ب / زارۆك ئەمانەتن د ستۆيێ دايباباندا و دڤێت ڤى ئەمانەتى باش بپارێزن، هەكە رۆژا قيامەتێ دێ ژێ بەرپسياربن و حسێب دێ دگەل هێتەكرن، و ژ پاراستنێيە سنج و تۆر و ئەخلاقێ وان بێتە پاراستن، و مخابن دەركەفتن و سەيرانێت خواندنگەها يێت ژ مەبەست و ئارمانجێت خۆ دەركەفتين و خرابى گەلەك تێدا دهێنەكرن، بەلكى هندەك رێكئێخستى خرابيێ دكەنە تێدا و نەخش بۆ خرابيێ دهێتە دانان و ئەم هەمى كورێت ڤى ملەتينە و ئەم دزانين كارێ رێكئێخستنا گەشت و سەيرانان د دەستێ كێدايە، ڤێجا هەكە ئەو گەشت و سەيرانە ژ ڤى رەنگينە.. بەلێ مافێ دايبابانە نەهێلن زارۆكێت وان پشكداريێ د ڤان گەشت و سەيراناندا بكەن دا وان بپارێزن و تێكەليا خرابان نەكەن و دا نەكەڤنە د خەلەتياندا، و دڤێت عەيال ژى ڤێ تێبگەهين و بزانن كا بۆچى دايبابان نەهێلا، نە چونكى دايبابان خۆشى بۆ عەيالێ خۆ نەڤێت.. نەخاسمە دايكێ، ئەوا رۆژێ هزار جار خۆ گۆرى عەيالێ خۆ دكەت، و هەكە سەرێ ئێكى ئێشيا دلێ وێ ئێشا و ئەزمانێ وێ ب دوعاڤە هاتە گێران و ژ دل دبێژيت: يا خودێ هەكە سەكەراتا مرنێ بيت ئەزبم نە عەيالێ من، تو بێژى ئەو دايكا ب ڤى رەنگى نەڤێت تو خۆشيێ ببەى.. نە، و پاشى سەدجار و هزارجار نە، بەلێ دايكێ نەڤێت خۆشيەكا بەروەخت و كێم ببيتە ئيزا و نەخۆشيەكا گران و بەردەوام، ما هەكە عەيال د وێ سەفرێدا كەفتە داڤ و خەفك و تەپكێت شەيتانى و هەڤالێت خراب بۆ چێبوون كى دێ وى پارێزيت و داڤێت وى ڤەكەت، و بلا خۆشيێت دنيايێ يێت كێم و چونە، چاڤان ل مە تارى نەكەن. بەرێ خۆ بدآ پێغەمبەر (سلاڤێت خودێ لێ بن) چاوا نموونەيا مرۆڤێ ژيێ خۆ د خۆشيێت دنيايێدا بۆراندى كا بەرامبەر تێهەلاندنەكا كێم و سڤك د جەهنەمێدا، دێ چ بێژيت؟ كا چاوا دێ وان خۆشيێت ب سەرێكڤە گرێدايى و د دنيايێدا برين دێ هەلسەنگينيت؟. ئيمام موسلم (خودێ ژێ رازی بیت) ژ ئبن عومەرى (خودێ ژێ رازی بیت) ڤەدگێريت پێغەمبەرى (سلاڤێت خودێ لێ بن) گۆت: (يُؤتِي بَأَنْعَمِ أَهْلِ الدُّنْيا مِن أَهْلِ النَّار يوْمَ الْقِيامَة، فَيُصْبَغُ في النَّار صَبْغَة ثمَّ يُقَالُ: يا ابْنَ آدَمَ هَلْ رَأَيْتَ خيراً قَط ؟ هَلْ مَرَّ بِكَ نَعيمٌ قَط ؟ فيقول: لا واللَّه يارَبِّ. وَيُؤتِى بأَشَدِّ النَّاسِ بُؤساً في الدُّنْيا مِنْ أَهْلِ الجَنَّە فَيُصْبَغُ صَبْغَە في الجَنَّة، فَيُقَالُ لَهُ: يا ابْنَ آدَمَ هَلْ رَأَيْتَ بُؤساً قَط ؟ هَلْ مَرَّ بِكَ شِدَّة قَط ؟ فيقولُ: لا، وَاللَّه، مَا مَرَّ بِي بُؤسٌ قَط، وَلا رَأَيْتُ شِدَّة قَط) رۆژا قيامەتێ يێ ژ هەميان ب خۆشيتر ژ خەلكێ دنيايێ ژ جەهنەميان دێ ئينن، دێ جارەكێ د جەهنەمێ هەلينن ، پاشى دێ بێژنێ: هەى كورێ ئادەمى تە خوشيەك جارەكێ ديتيە؟ ئەرێ جارەكێ خۆشيەك ب سەر تەدا هاتيە؟ دێ بێژيت: نە، ئەز ب خودێ كەمە ئەى پەروەردگارێ من. و يێ ژ هەميان پتر نەخۆشى برين ژ خەلكێ دنيايێ ژ بەحەشتيان ئينن، و دێ جارەكێ د بەحەشتێ هەلينن، پاشى دێ بێژنێ: هەى كورێ ئادەمى تە نەخۆشيەك جارەكێ ديتيە؟ ئەرێ جارەكێ گرانيەك ب سەر تەدا هاتيە؟ دێ بێژيت: نە ئەز ب خودێ كەمە، من نەخۆشيەك جارەكێ نە ديتيە، و جارەكێ گرانيەك ب سەر مندا نە هاتيە. ڤێجا ئەز دبێژمە عەيالى د كونا دەرزيكێرا بەرێ خۆ نەدەنە تشتان؛ دا ب دورستاهي تێ بگەهن، و ئەز دبێژمە دايبابان ژى هەكە خواندنگەه خواندنگەهكا رژد بيت و مامۆستا د باشبن و رێكخستنا گەشت و سەيرانێ د دەستێت واندايە و ئەو دێ سەرپەرشتيا گەشت و سەيرانێ كەن و چاڤدێريا وان كەن و دێ تەقوا خودێ د راستا واندا كەن بلا ب ساناهى بن دگەل عەيالێ خۆ، و دەستويريا وان بدەن، و شيرەتێت پێدڤى، ل وان بكەن و دوعا بكەن، و وان بهێلنە ب هيڤيا خودێڤە پشتى هەوە ئەگەر ب جه ئيناين، و يێ خۆ هێلا ب هيڤيا خودێڤە ئەو بەسى ويە، و خودێ چێتر دزانيت.
