ب / د ناف مالێدا يا فەرە تو خۆ بۆ زەلامێ خۆ كەشخەكەى، و ئەڤە مافەكێ ويە، و هەكە وەنەكەي دبيت تو يا گونەهكاربي. دايكا مە موسلمانان (خودێ ژێ رازی بیت) بۆ ژنان دبێژيت: هەكە تە زەلام هەبيت و تو بشێى چاڤێت خۆ دەربێخى و جوانتر لێ بكەى بكە، و هەكە مال يا گرتى بيت و يا بەرچاڤ نەبيت.. مەرج نينە هەمى دەمان سەرێ تە يێ گرتى بيت و دەرسۆك ل سەر سەرێ تە بيت، نەخاسمە هەكە بەس مەحرەم ل مالێ بن، بەلێ دڤێت تو يا هشيار بي، چونكى مخابن مالێت مە پێگريێ ب فەرمانێت شەرعى يێت جڤاكى ناكەن و گەلەك كەس پێگريێ ب تۆر و ئەدەب و سنجێ سەردەنان ناكەن و قەستا ژۆر دكەن بێى دەرگەه قوتان و دەستوير وەرگرتن، وەكێ خودێ گۆتى: ((يَا أَيُّهَا الَّذِينَ آمَنُوا لَا تَدْخُلُوا بُيُوتًا غَيْرَ بُيُوتِكُمْ حَتَّى تَسْتَأْنِسُوا وَتُسَلِّمُوا عَلَى أَهْلِهَا ذَلِكُمْ خَيْرٌ لَكُمْ لَعَلَّكُمْ تَذَكَّرُون)) گەلى ئەوێت هەوە باوەرى ئيناين، نەچنە د چو خانيانڤە ژبلى خانيێت خۆ، هەتا هوين دەستويريێ وەرنەگرن، و سلاڤ نەكەنە خودانێت وان كو بێژن ((السلام عليكم)) بێمە ژۆر؟ جارەكێ يان سێ جاران، ئەڤە بۆ هەوە چێترە كو هوين بێ دەستويرى و ژ نشكەكێڤە بچنە ژۆر، دا هوين كار ب ڤان رەوشتان بكەن د دەرهەقێ دەستوور وەرگرتنێدا بەرى بچنە د خانيەكيڤە . باراپتر خەلك ب ناڤێ ئەم مرۆڤێت ئێكين يان ئەم مالەكين يان ئەم خوينەكين يان ئەم جيرانێت ئێكين خۆ ل ڤان فەرمانا ناگرن پێگريێ پێ ناكەن و ددەنە مالێت خەلكيڤە و ئەڤە گونەهە و بێ ئەمريا فەرمانا خودێ و پێغەمبەرێ ويە، لەوا ئەز دبێژم يا هشياربە و تە ئاگەه ژ ڤان حالەتان هەبيت و سەركۆليا ژنێ ب ئنيەتا دلێ زەلامێ خۆ خۆشكەت و ب خۆڤە گرێدەت و چاڤێ وى ل دەرڤەى مالێ بگريت عيبادەتە و يا خودان خێرە، چۆنكى پێغەمبەرێ خۆشتڤى (سلاڤێت خودێ لێ بن) دبێژيت: ((إنَّما الأَعمالُ بالنِّيات، وإِنَّمَا لِكُلِّ امرئٍ مَا نَوَى)) ب راستى هەمى كار و كريار ب ئنيەتانە، و ب راستى بۆ هەر مرۆڤەكى كا چ ئنيەت ئينايە دێ ئەو بيت. بەلێ هەكە ب ڤى رەنگى نەبيت و دڤێت بەردەوام خۆ سەركۆلكەى و سەر كۆل دەركەڤى و خۆ سۆراڤ و سپياڤ بكەى و پێ ل فەرمانێت شەرعى بدانى هنگى نابيت تو گوهێ خۆ بدەيێ و گوهداريا وى بكەى، و هەكە تە وەكر تو يا گونەهكارى، چونكى پێغەمبەر (سلاڤێت خودێ لێ بن) دبێژيت: ((لا طاعَە لِبَشَرٍ فِي مَعْصِية اللَّهِ))، و نابيت گوهداريا كەسێ د بێ ئەمريا خودێدا بێتەكرن، و نابيت كەس خۆ رازى بكەت خورتى ژ لايێ زەلامێ مالێڤە يان سەميان و مالخۆيێ مالێڤە لێ بێتەكرن، و بێ ئەمريێ بكەت، و هەكە وەكر گونەه د ستۆيێ تەدايە، و هەكە گۆتە تە خۆ سەركۆلكە و گونەها تە ستۆيێ من، هەر گوهێ خۆ نەدێ و بزانە كەس گونەها كەسێ ب ستۆيێ خۆڤە ناگريت، كو ئێك گونەهێ ل سەر يێ دى راكەت، د ڤى باريدا خودێ دبێژيت: ((وَقَالَ الَّذِينَ كَفَرُوا لِلَّذِينَ آمَنُوا اتَّبِعُوا سَبِيلَنَا وَلْنَحْمِلْ خَطَايَاكُمْ وَمَا هُمْ بِحَامِلِينَ مِنْ خَطَايَاهُمْ مِنْ شَيْءٍ إِنَّهُمْ لَكَاذِبُونَ)) ئانكو: وەنينە كەس گونەها كەسێ ب ستۆيێ خۆڤە ناگريت، بەلكى ئەو دووقات گونەهكارن، ئەوێ دى ژى يێ گونەهكارە، و خودێ چێتر دزانيت.
