باش و خودێ ترس كۆمكەت، و خۆزى هەمى گەنجان كچ و كوران ئەڤ دوعايە كربان و زانيبان باشترين دەسكەفتي و نيعمەت خودێ ڤێ نيعمەتێ دگەل بكەت، چونكى پێغەمبەر (سلاڤێت خودێ لێ بن) دبێژيتە گەنجان ژ گۆران هەروەكى د بوخارى و موسلمێدا هاتى: (تُنْكَحُ المَرْأَە لأَرْبعٍ: لِمالِهَا، وَلِحَسَبِهَا، وَلِجَمَالِهَا، ولِدِينِهَا، فَاڤفَرْ بِذاتِ الدِّينِ تَربَتْ يدَاك) ژن بۆ چار تشتان دئێتە مارەكرن: بۆ مالێ وێ و بۆ مالباتا وێ و بۆ جوانيا وێ و بۆ دينێ وێ، بگەهە يا خودان دين (هەكە تە وەنەكر و ل سەر ڤى بنياتى ژن نەهەلبژارت) دەستێت تە ب ئاخێ بكەڤن و هەژار ببى. و ژ ڤێ حەديسێ ديار دبيت خەلك بارا پتر ژنێ ژبەر ڤان هەرچار خسلەتان دهەلبژێرن، ڤێجا تو ل سەر يا خودان دين رژدبە و وێ بگەهينە خۆ و ل سەر هەڤالينيا وێ يێ رژدبە. ديسا دبێژتێ هەروەكى د موسلمێدا هاتى: (الدُّنْيا مَتَاعٌ، وَخَيْرُ مَتاعهَا المَرْأَة الصَّالحە) ئانكو: دنيا خۆشيەكا بەروەختە، و باشترين خۆشيا دنيايێ ژنا باشە. و دبێژتە كچان و دايبابان: (إذا جاءكم من ترضون دينه وخلقه فأنكحوه إلا تفعلوه تكن فتنە في الأرض وفساد عريض) گەلى دايبابان و سەركارێت كچان.. هەكە ئەو هات كچێت هەوە بخوازيت يێ هوين ژ دين و ئەخلاقێ وى رازى بدەنێ و هەكە وەنەكەن دێ بەلا و خرابيەكا مەزن د عەرديدا چێبيت. هەژيە بێژين پێغەمبەرى (سلاڤێت خودێ لێ بن) سێ جاران ئەڤ ئاخفتنە دوبارەكر دا دايباب و سەركاران چو هێجەت نەمينن ديندار و ئەخلاقداران ڤەگێرن، و دويماهيێ كچ يا رژد بيت شوى ب كورەكێ موسلمان بكەت ئێك ژ كارێت دورستە، ڤێجا بۆ هەيە ب دوعايێ يان ب هەر رێكەكا دى يا دورست هەبيت كار بكەت بۆ جهئينانا ڤێ داخوازيێ، ژبەر هندێ ئيمامێ بوخارى بابەتەك د كتێبا خۆدا بن ڤى ناڤ و نيشانى ئينايە دياركەت ئەڤە مافەكێ كچێيە (عرض المراة نفسها على الرجل الصالح)، و خودێ چێتر دزانيت.
