ب / دانا عەيالى چ كچ بيت يان كور كارێ خودێيە، و دڤێت ئەڤە راستى و ل كارايى بيرا مە بيت، و مە باوەريەكا راست و دورست هەبيت، چونكى يێ ڤێ چەندێ ب دورستى و بێ گۆمان بزانيت نەرازيبوونا خۆ ب چو رەنگان ديارناكەت، چ خودێ كور دانێ يان كچ، دڤێت باوەرى ب قەزا و قەدەرا خودێ هەبيت، و چو نەرازيبوونێ بەرامبەر ڤێ قەدەرێ ديارنەكەت، چونكى يێ ددەت كيە؟! خودێيە، ڤێجا تو ژ كێ يێ نەرازى و نەرازيبوونا خۆ بەرامبەر كێ دياردكەي، تو نوزاني خودێ دبێژيت: ((لِلَّهِ مُلْكُ السَّمَاوَاتِ وَالْأَرْضِ يَخْلُقُ مَا يَشَاءُ يَهَبُ لِمَنْ يَشَاءُ إِنَاثًا وَيَهَبُ لِمَنْ يَشَاءُ الذُّكُورَ))(( أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَنْ يَشَاءُ عَقِيمًا إِنَّهُ عَلِيمٌ قَدِيرٌ)) خودانى و فەرمانداريا عەرد و عەسمانان يا خودێيە، چ بڤێت دێ كەت، يێ بڤێت دێ كچان دەتێ و يێ بڤێت دێ كوران دەتێ. يان ژى دێ كور و كچان پێكڤە دەتێ، هەچيێ بڤێت دێ خرش كەت (نە كور دبن و نە كچ..)، ب راستى ئەو يێ زێدە زانا و خودان شيانە. ڤێجا بەرێ خۆ باش بدێ و گوهێ خۆ باش بۆ ڤێ راستيێ ڤەكە، خودێ مەزن چ بڤێت دێ وى دەت و چێ كەت، و ئەڤە كارێ خودێيە، و يێ موسلمان و باوەرداربيت دڤێت خۆ بۆ ڤێ راستيێ بچەمينيت و نەرازيبوونا خۆ بەرامبەر ڤێ چەندێ دياركەت ب هەر رەنگەكى ژ رەنگان و يێ بڤێت دێ كچان تنێ دەتێ و يێ بڤێت دێ كوران تنێ دەتێ و يێ بڤێت دێ كور و كچان پێكڤە دەتێ، و هەچيێ بڤێت دێ خرش كەت نە كور دبن و نە كچ..، ب راستى ئەو يێ زێدە زانا و خودان شيانە. و ژ لايەكێ ديڤە دڤێت دايباب د رژدبن ل سەر وى عەيالێ رۆژا قيامەتێ مفاى دگەهيننێ، چونكى پێغەمبەر (سلاڤێت خودێ لێ بن) د گەلەك حەديساندا دياردكەت رۆژا قيامەتێ دێ گەهيتە هندە خێرێت وى ب دەستێ خۆ نەكرين بەلكى ب رێكا عەيالى گەهشتينێ ژ وان: رۆژا قيامەتێ بابێ عەيالێ قورئان خوين چ كچ بيت يان كور دێ تانجەكێ زێرى دانيتە سەر سەرى ژبەر عەيالێ وى، ديسا پێغەمبەر (سلاڤێت خودێ لێ بن) دبێژيت: هەكە مرۆڤ مر كار و كريارێت وى دهێنە برين سێ تێ نەبن: سەدەقەكا بەردەوام يان زانينەكا مفايى ژێ وەربگريت يان عەيالەكێ باش (كور يان كچ) دوعا بۆ بكەت. و راستيەكا دڤێت ئەم بزانين پێغەمبەرێ خودێ (سلاڤێت خودێ لێ بن) قەدر و بهايەكێ مەزن ل سەر خودانكرنا كچان دانايە، و ئەو قەدر ل سەر خودانكرنا كوران نەدانايە و ئەڤە ژى قەدرێ كچان دياردكەت، پێغەمبەرێ خۆشتڤى (سلاڤێت خودێ لێ بن) هەروەكى موسلمى ڤەگێراى دبێژيت: هەركەسێ دوو كچان خودانكەت هەتا بالغ دبن، رۆژا قيامەتێ دێ هێت ئەز و ئەو وەكى ڤان هەردووكاينە. مەخسەد پێ تلا وى يا شەهدێ و يا نيڤێيە. ديسا دايكا مە موسلمانان عائيشا (خودێ ژێ رازی بیت) دبێژيت هەروەكى د بوخاريێ و موسلمێدا هاتى: ژنەك هاتە دەف من و دوو كچێت وێ دگەل بوون، خازۆكى دكر، چو ل دەف من نەديت ژبلى قەسپەكێ ب تنێ، من ئەو قەسپ دايێ، وێ د ناڤبەرا هەردوو كچێت خۆدا لێكڤەكر، و وێ چو ژێ نەخوار و دەركەفت، پێغەمبەر(سلاڤێت خودێ لێ بن) هاتە دەف مە، من بۆ گۆت: ئينا وى گۆت: هەركەسێ ب تشتەكى ژ ڤان كچان هاتە جەرباندن و ئمتيحانەكرن و ئەو باشيێ بگەهينيتە وان، دێ بۆ بنە پەردە ژ ئاگرێ جەهنەمێ. و دويماهيێ دڤێت ئەم باش و باش و باش خۆ ژ نەرازيبوونا ل سەر دانا كچان دويركەين، چونكى ئەڤە ساخلەتەكێ جاهليەتێيە و ساخلەتێ گاور و نەموسلمانانە. دگەل من بەرێ خۆ بدێ كا خودێ مەزن چ د راستا واندا دبێژيت: ((وَإِذَا بُشِّرَ أَحَدُهُمْ بِالْأُنْثَى ظَلَّ وَجْهُهُ مُسْوَدًّا وَهُوَ كَظِيمٌ))(( يَتَوَارَى مِنَ الْقَوْمِ مِنْ سُوءِ مَا بُشِّرَ بِهِ أَيُمْسِكُهُ عَلَى هُونٍ أَمْ يَدُسُّهُ فِي التُّرَابِ أَلَا سَاءَ مَا يَحْكُمُونَ))و هەر وەختێ مزگينى ب كچێ بۆ ئێكى بێتە دان كو خودێ كچەكا دايێ، دێ نافچاڤێت وى تێكچن و رەش بن، و دێ كەربگرتى بيت و دێ كەربێ داعويريت. ژبەر مزگينيا خراب و ل سەر گران، خۆ ژ خەلكى ڤەدشێريت و نوزانيت ئەرێ وێ كچێ شكەستى و رەزيل بهێليت، يان ژى ب ساخى بن ئاخ بكەت، هشيار بن پيسە حوكمە ئەو دكەن وەختێ ئەو كچێت ئەو پێ نەخۆش ب بال خودێڤە لێ ددەن، و كوران ب بال خۆڤە لێ ددەن. ڤێجا مە ژ تە دڤێت تو هەڤ ساخالەتبى دگەل وان، دان دانا خودێيە و دەستێ كەسێ تێدا نينە و كەس نوزانيت كا كچ پتر د خێرا وێدايە يان كور، و خێرا راستى و يا حەقيقى خێرا ئاخرەتێيە، و هۆسا كچەكا ديندار و ژ خودێ ترس بەرامبەر هژمارەكا كورانە چ مفايێ ئاخرەتێ نەگەهيننە دايبابێت خۆ، و خودێ چێتر دزانيت.
