ب / پێدڤيە ئەم بزانين دڤێت مرۆڤ چو جاران ژ رەحم و دلۆڤانيا خودێ بێ هيڤى نەبيت. پێغەمبەرێ خۆشتڤى (سلاڤێت خودێ لێ بن) دبێژيت: هەكە مرۆڤێ گاور و بێ باوەر زانيبا دلۆڤانيا خودێ چەندە ئەو چو جاران ژێ بێ هيڤى نەدبوو، بەلێ بەرامبەر دڤێت ئەم گەلەك ژ ئيزا و كەربا خودێ ژى پشتراست نەبين. ديسا پێغەمبەرێ خودێ (سلاڤێت خودێ لێ بن) دبێژيت: هەكە مرۆڤێ موسلمان و باوەردار زانيبا كا ئيزا و كەربا خودێ چەندە چو جارا ژێ پشتراست نەدبوو، ڤێجا دڤێت موسلمان د ناڤبەرا پشتراستبوون و بێ هيڤيێدا بيت، نەيێ پشتراست بيت و نەيێ بێ هيڤى بيت، نەپشتراستى؛ دا وێ دۆمێ نەدەتە كارێ خەلەت و زوى بزڤريت, و نەبێ هيڤياتى؛ دا بەردەوام دەرگەهێ تۆبێ و زڤرينێ بقوتيت هەرگاڤا خەلەت بوو و هەلنگفت، هەر گونەهكا هەبيت بەس مرۆڤ د تۆبا خۆدا يێ راست بيت خودێ دێ ژێبەت و ل مرۆڤى ناگريت، بەلێ هەكە تۆبە يا راست و دورست بيت و درەو تێدا نەبيت و تۆبەكا وێنەيى و شكلى نەبيت خودێ مەزن دبێژيت: ((قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيم))خودێ مەزن دبێژيت: هەى بەندەيێت من، هەى ئەوێت هەوە زێدە گونەه كرين و هەوە د كرنا گونەهاندا، دايە سەر هەمى تخويبان، ژ دلۆڤانيا خودێ بێ هيڤى نەبن، ب راستى خودێ ل هەمى گونەهان دبۆريت، و هەمى گونەهان ژێ دبەت، ب راستى ئەوە گونەه ژێبەر و دلۆڤان. و خودێ مەزن هەروەكى پێغەمبەرێ خۆشتڤى (سلاڤێت خودێ لێ بن) دبێژيت: خودێ مەزن دەستێ خۆ ب شەڤ ڤەدكەت، دا گونەهكارێ رۆژێ (بۆ خۆ تێدا) تۆبە بكەت، و ب رۆژ دەستێ خۆ ڤەدكەت، دا گونەهكارێ شەڤێ (بۆ خۆ تێدا) تۆبە بكەت. ئانكو: يێ ب شەڤ تۆبە بكەت يان ب رۆژ تۆبە بكەت خودێ دێ تۆبەيا وى قەبويلكەت. و دەرگەهێ تۆبێ يێ ڤەكريە و ناهێتە گرتن هەتا مرۆڤ نەكەڤيتە د سەكەراتيدا يان رۆژا قيامەتێ بهێت يان رۆژ ل جهێ ئاڤابوونێ بهەلێت. د ڤان راماناندا پێغەمبەرێ خۆشتڤى (سلاڤێت خودێ لێ بن) دبێژيت: هەركەسێ بەرى رۆژ ژ رۆژهەلاتێ بهەلێت تۆبە بكەت، خودێ تۆبەيا وى قەبويل كر. ديسا دبێژيت: خودايێ هەر ب هێز و مەزن، تۆبەيا بەندەى قەبويل دكەت هندى نەكەڤيتە د سەكەراتێدا. و د حەديسەكا قودسيدا پێغەمبەر (سلاڤێت خودێ لێ بن) ژ خودێ خۆ دبێژيت: خودايێ بلند گۆت: يا كورێ ئادەمى ب راستى هندى تو دوعا ژ من بكەى و هيڤيا ژ من بكەى دێ گونەهێت تە بۆ تە ژێ بەم دگەل وێ يا ل دەف تە (ئانكو دگەل وان گونەهێت تو دكەى) و من خەم نينە (و ل دەف من ئەڤە يا مەزن نينە)، يا كورێ ئادەمى هەكە گونەهێت تە بگەهنە هندى چاڤێت تە قەترە بكەن ژ عەسمانى، پاشى تو داخوازا گونەه ژێبرنێ ژ من بكەى، دێ بۆ تە ژێ بەم، يا كورێ ئادەمى هەكە تو نێزيكى تژى عەردى ب گونەهان بێيە دەف من، پاشى بگەهيە من و تو چو تشتان بۆ من نەكەيە هەڤپشك، ئەز دێ نێزيكى تژى عەردى گونەه ژێبرنێ دەمە تە.
و دڤێت ئەم ژ دلۆڤانيا خودێ بێ هيڤى نەبين. خودێ مەزن دبێژيت: ((إِنَّهُ لَا يَيْأَسُ مِنْ رَوْحِ اللَّهِ إِلَّا الْقَوْمُ الْكَافِرُونَ)) و ژ رەحما خودێ بێ هيڤى نەبن، و ب راستى ژبلى گاوران كەسێ دى ژ رەحما خودێ بێ هيڤى نابيت. ڤێجا خويشكا هێژا پێدڤيە مرۆڤێ گونەهكار چو جاران ژ دلۆڤاني و رەحما خودێ بێ هيڤى نەبيت، گونەهێت وى چەندێت مەزن بن.. دلۆڤانى و رەحما خودێ مەزنترە، گوهێ خۆ بدآ خودێ مەزن چ دبێژيت؟ دبێژيت: ((وَالَّذِينَ لَا يَدْعُونَ مَعَ اللَّهِ إِلَهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَنْ يَفْعَلْ ذَلِكَ يَلْقَ أَثَامًا))(( يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا))(( إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا))(( وَمَنْ تَابَ وَعَمِلَ صَالِحًا فَإِنَّهُ يَتُوبُ إِلَى اللَّهِ مَتَابًا)) و ئەوێت ژبلى خودێ، دوعايان ژ كەسێ دى نەكەن ژبلى خودێ كەسێ نەپەرێسن و ئەو مرۆڤێ خودێ كوشتنا وى دورست نەكرى، و ب هەقى نەبيت كو بەرانبەر ئێكێ دى بێتە كوشتن ناكوژن، و زنايێ و دەهمەنپيسيێ ناكەن، و هەركەسێ ڤان بكەت، دێ گونەه ل سەر ستوير بن، و دێ پێ ئێتە جزاكرن. رۆژا قيامەتێ ئيزا دێ ل سەر بيتە دوقات، و هەروهەر دێ رەزيل و شەرمزار تێدا مينيت، چونكى گونەه ژى دا دگەل گاوريێ. ژبلى وى يێ تۆبەكرى و باوەرى ئينايى و كار و كريارێت راست و قەنج كرين، ئەڤێت هۆسا، خودێ دێ گونەهێت وان كەتە خێر، ئانكو: دێ گونەهێت وان ژێبەت، و خێران دێ ل جهێ وان دانيت، و خودێ ب خۆ گونەه ژێبەر و دلۆڤانە. و ئەوێ تۆبە بكەت و پاشى كارەكێ راست و باش بكەت، ب راستى ئەو زڤرينەكا دورست ب بال خودێڤە زڤرى.
ڤێجا گەلەك باش هزرا خۆ د ڤێ ئايەتێدا بكە، دێ بۆ تە ديارە بيت كا خودێ تۆبێ قەبويل دكەت يان نە، بەرێ خۆ بدێ هەركەسێ گونەهێت مەزن بكەت و تۆبە نەكەت دێ گونەه ل سەر ستوير بن، و دێ پێ ئێتە جزاكرن. رۆژا قيامەتێ ئيزا دێ ل سەر بيتە دوقات، و هەروهەر دێ رەزيل و شەرمزار تێدا مينيت، بەلێ يێ ئەڤ گونەهە كرين و تۆبەكرى و پەشێمان بووي ))(( إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا)) ژبلى وى يێ تۆبەكرى و باوەرى ئينايى و كار و كريارێت راست و قەنج كرين، ئەڤێت هۆسا، خودێ دێ گونەهێت وان كەتە خێر، ئانكو: دێ گونەهێت وان ژێبەت، و خێران دێ ل جهێ وان دانيت، و خودێ ب خۆ گونەه ژێبەر و دلۆڤانە. بەلێ دڤێت پشتى تۆبێ كار و كريارێت راست و دورست و چاك بكەت، ئەڤێت هۆسا نەبەس دێ گونەهێت وان هێنە ژێبرن، بەلكى دێ ژێبەت و خێران ل شوينێ دانيت، ئانكو: گونەهان دێ ب خێران گوهۆريت. پاشى ئايەتا دويفدا خودێ تۆبا راست و دورست ديار دكەت دبێژيت: (( وَمَنْ تَابَ وَعَمِلَ صَالِحًا فَإِنَّهُ يَتُوبُ إِلَى اللَّهِ مَتَابًا)) و ئەوێ تۆبە بكەت و پاشى كارەكێ راست و باش بكەت، ب راستى ئەو زڤرينەكا دورست ب بال خودێڤە زڤرى.
ڤێجا خويشكا خۆشتڤى ژ دلۆڤاني و رەحما خودێ بێ هيڤى نەبە بەلێ وان رێكان بگرە يێت تو بشێيە خۆ و نەزڤريەڤە گونەهێ. ئێك ژ وان رێكان: وان هەڤال و دۆستێت خراب بهێلە، و ئەو ژينگەها تو تێدا بگوهۆرە، و هەڤالينيا چاكان بكە، و دۆستينى و هەڤالينيێ دگەل وان بكە، و دگەل وان وەرە و هەرە، و هاتن و چۆن و گەريان و روينشتنێ دگەل وان بكە، و خودێ چێتر دزانيت.
