ب / ب رەنگەكێ گشتى كرنا وەرزشێ د ئيسلامێدا هەكە يا ئارمانجدار بيت و ئارمانج ژێ هێزئێخستنا جان و لەشى بيت چو تێدا نينە و يا دورستە، و پێغەمبەر (سلاڤێت خودێ لێ بن) دبێژيت: خودان باوەرێ ب هێز چێتر و خۆشڤيترە ل دەف خودێ ژ خودان باوەرێ لاواز، و خێر يا د هەردووكاندا هەى، (چونكى هەردوو خودان باوەرن) بەلێ دڤێت هندە مەرج هەبن:
ئێك: نەبيتە ئەگەرێ هێلانا ئەرك و واجبێت شەرعى، ئانكو: مژويليا ب وەرزشێڤە نەبيتە ئەگەرێ هندێ نڤێژ و واجبێت دي يێت شەرعى ژ مە ببەت، ژ وان: خزمەتكرنا دايبابان يان ئەركێت پێدڤى يێت خواندنێ و هۆسا.
دوو: دڤێت مەخسەدا مرۆڤى ب كرنا وەرزشێ كارەكێ دورست و حەلال بيت، چ هێزئێخستنا لەشى بيت يان بۆ خۆشيا جانى، چونكى هەمى كاروبار ب ئنيەتانڤە د گرێداينە. پێغەمبەرێ خۆشتڤى (سلاڤێت خودێ لێ بن) دبێژيت: (إنَّما الأَعمالُ بالنِّيات، وإِنَّمَا لِكُلِّ امرئٍ مَا نَوَى ) ب راستى هەمى كار و كريار ب ئنيەتانە، و ب راستى بۆ هەر مرۆڤەكى كا چ ئنيەت ئينايە دێ ئەو بيت.
سێ: دڤێت شەرمينگەه ژ لەشێ مرۆڤى يا ڤەشارتى بيت و نەدەركەڤيت.
چار: دڤێت ئەو وەرزشا دهێتەكرن زيانەكا ئاشكرا و دورستى تێدا نەبيت، چونكى نابيت مرۆڤ ب دەستێ خۆ زيانێ بگەهينيتە خۆ و خۆ باڤێژيتە ناف زيانكاريێ.
پێنج: دڤێت قومار ل سەر نەهێتەكرن، چونكى قومار خويشكا مەى و عەرەقێيە.
شەش: دڤێت دژمنى و دژمنكارى و نەڤيان ل سەر نەچێبيت.
پشتى ڤێ.. ئەم دبێژين: دورستە ژن ژى وەرزشێ بكەت، بەلێ دڤێت ئەڤ مەرجێت بۆرى بەرچاڤ بێنە وەرگرتن و يێت تايبەت و وێڤە ژى بكەڤنە دگەل. و بەلگە ل سەر وەرزشا ژنێ.. پێغەمبەرێ مە (سلاڤێت خودێ لێ بن) هەروەكى ئەبو داوود و ئيمام ئەحمەد ڤەدگێرن، عائيشا (خودێ ژێ رازی بیت) دبێژيت: د وەغەرەكێدا پێغەمبەرى (سلاڤێت خودێ لێ بن) گۆتە لەشكەرى پێشيا مە بكەڤن، و گۆتە من بەريكانێ دگەل من بكە و من بەريكا وى راكر، و د وەغەرەكا ديدا پشتى ئەز قەلەو بوويم گۆتە لەشكەرى پێشيا مە بكەڤن و گۆتە من: بەريكانێ دگەل من بكە، وى بەريكا من راكر، ئينا گۆت: ئەڤە ب يا دى، ژ ڤێ حەديسێ دهێتە زانين وەرزش و كرنا وەرزشى بۆ ژنێ يا دورستە بەلێ دڤێت پێش چاڤێ زەلامان نەبيت. بەرێ خۆ بدێ هەردوو جاران پێغەمبەرى (سلاڤێت خودێ لێ بن) ئەمرێ لەشكەرى كر پێشكەڤن و بەرى وان بچن و ئەو هەردوو مانە ب تنێ ژ نوى پێغەمبەرى (سلاڤێت خودێ لێ بن) ژ عائيشايێ (خودێ ژێ رازی بیت) خواست دگەل ببەزيت، و دڤێت د وەرزشا ژنێدا دگەل مەرجێت بۆرى مەرجێت تايبەت ب سروشتێ وێڤە بەرچاڤ بێنە وەرگرتن:
ئێك: دڤێت جه يێ ڤالا بيت ژ زەلامان و پێش چاڤێت وان نەبيت و دوير بن ژ چاڤێ كاميرا و موبايلا.
دوو: دڤێت لەشێ ژنێ ژبلى سەر و چاڤان نەدەركەڤن، و هەكە هندە جهێت گرتى بن و كەس ژبلى ژنان لێ نەبن و ئەو جه يێ ئێمن بيت ژ چافكێت كاميرا ب هەمى رەنگان، دڤێت سينگێ وێ هەتا چۆكان يێ ڤەشارتى بيت و جهێت دى دەركەڤن دورستە ئەڤە هەكە د ناف جڤاتا ژناندا بيت و يا ئێمن بيت ژ ديتن و وێنەكرنێ.
سێ: وى وەرزشى بكەت يێ دگەل لەشێ وێ بگونجيت.
چار: هەكە راهێنەر زەلام بيت دڤێت هەمى شەنگستێت سەرەدەريێ بەرچاڤ بێنە وەرگرتن: جلك، ئاخفتن، مانا ب تنێ، دەستكرن.
پێنج: زێرەڤان و راهێنەر ژن بن، و خودێ چێتر دزانيت.
