ب / هەكە مرۆڤى تۆبەكر چ گونەهـ كربيت، خودێ دێ لێبۆريت و گونەهێت وى ژێ بەت، ب مەرجەكى د تۆبا خۆدا يێ راست و دورست بيت، و مەرجێت تۆبێ ب جه بينيت، هەروەكى پێغەمبەرێ خۆشتڤى(سلاڤێت خودێ لێ بن) د حەديسا قودسيدا دبێژيت: خودايێ مەزن دبێژيت: يا كورێ ئادەمى ب راستى هندى تو دوعا ژ من بكەى و هيڤيا ژ من بكەى دێ گونەهێت تە بۆ تە ژێ بەم دگەل وێ يا ل دەف تە (ئانكو دگەل وان گونەهێت تو دكەى) و من خەم نينە (و ل دەف من ئەڤە يا مەزن نينە)، يا كورێ ئادەمى هەكە گونەهێت تە بگەهنە هندى چاڤێت تە قەترە بكەن ژ عەسمانى، پاشى تو داخوازا گونەه ژێبرنێ ژ من بكەى، دێ بۆ تە ژێ بەم، يا كورێ ئادەمى هەكە تو نێزيكى تژى عەردى ب گونەهان بێيە دەف من، پاشى بگەهيە من و تو چو تشتان بۆ من نەكەيە هەڤپشك، ئەز دێ نێزيكى تژى عەردى گونەه ژێبرنێ دەمە تە. بەلێ هەروەكى ئەڤ خويشكە نيشان دكەتە حەديسا پێغەمبەرى (سلاڤێت خودێ لێ بن) ئەوا موسلمى ژ ئەبى هورەيرەى ڤەگێرايى، دبێژيت: پێغەمبەرى (سلاڤێت خودێ لێ بن) گۆت: (صِنْفَانِ من أَهْلِ النَّار لم أَرَهُمَا قَوْمٌ مَعَهُمْ سِياط كَأَذنَابِ الْبَقَر يضربُونَ بها الناس وَنِسَاءٌ كَاسِياتٌ عَارياتٌ مُمِيلَاتٌ مَائِلَاتٌ رؤوسهن كأسنە الْبُخْتِ الْمَائِلَە لَا يدْخُلْنَ الْجَنَّە ولا يجِدْنَ ريحَهَا وَإِنَّ ريحَهَا لَيُوجَدُ من مَسِيرَە كَذا وَكَذا) دوو جوين ژ خەلكێ جەهنەمێ من نەديتينە: جوينێ ئێكێ هندەكن قامچى يێت وەكى كوريێت چێلان يێت ڤێ و خەلكى پێ دقوتن، و هندە ژنن ب جلكن و د رويسن (ئانكو جلكێت بەر، بەلێ لەشێ وان ناگريت، يان د رۆنن، يان د كورتن) دلێ وان ژ گوهداريێ يێ خوارە و غەيرى خۆ ژى ژ گوهداريێ خوار دكن (يان قەبە و شاهى رێڤە دچن، و مل و ستۆيێت خۆ ژ مەزناتى باددەن) سەرێت وان وەكى پشتا حێشترانە، ئەڤە ناچنە بەحەشتێ و بێنا وێ ژى ناگەهيتێ و بێهنا وێ (ئانكو بەحەشتێ) قويناغا هندێ و هندێ دچيت. بەلێ، ئەرێ ئەڤە هندێ دگەهينيت ژنا ژيێ خۆ هەميێ دەرسۆك نەكريێ هەتا مرى ناچيتە بەحشتێ و بێهنا بەحەشتێ ژى ناچيتێ؟! نەخێر، چونكى مە باوەريا هەى هەروەكى قورئانا پيرۆز دبێژيت: ((إِنَّ اللَّهَ لَا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَلِكَ لِمَنْ يَشَاءُ وَمَنْ يُشْرِكْ بِاللَّهِ فَقَدِ افْتَرَى إِثْمًا عَظِيمًا)) ب راستى خودێ گونەها چێكرنا هەڤال و هۆگران بۆ خودێ ژێ نابەت و گونەهێت ديتر ئەڤێت مايين ژبلى شركێ ژێ دبەت، و ب راستى هەركەسێ هەڤالەكى بۆ خودێ چێكەت، ب سويند وى گونەهەكا مەزن كر. پا رامانا حەديسێ چيە (لا ێدْخُلْنَ الْجَنَّة ولا يجِدْنَ ريحَهَا) زانايان چەند ئاراستەكرن بۆ ڤێ بێژەيێ يێت هەين، ئێك: دگەل يێت بەراهيێ ناچيتە بەحەشتێ. دوو: ئەو ناچيتە بەحەشتێ يا ڤى كارى دورست و حەلال بدانيت. سێ: ناچيتە بەحەشتێ هەتا سزايێ خۆ يێ هەژى ژ ئاگرێ جەهنەمێ نەخۆت و نەهێتە پاقژكرن، و ب راستى ئەڤ ئاراستەكرنە ب هێزترە، چونكى مرۆڤێ موسلمان هەروهەر د جەهنەمێدا نامينيت، و پشتى سزايێ گونەهێت خۆ دخۆت دێ چيتە بەحەشتێ، و ئەڤ حەديسە وەكى حەديسا پێغەمبەريە (سلاڤێت خودێ لێ بن) دەمێ ترانە دگەل پيرەژنەكێ كرى گۆتێ: (إن العُجَّز لا يدخلن الجنە) ئانكو: پيرەژن ناچنە بەحەشتێ، هەلبەت مەخسەد ژێ ئەو نينە ناچن، بەلكى دێ بنە گەنج و چن، نەكو ئێكجار ناچن، و هۆسا ئەڤ ژنا پێغەمبەرى (سلاڤێت خودێ لێ بن) ژێ خەبەرداى ناچيتە بەحەشتێ هەتا ب دورستى سزايێ خۆ نەخۆت، و رامانا گۆتنا پێغەمبەرى (سلاڤێت خودێ لێ بن) (ولا يجِدْنَ ريحَهَا) ئيمامێ مەناوى (خودێ ژێ رازی بیت) دبێژيت: بێهنا بەحشتێ دگەهيتە ژن و كچێت موسلمان و ديندار و پێگر ب ئيسلامێ و ئەحكامێت ئيسلامێ و جلكێت شەرعى دكەنە بەر خۆ، هێژ ئەو ل مەحشەرێ و نەچۆينە بەحەشتێ، بەلێ ئەوا پێگريێ ب جلكێ شەرعى نەكەت و يا سەربەرداي بيت بێهنا بەحەشتێ ناچيتێ خۆ هەكە نێزيكى بەحەشتێ ژى ببيت بێهنا بەحشتێ ناهێتێ هەتا سزايێ خۆ تمام نەوەرگريت و هەتا نەچيتە د بەحەشتێڤە، ڤێجا ئەڤا دەرسۆكێ نەكەتە سەرێ خۆ و جلكێت شەرعي دورستاهي نەكەتە بەر خۆ ئەو نەگونەهەكا بچويك دكەت، چونكى گونەها وێ يا بەر دەوامە، گەلەكێت هەين گونەهەكێ جارەكێ يان دوو جار يان سێ جار يان چەند جاران دكەن و دهێلن، ب رۆژ و هەيڤ و سالان ناميننە ل سەر وێ گونەهێ، بەلێ ئەوا بێ ئەمريا خودێ دكەت و جلكێت وێ نە د شەرعي بلا بزانيت ئەو بەردەوام يا د گونەهێدا و گونەها وێ يا بەردەوامە و دبيت يا ب سالان بيت، ڤێجا دڤێت ژ خودێ بترسيت بۆ خۆ تۆبە بكەت و وى جلكى بكەتە بەر خۆ يێ خودێ بۆ ڤيايى و دورستكري نە جلكەكێ وەسا بكەتە بەر خۆ هێژاي وى ئيزاي ببيت ئەوێ پێغەمبەرێ خۆشتڤى (سلاڤێت خودێ لێ بن) گۆتى: ناچنە بەحەشتێ و بێهنا وێ ژى ناگەهيتێ و بێهنا وێ قويناغا هندێ و هندێ دچيت، و خودێ چێتر دزانيت.
