ب / دەستپێكێ ئەم دەستخۆشيێ ل تە دكەين و تۆبا تە ل تە پيرۆز دكەين و مزگينيێ ددەينە تە تۆبە گونەهێت بەرى خۆ ژێ دبەت، هەروەكى پێغەمبەرێ خۆشتڤى (سلاڤێت خودێ لێ بن) دبێژيت و ديسا خودێ ژى حەژ تۆبەداران دكەت، خودێ مەزن دبێژيت: ((إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ)) ب راستى خودێ حەژ تۆبەداران دكەت، و هەروەسا حەژ پاقژان ژى دكەت. و يێ عاقل خۆشيەكا كۆرت و كێم نادەتە ب خۆشيا بەردەوام و هەروهەر، چونكى خودێ مەزن دبێژيت: ((وَالْآخِرَةُ خَيْرٌ وَأَبْقَى)) بەلێ يێ تێگەهشتن دورستى نەبيت، خۆشيێت دنيايێ يێت كێم و تخويبدار و ب سەر يێت ئاخرەتێ يێت بەردەوام و بێ دويماهى دئێخن. ڤێجا ئەم هيڤى دكەين خودێ گونەهێت تە ژێبربن هەكە تە تۆبەكا راست و دورست كربيت و قەيدى نينە بچيە دەواتێت ژ تخويبێت شەرعى نەدەركەڤن و بويكان بخەملينى هەكە ديسا خەملاندن و جوانكرنا دويف رێنمايێت شەرعى بيت دورستە و چو تێدا نينە و تو نەيا گونەهكارى، و خودێ چێتر دزانيت.
