ب / دڤێت باب بزانيت كچ ئەمانەتن د ستۆيێ ويدا كا چاوا دڤێت خەمێ ژ خوارن و ڤەخوارن و جلكێت وان بخۆت.. وەسا بەلكى هێژ پتر خەمێ ژ شويكرنا وان بخۆت و رادەستى كەسێت موسلمان و خودێ ترس بكەت، هەكە وەنەكر وى ئەمانەت نەپاراست، و بلا باب بزانن ئەوێت كچێت خۆ نەچار دكەن شوى ب بێ سنج و ئەخلاق و بێ دين و مەى ڤەخۆران دكەن؛ هەر كارتێكرنا د دينێ وێدا چێدبيت گونەه د ستۆيێ بابێدايە، چونكى ئەو ئەگەرێ ڤێ چەندێ بوو. و پێغەمبەر (سلاڤێت خودێ لێ بن) بابان ئاراستە دكەت بۆ كارەكێ د خێرا واندا بەراهيكێ پاشى د خێرا كچێت واندا دبێژيت: (إذا جاءكم من ترضون دينه وخلقه فأنكحوه إلا تفعلوه تكن فتنە في الأرض وفساد عريض) گەلى دايبابان و سەركارێت كچان.. هەكە ئەو هات كچێت هەوە بخوازيت يێ هوين ژ دين و ئەخلاقێ وى رازى.. بدەنێ، و هەكە وەنەكەن دێ بەلا و خرابيەكا مەزن د عەرديدا چێبيت. هەژيە بێژين پێغەمبەرى (سلاڤێت خودێ لێ بن) سێ جاران ئەڤ ئاخفتنە دوبارەكر دا دايباب و سەركاران چو هێجەت نەمينن ديندار و ئەخلاقداران ڤەگێرن، و مافێ كچێيە يا رژد بيت شوى ب كورەكێ موسلمان بكەت و بۆ هەيە دوعايان بۆ خۆ بكەت خودێ بكەتە رزقێ كورەكێ موسلمان، و بلا باب بزانن كچ بۆ وان پەردەنە ژ ئاگرى، هەروەكى دايكا مە عائيشە (خودێ ژێ رازی بیت) دبێژيت بەلێ ب مەرجەكى خۆليێ ب پاشەرۆژا وێ وەرنەكەت و بدەتە كەسێت خودێ نياس و نەدەتە بێ دين و دينسزان. پێغەمبەر (سلاڤێت خودێ لێ بن) دبێژيت هەروەكى موسلمى ژ ئەنەسى (خودێ ژێ رازی بیت) ڤەگێراى: (مَنْ عَالَ جَاريتَيْنِ حَتَّى تَبْلُغَا جَاءَ يومَ القِيامَة أَنَا وَهُو كَهَاتَيْنِ » وَضمَّ أَصَابِعَهُ) هەركەسێ دوو كچان خودانكەت هەتا بالغ بن، رۆژا قيامەتێ دێ هێت ئەز و ئەو وەكى ڤان هەردووكاينە. مەخسەد پێ تلا وى يا شەهدێ و يا نيڤێيە. و د ڤەگێرا بوخارى و موسلميدا ژ عائيشايێ دايكا مە موسلمانان، دبێژيت: ((مَنِ ابْتُلِي مِنْ هَذهِ البَنَاتِ بِشَيْءٍ فَأَحْسَنَ إِلَيْهِنَّ كُنَّ لَهُ سِتْراً من النَّار)) هەركەسێ ب تشتەكى ژ ڤان كچان هاتە جەرباندن و ئمتيحانەكرن و ئەو باشيێ بگەهينيتە وان، دێ بۆ بنە پەردە ژ ئاگرێ جەهنەمێ. بەلێ يێ نەهێليت كچێت وى شوى ب يێت موسلمان بكەن وى باشى دگەل نەكر و د ئەنجامدا بۆ وى نابنە پەردە، و ئەڤە زەرەر و زيان و خوسارەتيەكا زێدە مەزنە هەكە باب بزانن، و خودێ چێتر دزانيت.
