ب / پێدڤيە دايباب گەلەك ب ژير و تێگەهشتى بن و هەر ژ بچويكاتى زارۆكێت خۆ پەروەردەكا باش و دورست بدەنە بەر، و سنج و رامانێت دورست و جوان و حەلال د سينگ و مێشك و دلێت واندا بچينن، و رامان و سنجێت خراب ل بەر وان رەشكەن و نەڤيانا وان بكەنە د دلێت واندا؛ دا دەمێ مەزن دبن هۆسا راببن وەكى وان دڤێت، و ئەڤە رێكا ئيسلامێيە د پەروەردەكرنا زارۆكاندا، هەر ژبەر هندێ ژى پێغەمبەرێ خۆشتڤى (سلاڤێت خودێ لێ بن) دبێژيت د ڤەگێرا ئەبو داووديدا: فەرمان و ئەمرێ بچويكێت خۆ ب كرنا نڤێژان بكەن، و ئەو حەفت سالى، و د ڤەگێرەكا ديدا يا ترمزى و ئەبو داووديدا دبێژيت: حەفت ساليێ نڤێژێ نيشا بچويكى بدەن.
ئەڤە هەمى بۆچى؟! دا دەمێ مەزن دبيت زەحمەت پێڤە نەهێتە ديتن، و ئەز نابينم سوبغا نوينۆيكان بۆ كچا نەبالغ حەرامە بەلێ پێدڤيە ئەم فێرنەكەينە تشتەكێ حەرام هەكە مەزن بوو، چونكى يا بەردەوام ئەڤ بۆياغە كارئينابيت دێ فێربيتێ، و دەمێ مەزن دبيت ل دەف وێ دێ تشتەكێ ئاسايى بيت، و حەرام نابينيت، و بەرتەنگيا خۆ ژێ نابينيت، هەمى ژبەر چ؟ چونكى ژيەكێ درێژ ئەڤ بۆياغە يا ب دەستێ خۆڤە ديتى، ڤێگاڤێ نەشێت هزر بكەت يا حەرامە و نەدورستە، و هەر ل سەر ڤێ رامانێ گەلەك كچێت بالغ دەرسۆكێ ناكەنێ چونكى ژ بچويكاتى چو جاران دايكا وێ نەگۆتيە فەرە كچ دەرسۆكێ بكەتێ، ڤێجا دەمێ مەزن بووى شەرم دكەت بكەتە سەرێ خۆ، چونكى چو جار ل سەر سەرێ خۆ نەديتيە، و خودێ چێتر دزانيت.
