ب / ئەم دەستخۆشيێ ل ڤێ خويشكێ دكەين و گرێدانا ب دايكا وێڤە و رژد و هشياربوونا وێ ل سەر باشى گەهاندنێ بۆ دايكا خۆ، و دڤێت چو جار مرۆڤ ل وێ هزرێ نەبيت ب وەغەركرنا دايبابان ماف و حەقێ وان ل سەر عەيالى رابوو، نەخێر نارابيت. و گەلەك حەديسێت دورست د ڤى بابەتيدا ژ پێغەمبەرێ خۆشتڤى (سلاڤێت خودێ لێ بن) هاتينە و ل دۆر خواندنا قورئانێ ل سەر گۆران زانايێت مە يێت بووينە سێ پشك: هەروەكى خودانێ شەرحا تەحاوى د كتێبا خۆدا ئيناى، ديسا هەروەكى ئيمام ئبن تەيميە د كتێبا خۆدا (اقتضاء الصرط المستقيم)دا دئينيت:
بۆچۆنا ئێكێ خواندنا قورئانێ ل گۆرستانێ و ل سەر گۆران مەكروهە و نەباشە، و ئەڤە بۆچۆنا ئەبو حەنيفەيە و ئيمام مالك و ئيمام ئەحمەد دويف ڤەگێرەكێ، چونكى نە د حەديسێدا و نە د قورئانێدا نەهاتيە دورستە قورئان ل سەر گۆران بێتە خواندن، و چونكى قورئان وەكى نڤێژێيە و نەهيا هاتيەكرن نڤێژ ل سەر گۆران بێتەكرن.. هۆسا قورئان خواندن ژي قياس ل سەر نڤێژێ، و پێغەمبەر (سلاڤێت خودێ لێ بن) د راستا مالاندا دبێژيت: (مالێت خۆ نەكەنە گۆرستان، ب راستى شەيتان ژ وێ مالێ درەڤيت يا سۆرەتا بەقەرە تێڤە دهێتە خواندن). ژ حەديسێ دهێتە زانين: قورئان ل گۆرستانا ناهێتە خواندن. لەوا پێغەمبەرێ خۆشتڤى (سلاڤێت خودێ لێ بن) دبێژيت: (مالێت خۆ نەكەنە گۆرستان).
بۆچۆنا دووێ: چو تێدا نينە و دورستە، و ئەڤە بۆچۆنا موحەممەديە ژ حەنەفيان و مەزهەبێ حەنەفيان ل سەر ڤێ بۆچۆنێيە، و ديسا بۆچۆنا ئيمام ئەحمەديە د ڤەگێرەكێدا، بەلگە ژى ژ عەبدوللايێ كورێ عومەرى (خودێ ژێ رازی بیت) هاتيە ڤەگوهاستن وەسيەت كريە دەستپێكا سۆرەتا بەقەرە و دويماهيا وێ ل سەر گۆرێ وى بێتە خواندن دەمێ دهێتە گۆركرن، و ديسا هندە مشەختان ژي وەسيەت كريە سۆرەتا بەقەرە ل سەر گۆرێ وان بێتە خواندن.
بۆچۆنا سيێ: چونينە بەس دەمێ مرى دهێتە گۆركرن نە پشتى هنگى، و ئەڤە بۆچۆنا سيێيە يا ئيمام ئەحمەدى.
و ل دەف ئيمامێ شافعى (خودێ ژێ رازی بیت) ب چو رەنگان نەدورستە، چونكى خێرا قورئان خواندنێ بۆ كەسێ ناچيت، چونكى خودێ مەزن دبێژيت: ((وَأَنْ لَيْسَ لِلْإِنْسَانِ إِلَّا مَا سَعَى)) ئانكو: ژبلى يا مرۆڤى كرى چويێ دى ناگەهيتە مرۆڤى، و ئەو خواندنا غەيرى وى دخوينيت ل دويف ئايەتێ ناگەهيتێ، چونكى وى نەكريە، و ئيمام ئبن تەيميە بۆچۆنا سيێ ب هێزتر ددانيت دورستە قورئان ل سەر گۆرى بێتە خواندن دەمێ مرى دهێتە گۆركرن ژبەر وێ وەسيەتا ژ ئبن عومەرى (خودێ ژێ رازی بیت) و هندە مشەختيان هاتيە ڤەگوهاستن كو قورئان ل سەر وان بێتە خواندن دەمێ دهێنە گۆركرن.
ڤێجا ئەز دبێژمە ڤێ خويشكێ: هەكە نەچيە سەر گۆران ل مال گەلەك قورئانێ بخوينە، و هەر سۆرەتا بخوينى دورستە و مەرج نينە سۆرەتا ياسين تنێ بخوينى و دويماهيكا هەر خواندنەكا هەبيت دوعا بكە خودێ خێرا خواندنا تە خواندى بگەهينيتە روحا دايكا تە، و هيڤيا من ئەوە دێ گەهيتێ، و خودێ چێتر دزانيت.
